Isaya 38 - Baibo Busansulushi Bwa Libuku Ili

Mwaami Esekiya mbwaakaciswa akuba kabotu

¹ Muciindi ico ceenka mwaami Esekiya wakaciswa cakufwabo. Lyalo Isaya mulaluki mwanaakwe Amosi wakaya mukumubona. Mpeeke wakamulwiita ayi, “Mwaami Lesa waamba ayi, ‘Bamba kabotu shintu shako shoonse mukwiinga teshi upuluke. Libambile kufwa.’ ”

² Esekiya wakasanduluka walanga kulubumbu akupaila ayi,

³ “NoBaami baLesa, amwiingashile kwaamba ayi ndakalinga kumusebensela cakushomeka alimwi camoyo woonse. Lyoonse ndakalinga kucita shintu nshemwakalinga kusuni ayi ncite.” Kuswawaawo wakalila abuumbi.

⁴ Mpeeke Mwaami Lesa wakaambila Isaya ayi,

⁵ “Boola kuli Esekiya, uye umulwiite ayi, ‘Nebo neMwaami Lesa, Lesa wakwe Defedi mushali wako mukulukulu, ndanyuumfwa mupailo wako akulila kwako. Ndaakukunungilaako myaaka ili likumi ayosanwe.

⁶ Ndaakufuna ndiwe andabala ya Jelusalemu kumwaami wa bene Asilya. Ncakwiila ndaakunooifuna lyoonse.’ ”

⁷ Lyalo Isaya wakaamba ayi, “Mwaami Lesa utookupa citondesho kwaamba ayi ulaakucita kweelana akushomesha kwakwe.

⁸ Utoolengesha cimfule ca pacitantilo cakapanga mwaami Aasi kusena kwisule matantilo ali likumi.” Lyalo cimfule cakasena kwisule matantilo ali likumi.

⁹ Mwaami Esekiya ndyaakaba kabotu kuswa kubulwashi bwakwe, wakalemba lwiimbo lwakulumbaisha ulu ayi,

¹⁰ “Ndakalinga kuyeeya ayi ntoofwa kaanciliimobo, Ee, ndakalinga ntooya kumusena wa bafu kaantana kukwanisha myaaka ya buumi bwangu.

¹¹ Ndakalinga kuyeeya ayi bulya nebo taaku kubonanaawo aMwaami Lesa, ee, kubonanaawo anguwe mucishi cino ca boomi. Abalo bantu bacili boomi nebo taaku kubonanaabo tubili nabi kwikala pakati kabo mucishi cino.

¹² Buumi bwangu bwakasutulwa anga nitente yamwayululwa nabi anga ncisani casutulwa kucakutungisha. Ncakwiila ndakalinga kuyeeya ayi Lesa utoomanisha buumi bwangu.

¹³ Ndakalinga kulangila kushikila kumuyamaca, sombi bweenka bucita nkalamu wakalinga kutyoloola mafuwa angu, cakwaamba ayi mashiku amalumwi ndakalinga kuyeeya ayi utoomanisha buumi bwangu.

¹⁴ Liswi lyangu lwakaceya ceebo cakushinka, alimwi ndakalinga kulila anga nimpolobe. Aalo meenso angu ashimba kukulanga kwiculu. Amumfuune noBaami baLesa, ndi mumapensho.”

¹⁵ Ono nebo inga ndaambanshi? Mwaami Lesa mwiine waamba anebo alimwi ngwaacita bobulya. Anu nebo ndanokweenda cakulibombya kwabuumi bwangu boonse ceebo ca mapensho aya ali mumoyo wangu.

¹⁶ NoBaami baLesa shintu sha mushobo uyo nsheshipa buumi kubantu. Ncakwiila anebo ndacana buumi muli nshisho. Mwakanjumya kuswa mukuciswa akuncafwa kwaamba ayi noocibukila buumi.

¹⁷ Ndushinisho kupenga nkondeendaamo kwandetela mpindu. Kwiinda mulusuno lwanu mwakamfuna ayi ntayi mucilindi cakunyonyooka. Kuswawaawo mwalekelela shibiibi shangu shoonse akushiluba.

¹⁸ Uli mucuumbwe taakoonshi kumulumbaisha, ee, ufwite taakoonshi kwiimba nyimbo shakumulumbaisha. Ncakwiila abo baya kumusena wa bafu, tabakoonshi kucinka manungo mukushomeka kwanu.

¹⁹ Anu boomi, ee, boomi mbobamulumbaisha bweenka mboontoomulumbaisha bulya. Bamashali balaambila bana babo shakushomeka kwanu.

²⁰ “NoBaami baLesa mwampulusha. Aboobo tulaakunokwiimba nyimbo shakumulumbaisha akulisha tulumbu kwanshiku sha buumi bwangu shoonse muŊanda yanu noBaami baLesa.”

²¹ Mukwaamba ayi abe kabotu Isaya wakaamba ayi babike mashina a mukuyu pacuute cakwe, lyalo utooba kabotu.

²² Mpeeke Esekiya wakeepusha Isaya ayi, “Citondeshonshi nceshi mbone kwaamba ayi ndaakuba kabotu akuya kuŊanda yakwe Lesa alimwi?”