Isaya 44 - Baibo Busansulushi Bwa Libuku Ili

Mwaami Lesa ngoLesa eenkabo

¹ Ono Mwaami Lesa waamba ayi, “Amukutike mwebo nobamulunyungu lwakwe Jakobo, nobasebenshi bangu. Amukutike nobene Isilaeli mukowa ngondakasala.

² Nebo ndime Mwaami Lesa uyo wakamulenga, ee, Lesa uyo wakabumba womwi awomwi pakati kanu mumala muli banyina alimwi Lesa uyo weshi akanoomucafwa. Mutaloondi nobasebenshi bangu bamulunyungu lwakwe Jakobo. Mwebo muli bantu abo mbondakasala alimwi mboonsuni.

³ “Ndaakulengesha maanshi kuba mucishi citaciteewo akulengesha tulonga kukunka painshi iyumu. Bana banu ndaakubapoomweta Mushimu wangu, ee, bamulunyungu lwanu ndaakubapa coolwe.

⁴ Balaakukula kabotu anga mbwiisu buli pakatoonto nabi anga ncisamu ca masompe cili pafwaafwi amulonga.

⁵ “Umwi ulaakwaamba ayi, ‘Ndi wa Mwaami Lesa.’ Umwi ulaakuliita ayi wamulunyungu lwakwe Jakobo. Umwi alakwe ulaakulilemba pamukono ayi, ‘Ndi wa Mwaami Lesa’ alimwi ulaakunooliita ayi wamulunyungu lwa bene Isilaeli.”

⁶ Ono Mwaami Lesa, Mwaami wa bene Isilaeli, ee, Mupulushi wabo, ngweeke ngoMwaami Lesa Shinkusu shoonse, waamba ayi, “Ndime mutaanshi alimwi awakweelaako. Taaku Lesa aumwi kulekabo ndime.

⁷ Ino ono ngani uli mbuli ndime? Aalyaambe tunyumfwe. Aanyamuke aambilishe kunembo lyangu shacitika kuswa kuciindi ca bantu bangu bakulukulu asheesho sheshi shikacitike kunembo litoosa. Ee, aambe ceeco ceshi cikacitike kunembo.

⁸ Mutatutumi alimwi mutaloondi. Sa cikani ici nshikwe kucaambilishila limwi kale kaleelyo? Mwebo muli bakamboni bangu. Sa kuliiwo Lesa umwi kulekabo ndime? Ndushinisho taaku Lesa nabi womwi uli mbuli Mwaandami umwi ngoonshi nebo.”

Buluya bwakulambila shibumbwabumbwa

⁹ Anu boonse bapanga shibumbwabumbwa taaku mbobabete ashalo shintu nshibabikaako maano tashicite mpindu. Bantu abo banyamuka akushimikila pali nshisho balitulookite meenso. Ncakwiila kubula lushibo kwabo kwabasebaanya.

¹⁰ Mwebo nobantu, ngani ubumba golodi akupanga cibumbwabumbwa ico citacitewo mpindu kuli nguwe?

¹¹ Muntu uyo abaabo bali mbuli nguwe balaakulenshekwa nsoni. Abo bacibwene shakupangapanga mbantubo bweenka mbuli bamwi boonse. Balaakulenshekwa boowa akukankamanishikwa kunene abuumbi.

¹² Amubone shikufula sheela ulabwesa ceela comwi akucibika pamulilo. Lyalo mwiine ankusu shakwe ulatola nsando mwiculu akutalika kucuuma kwaamba ayi cibumbwabumbwa ico cibe mbwaasuni. Mukuya cisebensa ulanyumfwa nsala, nyotwa alimwi ulalema.

¹³ Alakwe shikubesa mapulanga ulatalatala ncaasuni kubesa. Lyalo ulatalika kubesa cili anga ngumuntu. Ulabesa muntu mubotu kwaamba ayi abike muŋanda yakulambililaamo.

¹⁴ Cimwi ciindi inga watimbula cisamu ca sida ayi asebenseshe, nabi mubanga nabi cisamu ca paini kuswa mumusaansa. Cimwi ciindi inga washangabo cisamu ca paini ciitwa ayi laulelo akulindila mfula ayi ilokeleewo kwaamba ayi cikule.

¹⁵ Amubone, muntu kucisamu comwi ulakushaako musampi umwi ayi ndukuni, umwi ulakunkisha mulilo ayi ayote alimwi akupangisha shinkwa. Awalo musampi umwi nkubesaamo lesa kwaamba ayi anoolambila, ee, cibumbwabumbwa ayi anoocifukamina.

¹⁶ Misampi imwi ulakunkisha mulilo akutentelaawo nyama, weelya akukuta. Pakuyota ulaamba ayi, “Kubota mulilo uyu mwebo! Kutooswa cikasaashi cibotu abuumbi!”

¹⁷ Ono kweenka kwaswa nkuni, misampi imwi yoonse yacaalaako nkubesa lesa akuba cibumbwabumbwa cakwe. Lyalo ulacifukamina akucilambila. Ulapaila kuli ncico akwaamba ayi, “Webo ndiwe lesa wangu, mpulushe!”

¹⁸ Bantu ba mushobo uyo taaku ncebeshi, tabanyumfwishi. Meenso abo akacalwa ayi batanoobona atwalo tulango twabo twakashindamina ayi batakoonshi kwishibaawo cintu nabi comwi.

¹⁹ Ncakwiila shikubesa shibumbwabumbwa taaciteewo kalango nabi maano a kwishiba ayi misampi imwi ndakakunkisha mulilo. Pamakalangasha ndakapangilawo shinkwa akuyokelawo nyama ndalya. Misampi imwi yoonse yakacaala ndakeebesesha cibumbwabumbwa. Ono mbulya ntoofukamina cipansha ca cisamu!

²⁰ Sa te ca mushobo uyo cilyeelenebo akulya milota. Ndushinisho maano akwe alisaamite, aboobo taakoonshi kulifuna napaceyuubo. Taakoonshi kwishiba ayi ici cintu nceencite mulyaansa lyangu lyalulyo ncabubeshi.

Mwaami Lesa ngomulengi alimwi ngomupulushi

²¹ Mwaami Lesa waamba ayi, “Nobamulunyungu lwakwe Jakobo amwiibaluke shintu ishi, nobene Isilaeli, mwebo muli basebenshi bangu. Ndakamulenga kwaamba ayi mube basebenshi bangu. Ncakwiila nebo teshi nkamulubeewo.

²² Shilubo shanu ndashipalanganya bweenka mbooncita makumbi, ee, shibiibi shanu ndashimanisha bweenka bumana shikuunku macuunsa mukwiinga ndime ndakamulubula.”

²³ Amwiimbe nyimbo shakusangalala noliculu ceebo Mwaami Lesa ngowacita boobo. Amwiimbe cakoolobesha nocishi ca panshi. Amwebo notulundu, nomisaansa ashisamu shoonse amwiimbe. Ceebo Mwaami Lesa ngowalubula bamulunyungu lwakwe Jakobo. Ncakwiila Mwaami Lesa ngowatondesha bulemu mbwaacite muIsilaeli.

²⁴ Ono Mwaami Lesa, Mupulushi wanu uyo wakamubumba mumala mubamanyinawanu, waamba ayi, “Ndime Mwaami Lesa uyo wakapanga shintu shoonse. uyo wakatandabika liculu eenka akuyala cishi ca panshi coonse kwakubula auncafwa.

²⁵ Ndime Lesa uyo ulubaanya bulaluki bwa balaluki babeshi akulengesha bamukamwaami kuboneka buluya. Ndime Lesa uyo ukoma lushibo lwa basongo akululengesha kuba buluya.

²⁶ Sombi na musebenshi wangu walaluka shakunembo, ee, na ndatuma shinkombe wangu kuyubulula nshendabamba, ndime nengesha shintu isho kucitika cancinencine. Ndime ŋamba pandabala ya Jelusalemu ayi bantu balaakuya mukwikalaamo alimwi. Ndaamba apacishi ca Juda ayi mandabala a mumo alaakuyakululwa alimwi. Ee, kuyakululwa nabi ngamatongobo.

²⁷ Ndime neŋambilabo liswi kulweenge ayi, ‘Yuma!’ alwalo lulayuma peenka apo.

²⁸ Ndime ŋamba pamwaami Sailasi ayi, ‘Ngumweembeshi wangu alimwi ulaakucita shoonse nsheensuni. Ncakwiila ngweshi akaambe pandabala ya Jelusalemu ayi ndabala inene ya Jelusalemu aiyakululwe alwalo lwiimbi lwa Ŋanda yakwe Lesa aluyakwe.’ ”