Isaya 41 - Baibo Busansulushi Bwa Libuku Ili

Kushomesha kwakwe lesa kubene Isilaeli

¹ Lesa waamba ayi, “Amukutumane mukutike kuli ndime mwebo nobamushishi sha muloombe lwa lweenge! Amulibambile kuleta makani anu kunkuta. Amwise mwaambe nobeene shili kumyoyo. Ee, mwise tubandike akubona ululeme.

² “Ngani wakasongaanya shinkusu ulya kuswa kwicwe alimwi akumulengesha kuya cikoma kuli koonse nkweenga waya? Ngani upa nkusu shakukoma bamaami amishobo ya bantu? Ncakwiila mipeeni yakwe ilabalengesha kubabo anga ndusuko. Ee, mata akwe alabalengesha kuululuka anga mbuungu.

³ Ulabakonkela mukuya cibatandaanya kwakubula acakulisukama. Uleenda mumashila ayo ngwaatana kwiindaamo kale.

⁴ Ino ono ngani wakacita shintu shoonse ishi? Ngani wakayeeya kucita boobo kuswa kumatalikilo? Ndimeeke neMwaami Lesa. Kumatalikilo ndakalingaako akwalo kumeelelesho ndaakubaako.”

⁵ “Bantu bamushishi sha muloombe lwa lweenge bakabona nkusu shangu akuloonda. Ndushinisho ndibakashibona bakatutuma. Aboobo boonse babungana akwisa pafwaafwi.

⁶ Womwi awomwi utooyumyayumya mubye akwaambila mwine mishaabo ayi, ‘Yumya moyo!’

⁷ Ucibwene shakupangapanga ulaambila shikufula shintu sha golodi ayi, ‘Wacita kabotu!’ Shikuuma cibumbwabumbwa ansando ayi ceelane akuteshima, ulayumyayumya shikucipopa ayi acinunganye. Na nkutentelela balaamba ayi, ‘Kwabota abuumbi.’ Lyalo cibumbwabumbwa ico balacipopa amisomaali kwaamba ayi ciimikane cakutawa.

⁸ “Sombi mwebo nobene Isilaeli nobasebenshi bangu, nobamulunyungu lwakwe Jakobo, bantu mbondakasala, ee, nobamulunyungu lwakwe Abulaamu mweensuma,

⁹ ndakamukusha kweela lya cishi. Ncakwiila ndakamwiita kuswa kwiine kulaale. Ndakaamba ayi, ‘Mwebo muli basebenshi bangu.’ Ndakamusala alimwi nshikwe kumukaka, sobwe.

¹⁰ Anu aboobo mutaloondi mukwiinga ndi amwebo. Mutoongumani ceebo ndime Lesa wanu. Ndaakumupa nkusu akumucafwa alimwi ndaakumufuna alyaansa lyalulyo liluleme.

¹¹ “Anu boonse bamucenenena, balaakulenshekwa nsoni akusebaanishikwa. Ee, boonse bamulwana palaakubulabo, balaakuloba.

¹² Balwani banu abo mulaakubalangoola, sombi teshi mukababoneewo. Ee, boonse bamulwana palaakubulabo.

¹³ Ceebo nebo ndime Mwaami Lesa, Lesa wanu. Ndime wooyo umucatilila pamaansa anu alulyo akumwaambila ayi, ‘Mutaloondi, ndaakumucafwa.’ ”

¹⁴ Mwaami Lesa Usalalite wa bene Isilaeli waamba ayi, “Mutaloondi nobamulunyungu lwakwe Jakobo nomutacite nkusu anga ncaambo. Mutaloondi nobene Isilaeli nabi muli mushobo uniini mukwiinga nebo nemwiine ndaakumucafwa Nebo neLesa usalalite wa bene Isilaeli ndime mupulusha.

¹⁵ “Ndaakumulengesha kuba anga ncileyi cipya cakulupwishako witi ico cicite meeno apya alimwi akolete. Mulaakulupula tulundu akutunyonyoola. Ncakwiila tulaakuboolabo anga ndusuko.

¹⁶ Lusuko ulo mulaakulutukwita mwiculu mumuuwo awalo muuwo ulaakulutola. Ncakwiila cipuupu cinene cilaakulupalanganya. Aboobo mwebo mulaakusangalala muli ndime neMwaami Lesa ee, mulaakunumbaisha nebo neUsalalite wa bene Isilaeli.

¹⁷ “Bakandu abaabo bataaku mbobabete balalangoola maanshi, ono tabaacaani. Panshingo shabo payuma kunyotwa. Sombi nebo neMwaami Lesa ndaakukumbula kusenga kwabo. Ndushinisho nebo neMwaami Lesa teshi nkabafutatileewo.

¹⁸ Ndaakulengesha mulonga kukunka pakati ka tulundu tutacitewo shisamu. Tuntupu tulaakunookunka maanshi kuya mushinyika. Ndaakulengesha luyanga kuba amashiba mashiba a maanshi. Mulunjumwa mulaakusulabo tuntupu twa maanshi.

¹⁹ Ndaakulengesha shisamu sha sida, akasha, mishikili asha maolifi kumena muluyanga. Ndaakulengesha shisamu sha mapaini kumena kushishi sha kumbo. Ee, shisamu sha mapaini shipusenepusene shilaakumena mumusena womwi.

²⁰ Bantu balaakucibona cikani ici, balaakwishiba ayi ndime neMwaami Lesa ndacicita. Balaakushika pakushinisha kwaamba ayi Lesa usalalite wa bene Isilaeli ngowacilengesha kucitika.”

Mwaami Lesa mbwaakashinina balesa ba bakunsengwe

²¹ Mwaami Lesa, Mwaami wa bene Isilaeli waamba ayi, “Tetetete, kamwisa mulyaambilile nobalesa ba bakunsengwe, amwise mupe bukamboni bunyumfwika.

²² Kamwisa mutulwiite sheshi shikacitike kunembo. Mwise mutulwiite kwaamba ayi tushiyeeye akwishiba ceeco ceshi cikacitike. Mwise musansulule shakacitika kale kale kunkuta alimwi akutulwiita nsheshaamba.

²³ Kamwisa mutwaambile sheshi shikacitike kunshiku sha kunembo kwaamba ayi twishibe ayi ncakwiila muli balesa. Tubone amucitewo cintu comwi cibotu nabi cibiibi kwaamba ayi tukankamane akunyumfwa boowa.

²⁴ Sombi mwebo taaku mbomubete ayalo micito yanu taaku mbweebete. Ncakwiila abalo bamulambila balalensha abunya.

²⁵ “Amunyumfwe, nebo ndasongaanya muntu umwi wa kwicwe. Pakwisa mukumulwana ulaakuswita kumatwa. Lakwe ulalyatoola baleli anga ngamatipa. Ulabalyatoolabo anga ngumubumbi utookanda bulongo.

²⁶ Ono ngani pali ndimwe nobalesa wakalaluka kucitika kwa shintu ishi, kwaamba ayi tumwaambile ayi wakaamba calushinisho? Ncakwiila taaku nabi womwi pakati kanu wakaambaawo nabibo liswi pali ncico. Taaku wakamunyumfwaawo kaamba pacikani ici!

²⁷ Sombi nebo neMwaami Lesa ndime mutaanshi kulwiita bene Siyoni cikani ico. Ndakatuma shinkombe mukulwiita bene Jelusalemu ayi, ‘Bantu bene mishaanu bali munshila! Ee, batooboola uko kumishaabo!’

²⁸ Sombi ndyeenanga pakati ka balesa abo, taaku nabi womwi weenga waambawo pacikani ico. Nabi ndeepusha taaku nabi womwi ukonsha kunkumbula.

²⁹ Balesa boonse aba mbakubeca. Taaku ncebakonsha kucita nabi comwi. Shibumbwabumbwa taaku mboshibete, ngumuuwobo.”