Isaya 43 - Baibo Busansulushi Bwa Libuku Ili

Lesa mbwaakashomesha kufuna bantu bakwe

¹ Ono Mwaami Lesa, Lesa uyo wakamulenga nobamulunyungu lwakwe Jakobo, ee, uyo eenka wakamubumba mwebo nobene Isilaeli waamba ayi, “Mutaloondi, ndaakumufuna. Ndakamwiita liina, muli baangu.

² Mwaakwiinda mumaanshi alaamfu a mapensho, nebo ndaakunooli amwebo. Mwaakwiinda mumilonga ya mapensho teshi mukatolwe kumukuuku wa njiyo. Mwaakwiinda mumapensho ali anga ngumulilo, teshi mukapyeewo mumapensho ayo, sobwe. Teshi mukapyeewo nabi akanooli akali buyani.

³ Ceebo nebo ndime Mwaami Lesa wanu, ee, Usalalite wa bene Isilaeli uyo umupulusha. Ndaakubenga Ijipiti mukumulubula. Ndaakubenga Kushi aSeba mumusena wanu.

⁴ Ndaakubenga mishobo yakabumbulu kwaambabo ayi mpulushe buumi bwanu. Ceebo mwebo kuli ndime muli cintu ca makwebo. Peculu lya waawo ndimusuni abuumbi alimwi ndamulemeka.

⁵ Mutabi aboowa, ndi amwebo! Ndaakuleta bamulunyungu lwanu kuswa kushishi sha kwicwe alimwi ndaakuyobolola boonse bali kushishi sha kumbo.

⁶ Ndaakwaambila shishi sha kumatwa ayi, ‘Amubaleeke ono!’ Ashalo shishi sha kumalenge ayi, ‘Mutababililishi.’ Bana bangu basankwa ababoole kumishaabo kuswa kushishi sha kulaale. Abalo bana bangu banakashi ababoole kuswa kweela cishi kwiine.

⁷ Boonse mbantu bangu, ndakabalenga ayi banoompa bulemu.”

Bene Isilaeli mbobakamboni ba Mwaami Lesa

⁸ Lesa waamba ayi, “Bantu bangu amubeete bese kunkuta. Meenso ncakwiila balicite, sombi tababoni. Matwi ncakwiila balicite, sombi tabanyumfwi.

⁹ Mishobo imwi yoonse aibungane beepushikwe. Ngani pakati ka balesa babo wakaambawo sheshi shikacitike kunembo? Ngani wakaambaawo ayi ishi shitoocitika bulya shilaakucitika? Abese balesa abo bape bukamboni bwabo, kwaamba ayi tubone ayi bakaamba lushinisho. Lyalo bantu bamwi banyumfwe akwaamba ayi, ‘Ncalushinisho.’ ”

¹⁰ Mwaami Lesa waamba ayi, “Mwebo nobene Isilaeli ndimwe bakamboni bangu. Ndimwe basebenshi bangu abo mbondakasala kwaamba ayi munshiibe, munshoome alimwi akushinisha ayi ndimebo Lesa. Taaku aumwi Lesa wakabaawo kulekabo ndime alimwi taaku lesa umwi weshi akabeeko kunembo.

¹¹ “Nebo, ee, nebo neenka ndime Mwaami Lesa, kwisule lyangu taaku aumwi mupulushi.

¹² Amubone, nebo ndakamucenjesha shakunembo. Peculu lya waawo ndakesa mukumucafwa. Taaku lesa mweensu wakacitawo ca mushobo uyu. Mwebo nobeene muli bakamboni bangu kwaamba ayi ndimebo Lesa.

¹³ Ncakwiila ndi Lesa kuswabo kale kale. Taaku muntu nabi womwi ukonsha kupusumuka mumaansa angu alimwi ncendacita taaku muntu ukonsha kucisandula.”

Bene Isilaeli mbobakaswa kuBabiloni

¹⁴ Mwaami Lesa, Mupulushi wanu Usalalite wa bene Isilaeli waamba ayi, “Ceebo canu ndaakutuma likoto lya bashilumamba kwaamba ayi bakalwane bene Babiloni. Ndaakunyonyoola minjililo ya ndabala. Lyalo ciyobeyobe cakukondwa ca bantu bekalaamo cilaakuba kulila.

¹⁵ Nebo ndime Mwaami Lesa, Usalalite alimwi uyo wakamulenga nobene Isilaeli. Ncakwiila ndime Mwaami wanu.”

¹⁶ Ncakwiila Mwaami Lesa uyo wakapanga nshila mulweenge, ee, kupanga nshila mumaanshi ayoosha.

¹⁷ Wakayobolola likoto lya bashilumamba beshinkusu alya bashilumamba balwanina mushikoci apamaaki. Kuswawaawo wakabakampeeka panshi cakwaamba ayi teshi bakabukeewo tubili. Ndushinisho bwakabeela cakubabo anga ndilampi lyashimishikwa.

¹⁸ Ono Lesa uyo waamba ayi, “Shikulukulu amushiluube. Mutakakatili kushintu shikulukulu shilya.

¹⁹ Amubone, ntoocita cintu cipya! Cintu ico citoocitika kale alimwi mulicibwene. Ntoopanga nshila muluyanga alimwi ntoobikaamo atulonga.

²⁰ Banyama bamuluundu, ee, bamwaaba abamwiina balaakumpa bulemu. Balaakumpa bulemu ceebo cakulengesha maanshi kubaamo muluyanga. Ncakwiila ceebo cakulengesha tulonga kukunka mulunjumwa. Balaakumpa bulemu ceebo cakupa maanshi bantu bangu mbondakasala.

²¹ Bantu abo ndakabalenga nemwiine amaansaangu kwaamba ayi bakanookwaambilisha bulemu bwangu.”

Cibiibi cakacita bene Isilaeli

²² Ono Mwaami Lesa waamba ayi, “Nakubi boobo tamukwe kundililaawo mwebo nobamulunyungu lwakwe Jakobo. Ncakwiila nobene Isilaeli tamukwe kulisukamaawo sha pali ndime.

²³ Mwakacileka kundetela mbelele sha milambu yakutenta, nabi kundemeka kwiinda mukubenga milambu yanu imwi. Nebo nshikwe kumupawo mikuli ya shipo sha fulaulo, nabi kumulemya kukumusesa ayi mundetele tununkila kabotu pakutenta.

²⁴ Tamukwe kungulilaawo mafuta anunkila kabotu eetwa ayi kalamasi, nabi kunkwanisha mafuta aswa kumilambu yanu. Sombi mwebo mwakampa mukuli wa shibiibi shanu, ncakwiila shilubo shanu shandemya abuumbi.

²⁵ “Nebo, ee, nebo ndime nshiminganya shibiibi shanu ceebo ca mibo yangu alimwi cakutashiibalukawo tubili.

²⁶ Amwiinduluke mushintu shakalinga kucitika kale kale. Lyalo tubandikile pantu pomwi cikani ico. Amwise mulyaambilile, mutondeshe kubula mulandu kwanu.

²⁷ Amubone mushali wanu mutaanshi wakabisha, bamatanjilili banu bakangashukila.

²⁸ Abalo baleli banu bakabisha musena wangu usalalite. Paceebo ceeco ndakalengesha bene Isilaeli kunyonyoolwa. Ncakwiila ndakalekelesha bantu bangu ayi bacobolwe.”