Isaya 4 - Baibo Busansulushi Bwa Libuku Ili

¹ Muciindi ico, banakashi bali bosanwe abobilo balaakucata musankwa womwi akwaamba ayi, “Swebo tunanoolilisha akulifwalika sobeene, ncetutoosengabo nkwaamba ayi mube beebeesu, lyalo musebaanyo wabushike umane pali ndiswe!”

Ndabala ya Jelusalemu mbweshi ikabe abulemu alimwi

² Ciindi cilaakushikila Musampi wa Mwaami Lesa ndyeshi ukabote akuba abulemu. Lyalo nsheshi shikanooswa mubulongo bwa cishi ico, shilaakusangalasha akuletela bulemu bene Isilaeli abo beshi bakacaale mboomi.

³ Bantu boonse beshi bakacaale muSiyoni, ee, muJelusalemu, balaakunokwiitwa ayi balisalalite.

⁴ Mwaami Lesa ulaakusansha bubi bwa banakashi bene Siyoni. Ulaakusansha ashibala shibala sha bulowa mundabala ya Jelusalemu. Ishi ulaakushicita kwiinda mukusebensesha muuya wakoombolosha amuuya usalasha wa mulilo.

⁵ Mpeeke Mwaami Lesa ulaakutuma paKalundu ka Siyoni koonse apabantu baliimo likumbi lya bwiishi malumwi acibalankuni ca mulilo mashiku. Peculu lya ndabala yoonse palaakuba bulemu bwa Mwaami Lesa.

⁶ Malumwi bulemu bwakwe ubo bulaakuba cimfule cakuyubamo lumwi alimwi mulaakuba momwakuyunsa mfula acipuupu cinene.