Isaya 5 - Baibo Busansulushi Bwa Libuku Ili

Lwiimbo lwa muunda wa minyansa

¹ Ntokwiimbila wooyo ngoonsuni lwiimbo lwaamba pamuunda wakwe wa minyansa. Usunikwi wangu wakalinga kucite muunda wa minyansa, palubasu lwa kalundu pakalinga mboleshi.

² Wakaulima akukushaamo mabwe oonse. Lyalo wakashangaamo minyansa iindaawo kubota. Mumuunda uyo wakayakaamo katungu akukabaamo cilindi cakutyaninaamo minyansa. Wakalinga kushomete ayi mulaakuswa shisepo shibotu, sombi mwakaswa minyansa iyo yakalinga kusakamwita.

³ Usunikwi wangu waamba ayi, “Ono mwebo nobantu ba muJelusalemu amucishi ca Juda amoomboloshe pakati kangu amuunda wangu wa minyansa.

⁴ Ino nciinshi cimwi ciinda mbondakacitila muunda wangu ico ncendakalinga kweelete kuucitila? Nebo ndakalinga kulangila ayi mulaakucata minyansa ibotu. Ceebonshi mwakacata minyansa isakamwita?

⁵ “Ono nceshi nkacite kumuunda wangu nceeci. Ndaakumwaya lushito lwa nguwo, lyalo muunda uyo ulaakunyonyoolwa. Ndaakupwaya lubumbu luutabilila, lyalo mulaakulyatoolwa abanyama bamuluundu.

⁶ Ndaakulengesha muunda uyo kuba musena utacite mpindu mukutakwesoolaako nabi kuusakwita. Mpeeke palaakumena lukupu amyuumfwa. Ncakwiila ndaakukasha makumbi kulosheshawo mfula.”

⁷ Isilaeli ngomuunda wa minyansa wa Mwaami Lesa Shinkusu shoonse. Ncakwiila bene Juda njeminyansa njaakashanga. Wakalinga kulangila ayi batoocita shiluleme, sombi ncaakabonabo mbucayi. Wakalinga kulangila koombolosha cakutanyengelela, sombi cakapola kumatwi akwe nkulila kwa baabo bakalinga kulyatililwa.

Bubi bucita bantu

⁸ Mapensho kuli baabo batoonungilako maanda kumaandaabo akunungilako myuunda kumyuunda yabo. Ee, cakwaamba ayi musena woonse wamana, mpeeke mukekale nweenka mucishi umo.

⁹ Mwaami Lesa Shinkusu shoonse ndamunyumfwa kaalumbila ayi, “Ndashinisha maanda anene oonse aya alaakuba mumatongo. Ncakwiila naakomeni, naaboti alaakucaalabo kwakubula aukalaamo.

¹⁰ Ceebo muunda wa minyansa ukwana maekele likumi ulaakukushabo malita osanwe aotatwe a waini. Pashangwa malita ali 180 a mbuto, pakutebula nkusushabo malita ali 18 a shili anga ngamaila.”

¹¹ Mapensho kuli baabo bafuminabo kuyandoola shakunwa shikali. Ee, abo banwa cakwipisha lisuba kushikila shabakola cakwiindilila.

¹² Pakusekelela kwabo balalishilwa tulumbu tunene atuniini, misebe amitoolilo akunwa waini. Sombi kumilimo ya Mwaami Lesa tababikiiko amaano. Ncakwiila milimo ya maansaakwe baleesuula.

¹³ Aboobo bantu bangu balaakuya mucishi ca busha ceebo cakutanyumfwa kwabo. Bamatanjilili babo balaakumana kufwa kunsala abantubo boonse balaakumana kufwa kunyotwa.

¹⁴ Paceebo ceeco cuumbwe calakaminaako alimwi cilicitekobo kwiita. Ncakwiila cilaakumina bacinenenene ba muJelusalemu abantubo bamwi baanji, ee, beshinkondo abamukondwa kumangweengwe.

¹⁵ Aboobo kulinaamuna kwa bantu kulaakumana. Ncakwiila kulisumpula kwabo kulaakunyonyoolwa.

¹⁶ Sombi Mwaami Lesa Shinkusu shoonse ulaakusumpulwa ceebo ca koombolosha cakutanyengelela kwakwe. Mubululami Lesa usalalite ulaakutondesha ayi ncakwiila ulisalalite.

¹⁷ Mbelele shilaakunoolya bwiisu mumafulo a nshisho. Ncakwiila bana ba mbelele balaakunoolya mumatongo a mandabala anene a babile.

¹⁸ Mapensho kubaabo batola shibiibi shabo antaambo sha bubeshi. Balatola bubi bweenka mbuli bakweela shikoci antaambo.

¹⁹ Balaamba ayi, “Lesa aafwambaane kucita ncaatooyeeya kwaamba ayi tuciboone. Ee, Usalalite wa bene Isilaeli aafwambaane kucita miyeeyo yakwe kwaamba ayi twiishiibe.”

²⁰ Mapensho kubaabo baamba bubi ayi cibotu akwaamba cibotu ayi bubi. Balapilula munshinshe kuba mumuni, amumuni kuba munshinshe. Cilula balaamba ayi cilicite mise, cicite mise ayi cilalula.

²¹ Mapensho kubaabo baliyeeyela ayi mbasongo, ee, baliyeeyela ayi balicenjete.

²² Mapensho kubaabo baambwa busankwa pawaini! Ee, abo batacite boowa na caamba kusenkanya shakunwa shikali!

²³ Sombi ceebo ca makulo bantu abo balalekelela bantu bacite milandu. Taboomboloshi cabululami batacite milandu.

²⁴ Ono aboobo bweenka mile ya bwiisu mboipya cakumaninina ee, bweenka bwiisu buyumu mbobululuma pakupya, mbweeke ubo muyanda wabo ulaakubola. Aalo maluba abo alaakuululuka anga ndusuko ceebo bakaka milawo ya Mwaami Lesa Shinkusu shoonse, ee, ceebo basuula maswi a Usalalite wa bene Isilaeli.

²⁵ Paceebo ceeco Mwaami Lesa wakalalila bantu bakwe akutandabika lyaansa lyakwe ayi abape mulandu. Tulundu twatenkaana. Mituntu ya bantu ilaakunooli anga ngamatombe mumikwakwa. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

²⁶ Ono Mwaami Lesa ulaakunyamuna mbembela mwiculu akwiita mishobo ili kulaale. Bantu abo ulaakubalishisha muloshi kwaamba ayi bese kuswa kweela cishi. Ncakwiila abalo balaakwisa cakufwambaana abuumbi.

²⁷ Pakati kabo taaku weshi akaleeme nabi kulisuntula cakuwa, alimwi taaku nabi weshi akashinshile nabi koona. Taaku weshi akanoocite laamba usensuluka wiine nabi ntambo ya nkwabilo yeshi ikasutuke.

²⁸ Mifwi yabo ilikolete alimwi mata abo alibambitwe kale. Shoondo sha maaki abo nshiyumubo anga ndibwe, aalo mawilo a shikoci shabo sha nkondo alacicabo anga nkapupuulwa.

²⁹ Bashilumamba abo balalilabo anga ninkalamu, ee, anga mbaana ba nkalamu abo babuluma na bacata munyama. Balamutolaanya cakubulaawo aukonsha kumufuna.

³⁰ Bushiku ubo bwaakushikila balaakubulumina Isilaeli anga nkuwoota kwa maaba palweenge. Uyo weshi akalange mucishi ici, ulaakubonabo munshinshe alimwi abuumba. Mumuni woonse awalo ulaakubabo munshinshe ceebo ca makumbi.