Isaya 45 - Baibo Busansulushi Bwa Libuku Ili

Mwaami Lesa mbwaakasala Sailasi

¹ Ono Mwaami Lesa waambila Sailasi uyo ngwaakasala ayi, “Ndakucatilila palyaansa lyalulyo kwaamba ayi ukome mishobo ya bantu akufuula bamaami bulemu bwabo. Ndaakukucalwita shisasa sha kuminjililo ya mandabala anene kwaamba ayi ikanoolibo bwaashi.

² Ndaakutanjila kunembo lyako akukumwailako tulundulundu ayi peelane. Ndaakupwayoola shisasa sha bulonse sha kuminjililo akunyonyoola mingwala ya nshimbi ya kushisasa.

³ Ndaakukupa shintu sha makwebo shishisitwe, ee, bubile buli mumisena ishiya ya bushishi kwaamba ayi ukeshibe ayi ndime Mwaami Lesa, Lesa wa bene Isilaeli uyo ukwiita liina lyako.

⁴ Ceebobo ca basebenshi bangu bamulunyungu lwakwe Jakobo, ee, bene Isilaeli bantu abo mbondakasala, ndakakwiita liina lyako akukupa cuuna ca bulemu nakubi kwaamba ayi toonshiiwo.

⁵ “Nebo ndime Mwaami Lesa, taaku aumwi. Ncakwiila taaku lesa aumwi kulekabo ndime. Ndaakukupa nkusu nabi toonshiiwo.

⁶ Ndaakucita boobo kwaamba ayi boonse kuswa kweela cishi akweela cishi banshiibe ayi ndime Mwaami Lesa alimwi taaku lesa aumwi kulekabo ndime.

⁷ Ndalengesha mumuni kubaako nabi munshinshe. Ndime mpa shoolwe alimwi ndime mpa mapensho. Ee, nebo neenka neMwaami Lesa ndime ncita shintu shoonse ishi.

⁸ “Webo oliculu kwiculu uko, losha bululami bweenka makumbi mbwaalosha mfula. Acalo cishi ca panshi acibutambule kwaamba ayi muli ncico lupulusho abululami shiboneke. Nebo neMwaami Lesa ndimeshi nengeshe ayi cicitike.”

Mwaami Lesa mulengi wa shintu shoonse

⁹ Mapensho kumuntu upikishanya awooyo wakamubumba ceebo lakwe ulibo anga cikaye ca nongo pakati ka shimwi shoonse. Ono sa bulongo inga bwaambila shikubumba ayi, “Anu utoobumbanshi?” Sa nongo inga yamwaambila ayi, “Toocitewo buuya?”

¹⁰ Mapensho kuli wooyo waambila baishi ayi, “Anu mwakanshalilanshi?” Mapensho kuli wooyo waambila banyina ayi, “Anu mwakantumbukilanshi?”

¹¹ Ono Mwaami Lesa, Lesa Usalalite wa bene Isilaeli uyo wakababumba waamba ayi, “Sa inga mwanjipusha shabana bangu nabi kundwiita nceenjelete kucita?

¹² Ndime ndakalenga cishi ca panshi akulenga bantu bekalaamo. Ngamaansaangu nemwiine akafungulula liculu alimwi ndime nyendelesha makoto makoto anyenyeenshi ashimwi shiliimo.

¹³ Ono ndasongaanya Sailasi kashanga mubululami bwangu. Ndaakululamika nshila shoonse nsheshi akanokwiinda. Ulaakuyakulula ndabala yangu inene ya Jelusalemu alimwi ulaakwaangulula bantu bangu bali mubusha. Sombi teshi akacite boobo kwaamba ayi alipilwe nabi kulambulwa.” Mwaami Lesa Shinkusu shoonse waamba.

¹⁴ Ono Mwaami Lesa utokwaambila bene Isilaeli ayi, “Buboni bwa bene Ijipiti abene Kushi bulya bulaakuba bwaanu. Abalo basankwa balaamfu bene Seba balaakuba basha banu. Balaakunoosa cimukonkela pesule kabaangitwe ncetani. Balaakufukama kunembo lyanu akwaamba ayi, ‘Ncakwiila Lesa uli amwebo alimwi lakwebo eenka ngoLesa.

¹⁵ Nobene Isilaeli, Lesa wanu uyo umupulusha, ncakwiila nguLesa ulishisa.

¹⁶ Boonse beshikubumba shibumbwabumbwa balaakulenshekwa nsoni akusebaanishikwa. Ncakwiila boonse balaakuloka shiwa abuumbi.

¹⁷ Sombi bene Isilaeli balo Mwaami Lesa ulaakubapulusha. Kupulushikwa kwabo kulaakuba kwamuyayaya. Ee, bene Isilaeli teshi bakasebaanishikweewo.’ ”

¹⁸ Mwaami Lesa wakalenga liculu, ncakwiila lakwe ngoLesa mwiine! Wakalenga acishi ca panshi, kucipanga cakutateenkaana kwaamba ayi cinoolikobo. Taakwe kucilenga ayi cinooli luundubo lulibo bwaashi, sombi kwaamba ayi ube musena bantu ngobeelete kwikalaamo. Uyo wakacita boobo ulaamba ayi, “Nebo ndime Mwaami Lesa alimwi taaku lesa aumwi.

¹⁹ Ndakaambilabo limwi cakutashisa. Nshikwe kwaambila mucishi cicitebo munshinshe. Nshikwe kwaambila bamulunyungu lwakwe Jakobo ayi banoonangoola cakubula kumucana. Nebo neMwaami Lesa ndaamba lushinisho alimwi ndaamba shintu shiluleme.”

Mwaami Lesa, nguLesa wa shintu shoonse

²⁰ Mwaami Lesa waamba ayi, “Amuyoboloke akwisa. Ee, amuyoboloke mwebo nomwakalobokela pakati ka mishobo imwi. Batacite lushibo mbaabo banyamuna balesa ba shisamu, ee, abo bapaila kubalesa batakoonshi kubapulusha.

²¹ Amwaambe ceshi cicitike, ee, amukonkolole. Amulifuuyefuye palwaanu nobeene. Ngani wakaamba cikani ici kale kale? Ngani wakacaamba kacicilibo kulaale kucitika? Sa teshi ndime neMwaami Lesa? Ncakwiila taaku Lesa aumwi kulekabo ndime. Ndi Lesa ululeme alimwi Mupulushi. Ee, taaku lesa aumwi, ndimebo.

²² “Anu noonse amusandukile kuli ndime, mupulushikwe, ee, noonse kuswa kweela cishi ca panshi ankoceela. Ndimebo neenka neLesa, ndushinisho taaku aumwi.

²³ Ndashomesha cakulumbila muliina lyangu nemwiine. Mulomo wangu waamba cakushinisha, kwaamba maswi eshi akabule kusandulwaawo akwaamba ayi, ‘Linungo lya muntu woonse lilaakufukama kunembo lyangu alimwi mulomo wa muntu womwi awomwi ulaakunoolumbila muliina lyangu.’

²⁴ “Mukwaamba liina lyangu balaakunokwaamba ayi, ‘MuMwaami Lesa mweenkabo, momuli bululami alimwi ankusu.’ ” Boonse abo bandwana balaakwisa kuli ndime akulenshekwa nsoni.

²⁵ Balo bamulunyungu lwakwe Jakobo, nebo neMwaami Lesa ndaakubalulamika alimwi balaakunoonumbaisha.