Isaya 46 - Baibo Busansulushi Bwa Libuku Ili

¹ Ono aya ngomeelelesho a balesa ba bene Babiloni! Ncakwiila Belo aNebo mbalesa balinga kulambilwa, sombi sunu banyamwitwa pambongolo. Baba mukuli pamisana ya shifubwa shilemete.

² Shibumbwabumbwa isho tashikoonshi kulipulusha shiine. Amubone ashalo shilacatwa akutolwa mubusha. Ncakwiila sunu ngameelelesho a balesa ba bene Babiloni.

³ Mwaami Lesa waamba ayi, “Amukutike ono nobamulunyungu lwakwe Jakobo, ee, mwebo nomwakacaalaawo pabantu bangu bene Isilaeli. Ndamulama kuswa kuciindi ndimwakamitwa, ncakwiila kumulama kuswa ciindi ndimwakashalwa.

⁴ Nebo ndi Lesa wanu alimwi ndanoomulama kushikila misusu yanu yaakutuba kukucembela. Ndakamulenga alimwi ndanoomulama. Ndanoomucafwa alimwi ndanoomufuna.”

⁵ Mwaami Lesa waamba ayi, “Anu nebo inga mwanjelanisha abaani? Ngani umwi weenga weelana anebo?

⁶ Amubone bantu balakusha golodi mumpotomona shabo, balabika silifa pashipimo akuupima. Lyalo balalipila bacibwene kufula sha golodi ayi abapangileko lesa. Mpeeke balatalika kufukamina lesa uyo akumulambila.

⁷ Balamubika pacifushi akumunyamuna. Lyalo balamwiimika pamusena wakwe, kwiimikana cakutakonsha kusena pamusena apo mpwaabikwa. Na muntu wapaila kuli nguwe, taakoonshi kukumbula nabi kupulusha muntu uyo kuswa kushintu shiyoosha.

⁸ “Ono mwebo nobamucita shibi kamwiibaluka ceeci. Kamuyeeya shintu nshendakacita.

⁹ Ee, amwiibaluke nshendakacita kale kale. Lyalo musumine kwaamba ayi nebo neenkabo ndime Lesa alimwi ayi taaku lesa aumwi uli mbuli ndime.

¹⁰ Kuswa kumatalikilo ndakaambila limwi sheshi shikacitike. Ee, ndakashaambila limwi kashitana kucitika. Nebo ndakaamba ayi miyeeyo yangu teshi ikeelewo munshila alimwi ayi ndaakucita shintu shoonse nshendapinga kucita.

¹¹ Ncakwiila ntokwiita musankwa kuswa kwicwe. Ulaakwisa mukulwana cakutamwiingashila anga ngucikupwi kwaamba ayi acite kweelana amuyeeyo ngondakapanga.

¹² “Ono amukutike nshentokwaamba mwebo nobantu beshicimpamya. Amukutike mwebo nomuyeeya ayi teshi mukapulushikwe onoono.

¹³ Bushiku bwakupulushikwa kwanu ndabuleta pafwaafwi. Ndushinisho tabubete kulaale, sobwe. Teshi nkacelweewo kukoma balwani bangu. Ndabala ya Jelusalemu ndaakwiipulusha onoono akuletela bene Isilaeli bulemu.”