Isaya 40 - Baibo Busansulushi Bwa Libuku Ili

Maswi a kulangila

¹ Lesa wanu waamba ayi, “Amuumbulushe bantu bangu.

² Amuyumyeyumye bantu bangu. Mubaambile ayi bapenga paboneka. Ono shibiibi shabo shalekelelwa. Ncakwiila ndakabapa mulandu kweelana ashibiibi shabo shoonse.”

³ Muntu utokoolobesha ayi, “Muluyanga amubambeemo nshila ya Mwaami Lesa! Ee, amululikile mukwakwa Lesa wesu muluyanga.

⁴ Misena yoonse ikuneme ilaakutuntuka. Tulundu toonse tulaakweelanishikwa ashuulu shoonse shilaakumwayoolwa cakucaalabo anga muliwesa. Misena ya mankununkunu ilaakweelana.

⁵ Lyalo bulemu bwa Mwaami Lesa bulaakuyubululwa. Mpeeke mishobo yoonse ilaakububona. Ee, ceebo Mwaami Lesa mwiine mbwaamba ubo.”

⁶ Liswi lyaamba ayi, “Olobesha.” Anebo ndakakumbula ayi, “Ngolobeshenshi?” Olobesha ayi, “Bantu boonse bali anga mbwiisu, abwalo bulemu bwabo bulibo anga mbwa maluba a muluundu.

⁷ Bwiisu bulayuma aalo maluba alaloka, ceebo muuwo wa Mwaami Lesa washipuupila. Ndushinisho buumi bwa bantu bulibo anga mbwa bwiisu.

⁸ Bwiisu bulayuma aalo maluba alaloka sombi maswi akwe Lesa wesu alaakunooliikobo kwalyoonse alyoonse.”

⁹ Mwebo nomuleta makani abotu muSiyoni, amutante peculu lya kalundu kalaamfu. Mwebo nomuleta makani abotu muJelusalemu, amwaambe cakoolobesha. Amoolobeshe, mutaloondi. Amulwiite ba mumandabala a Juda ayi, “Lesa wanu ngooyu!”

¹⁰ Amubone Mwaami Lesa Shinkusu shoonse utoosa ankusu alimwi lyaansa lyakwe ndyelilela. Ulicite ashilambu mulyaansa lyakwe ayi ese alambule bantu bakwe.

¹¹ Ulaakunoolama litanga lyakwe lya mbelele anga ngumweembeshi. Ulafukatisha twana twa mbelele mumaansaakwe. Ulatunyamwita pacaamba kufwaafwi amoyo. Ashalo mbelele shine twaana uto ulashibinga cakabotu kabotu.

Lesa wa bene Isilaeli taaku ngwaaelenaakwe

¹² Sa kuliiwo muntu weenga wapima maanshi a mulweenge kulupaka? Nabi weenga wapima kukomena kwa liculu alyaansa lyakwe? Sa kuliiwo muntu weenga waleleesha bulongo bwa cishi ca panshi boonse mumutaanga? Ngani weenga wapima tulundu ashuulu pashipimo?

¹³ Anu ngani wakaambilawo Mwaami Lesa cakucita? Ngani weenga wapanda maano Mwaami Lesa?

¹⁴ Nkuli ni Mwaami Lesa nkwaakayawo kale mukwiipusha cikani? Ngani wakamwiishaawo kwaamba ayi abe alushibo ndwaacite? Ngani wakamwiishawo kale ayi eshibe mbwaaelete kucita shintu?

¹⁵ Kuli Lesa mishobo yoonse ilibo anga ngumundoondo wa maanshi mumungomo unene. Balabonwabo anga ntulusuko pacipimo. Ashalo nsumbu nshuububo anga ntulusuko.

¹⁶ Shisamu sha kuLebanoni shaceyabo kulaale kuba nkuni sha pacipaililo cakwe. Abalo banyama baliimo baceyabo kulaale kubenga milambu yakutenta kuli nguwe.

¹⁷ Ncakwiila kuli nguwe mishobo imwi yoonse taaku amboibeteewo. Ee, taaku amboibete kuli nguwe alimwi teecite ncito.

¹⁸ Anu ono Mwaami Lesa inga mwamweelanisha ani? Ncikoshanyonshi nceenga mwamweelanika ancico?

¹⁹ Amubone, calo cibumbwabumbwa ngumuntu ucipanga. Lyalo ucibwene kupangapanga sha golodi ulacinanika golodi akucipangila ncetani sha silifa.

²⁰ Mukandu utakoonshi kuula silifa nabi golodi, ulasala cisamu ceshi cikabule kubola. Ulalangoola muntu ucibwene shakubesabesa kwaamba ayi amupangile cibumbwabumbwa ceshi cikabule kuwa.

²¹ Sa tamwishi? Sa tamukwe kunyumfwaawo? Sa tamukwe kushimikilwaawo kuswa kumatalikilo? Ee, sa tamukwe kunyumfwaawo kuswabo cishi ndicakalengwa?

²² Mwaami Lesa ulicite cuuna cakwe ca bwaami mwiculu peculu lya cishi ca panshi. Bamucishi ca panshi balaboneka anga ntulongolo. Liculu ulalifungululabo anga ncisani cakushitilishishaako. Ncakwiila ulalifungululabo anga nitente yakwikalaamo.

²³ Banaabaami ngoobanyaya bulemu bwabo akubalengesha kuba mbuli bamwi boonse. Baleli ba pacishi ca panshi ngoobafuula bwaami bwabo.

²⁴ Ndibabikwabikwabo pabwaami, ee, ciindi ndibasalwasalwabo, bwaami bwabo kabutana kushimpa bunene, ulabafulita muuya wakwe, lyalo balamana nkusu anga mbwiisu. Ncakwiila kapupuulwa kalaboolulusha anga mbuungu.

²⁵ Usalalite waamba ayi, “Anu nebo inga mwanjelanisha ani? Anu ngani uli mbuli ndime?

²⁶ Amwiinune mitwi akulanga kwiculu. Ngani wakalenga shintu shoonse ishi shiliimo? Bana ndime alimwi ndime ŋensha nyenyeenshi anga ndikoto lya bashilumamba. Nyenyeenshi yomwi ayomwi ndiishi liina lya njiyo. Ceebo ca nkusu shangu shinene alimwi abulemu, taaku nyenyeenshi nabi yomwi yakasoweka.”

²⁷ Ono ceebonshi nobamulunyungu lwakwe Jakobo mulaamba ayi, “Mwaami Lesa taabwene mapensho esu?” Ceebonshi mulatongooka ayi, “Lesa taabikiiko amaano kuli ndiswe nabi katulyatililwa?”

²⁸ Sa tamwishi? Sa tamukwe kunyumfwaawo kale? Mwaami Lesa ngoLesa wamuyayaya uyo wakalenga cishi ca panshi coonse. Taaleemi nabi kukopoka alimwi taaku ukonsha kwishiba peela miyeeyo yakwe.

²⁹ Lakwe ngoopa nkusu kubabo bakopoka, alimwi ngoofushisha nkusu abo balefukite.

³⁰ Amubone, nabi bacikula bwangu balakopoka. Ncakwiila nabi bacikula bwangu basankwa balalisuntula akuwa.

³¹ Sombi bacinkite manungo muMwaami Lesa, balaakunoopekwa nkusu shipya paciindi aciindi. Balaakunooya cuulukoolukabo anga ngumumbankwashi. Balaakunoocica, sombi teshi bakanookopokaawo. Balaakunokweendaana, sombi teshi bakanoowisukaawo kukulema.