Isaya 47 - Baibo Busansulushi Bwa Libuku Ili

Koomboloshekwa kwa ndabala ya Babiloni

¹ Mwaami Lesa waamba ayi, “Ondabala ya Babiloni, seluka pacuuna ca bwaami, ukale panshi. Ee, kala mulusuko kuteshi pacuuna ca bwaami. Mukutakomwa wakalinga anga ngumooye utana kukumanawo kale amusankwa. Sombi bulya teshi unoocaambwa ayi mubombubombu ulamwa anga ndiyi.

² Bwesa mpelo upele fulaulo. Fuula kasani kateshimite kakulifweka kumeenso. Pimpa cifunga cako myeendo icaale patuba. Lyalo ukubule mumaanshi kusubuka tulonga.

³ Bantu batookubona koolibo nduno. Lyalo nsoni shitookucata cakuyanda kukupisha panshi. Ncakwiila ntooboosha cishole alimwi taaku weshi ankaashe.”

⁴ Usalalite wa bene Isilaeli ngoMupulushi wesu. Liina lyakwe nguMwaami Lesa Shinkusu shoonse.

⁵ Mwaami Lesa utookwaambila Babiloni ayi, “Kalabo tontolo, uye mumunshinshe. Camana bulya! Teshi ukeetweewo tubili ayi mwaami mwanakashi wa mishobo yoonse.

⁶ Bantu bangu bakalinga bankalasha. Mpeeke ndakacita anga ndacileka kubabikaako maano. Lyalo ndakabaaba mumaansaako. Ncakwiila tookwe kubanyumfwilawo nkumbu. Wakalinga kucita shalunkutwe akubamacembele boonse.

⁷ Webo wakalinga kuyeeya ayi unanoolibo mwaami mwanakashi kwalyoonse alyoonse. Sombi tookwe kulisukamaawo ashintu ishi shitoocitika bulya nabi kuyeeyabo mbweshi shikacitike.

⁸ “Ono kutika webo omukondwa kumangweengwe. Ee, webo nooyeeya ayi toocite cakulisukama alimwi uli muluumuno. Ulalyaamba ayi webo ulicite bulemu anga nguLesa alimwi taaku aumwi uli mbuli ndiwe. Webo wakalinga kuyeeya ayi teshi ukabeewo mukalubinje nabi kufwitwaawo baana.

⁹ Sombi buumba bwa mishobo yobilo bulaakumucata paciindi comwi alimwi mubushiku bomwi. Ee, buumba bwakufwitwa baana abwakuba mukalubinje. Shintu ishi shilaakukushikila cankusu nakubi kwaamba ayi ulicite shisoko abwaanga nshoosebensesha.

¹⁰ Wacinka manungo mububi bwako akwaamba ayi, ‘Taaku umbwene.’ Busongo buli muli ndiwe alushibo shakutola kumbi. Webo ulalisumpula mukwaamba ayi, ‘Ndimebo alimwi taaku aumwi kulekabo ndime.’

¹¹ Ono mapensho alaakwisa pali ndiwe alimwi bwaanga bwako teshi bukaamaneewo. Ncakwiila shinkunka shilaakukulokela cakwaamba ayi kulaakubula weshi akakulubuleeko. Malwesa ayo webo ngootana kubonaawo alaakukupolela cakutaeengashila.

¹² “Ndwaako, kosunga shisoko abwaanga bwako, kayi wakalinga kushisebensesha kuswabo kubwanike. Cimwi ciindi shilaakukucafwa munshila imwi. Mpashi ulaakukonsha kuyoosha balwani bako.

¹³ Maano ngoopandwaako akucaya mutwi! Anu basongo ba shintu shili mwiculu abese tubone, ee, beshikusonda mukusebensesha lushibo lwa panyenyeenshi, abo baamba sheshi shikacitike kunembo mweenshi amweenshi, abakupulushe kusheesho shitoosa pali ndiwe.

¹⁴ “Bantu abo balaakubabo anga mbwiisu butyolookite. Aboobo mulilo ulaakubamana kubatenta. Tabakoonshi akulipulusha kuswa mumulilo utoonyaka. Ncakwiila tabakoonshi kulipulusha kuswa kunkusu sha mulilo. Makalangasha a nguwo teshi akulikasaasha, ee, teshi mulilo wakuya mukwikala pafwaafwi ayi uyote.

¹⁵ Ono njempindubo yeenka iyo njeshi ukacane kuswa kubantu abo. Basongo ba shintu shili mwiculu abo wasebensaabo kuswa kubwanike bwako. Boonse balaakukupalangana akuya munshila shabo beene. Taaku nabi womwi weshi akacaale kwaamba ayi akupulusheeko.”