Isaya 37 - Baibo Busansulushi Bwa Libuku Ili

Mwaami mbwaakeepusha bwakucita kuli Isaya

¹ Mwaami Esekiya ndyaakanyumfwa makani ayo, wakakwamoona shakufwala shakwe kubuumba, wafwala lisaka akuya kuŊanda yakwe Lesa.

² Wakatuma Eliyakimu uyo wakalinga kweendelesha ŋanda ya bwaami, Shebina uyo wakalinga mulembi abapailishi banene kumulaluki Isaya mwanaakwe Amosi. Abalo bakalinga kufwete masaka.

³ Isaya bakamulwiita ayi, “Mwaami Esekiya waamba ayi, ‘Sunu mbushiku bwa buumba, mapensho alimwi bwa nsoni. Twaba anga ngumwanakashi usuni kutumbuka, sombi wabula nkusu shakutumbuka.

⁴ Mwaami wa bene Asilya watuma mutanjilili wa bashilumamba bakwe kwisa mukucobola Lesa muumi. Mwaami Lesa, Lesa wako aanyumfwe mucobwe uyo akupa mulandu abo boonse bacobola. Aboobo amupaile kuli Lesa pabantu besu abo bacaalaawo.’ ”

⁵ Isaya ndyaakanyumfwa makani aya,

⁶ wakakumbula ayi, “Mwaambile mwaami wanu ayi Lesa waamba ayi, ‘Utaloondi ceebo ca maswi akuncobola ayo aleta beshinkombe ba mwaami wa bene Asilya.

⁷ Kutika! Ndaakulengesha mwaami wa bene Asilya kukutika makani ayo eshi akamubooshe kumishaabo. Lyalo kweenka uko ndaakumucaisha kumupeeni.’ ”

Bene Asilya mbobakatuma nkombe imwi kuli Esekiya

⁸ Mutanjilili wa bashilumamba ba bene Asilya wakanyumfwa ayi mwaami wa bene Asilya waswa kuLakishi mukulwana ndabala ya Libina iyo yakalinga pafwaafwi. Mpomunyaawo wakaya uko mukumwiipusha shakucita.

⁹ Liswi lyakanyumfwika kubene Asilya ayi bashilumamba bene Ijipiti, abo batanjililwa aTewaka mwaami wa bene Kushi bali munshila kwisa mukubalwana. Mpeeke mwaami wa bene Asilya ndyaakanyumfwa makani aya, wakatuma nkalata kuli Esekiya mwaami wa bene Juda.

¹⁰ Wakeelemba ayi, “Lesa ngootooshoma wakwaambila ayi teshi ukaabwe mumaansaangu. Ono ico citakucenjeeki.

¹¹ Webo wakanyumfwawo kale bamaami ba bene Asilya mbobacita kucishi ico ncaapinga kunyonyoola. Ono sa webo inga wapulushikwa?

¹² Bamashali bangu bakulukulu bakanyonyoola ndabala ya Gosani, Alani alimwi aya Lesefi. Bakacaya bene Edeni bakalinga kwikala muTelasa. Tekwakalinga lesa wabo nabi womwi wakalinga kukonsha kubapulusha.

¹³ Mwaami wa ndabala ya Amati, Apadi, Sefafaimu, Ena alimwi aya Ifa bali kuli?”

¹⁴ Mwaami Esekiya wakabwesa nkalata kubeshinkombe akwiibelenga. Lyalo wakaya kuŊanda yakwe Lesa, weebika pameenso a Mwaami Lesa

¹⁵ akupaila ayi,

¹⁶ “NoBaami baLesa beShinkusu shoonse, baLesa ba bene Isilaeli, ee, nomucite cuuna ca bwaami pakati ka bakelebu, mwebo nweenka ndimwe baLesa abo balela malelo oonse a pacishi ca panshi. Mwakalenga liculu acishi ca panshi.

¹⁷ Ono noBaami baLesa boomi, amutukutike akubona shintu shoonse shitoocitika kuli ndiswe. Amukutike shintu shoonse Senakelibu nshaatokwaamba mukumucobola mwebo nobaLesa boomi.

¹⁸ NoBaami baLesa, soonse tulishi kwaamba ayi bamaami ba bene Asilya bakanyonyoola shishi shiinji cakucaalabo matongo.

¹⁹ Bakatenta balesa babo boonse mukwiinga tebakalinga balesa bancinencine. Sombi bakalinga nshisamu shakabeswa amabwe akabeswa amaansa a bantu.

²⁰ Ono noBaami baLesa, baLesa besu, amutufuune kuswa kubene Asilya, kwaamba ayi mishobo yoonse ya mucishi ca panshi ikeshibe ayi mwebo noBaami baLesa ndimwebo baLesa.”

Maswi akatuma Isaya kumwaami

²¹ Lyalo Isaya mwanaakwe Amosi wakatuma nkombe kuli Esekiya yakwaamba ayi, “Mwaami Lesa, Lesa wa bene Isilaeli waamba ayi, ‘Ndanyuumfwa mupailo wako pali Senakelibu mwaami wa bene Asilya.’

²² Mwaami Lesa waamba ayi, ‘Senakelibu, ndabala ya Siyoni itookusebaanya akukuseka. Ndabala ya Jelusalemu itoopukumuna mutwi mbuli mbootoocica.

²³ Ngani ngowalinga kutukana akucobola? Ngani ngootookalookila akusaamuna meenso cakulisumpula? Sa te ngooyo Usalalite wa bene Isilaeli?

²⁴ Kwiinda mubeshinkombe bako walundika matushi pali ndime neMwaami Lesa.’ Wakaamba ayi, ‘Ndatanta tulundu ashikoci shiinji, ee, ndatanta atulundu tulaamfu twa mucishi ca Lebanoni. Ndakatimboola shisamu sha sida shilaamfu alimwi ashisamu sha mapaini shiindaawo kubota. Ndakashika kweela misaansa ya ncico, ee, mukati mumisaansa iindaawo kubota.

²⁵ Ndakakaba mikalo mushishi sheensu akunwaamo maanshi. Mutulonga toonse mucishi ca Ijipiti mondakeenda amyeendo yangu ndakatuyumya.

²⁶ “ ‘Sa tookwe kunyumfwaawo? Sa tooshi ayi ici ndakacibambabo kale kale? Ncakwiila ici ndakalengesha ayi cicitike. Ndakakupa nkusu shakunyonyoola mandabala acite malinga kuba matongo.

²⁷ Bantu ba mumo tebakalinga kucite nkusu, bakaloonda abuumbi akulenshekwa nsoni. Bakababo anga ninsaku mumyuunda nabi bwiisu butoomena paciluli shiyuma muciindi ciniinibo na muuwo ulungula wesa.

²⁸ “ ‘Sombi mpookala ndishiiwo, ndishi ndyooya nabi ndyoosa alimwi ambooncobola webo.

²⁹ Ono ceebo cakwaamba ayi wancobola alimwi ndanyuumfwa shakubula bulemu kwako, ntoobika ndobo munshono yako alimwi anshimbi yangu mukanwa mwako. Lyalo ndaakukulengesha kuboola kumishaanu anshila yeenka njewakesitaamo.’ ”

³⁰ Mpomunyaawo Isaya wakaambila mwaami Esekiya ayi, “Citondesho ca ceeco ceshi cikacitike nceeci. Mwaaka uno mulaakulya shilimenena. Mwaaka utoosa mulaakulya sheshi shikalimenene kuswa kuli nshisho, sombi mumwaaka watatu mukashange akutebula, mukashange myuunda ya minyansa akulyaako shisepo.

³¹ Abo beshi bakacaaleewo mumukowa wakwe Juda, balaakuba anga nshishango shatola miyanda panshi peene akucata shisepo.

³² Ceebo muJelusalemu mulaakuba bantu beshi bakacaaleewo. Ncakwiila kuKalundu ka Siyoni kulaakuswa likoto lya beshi bakapuluke. Nkusu sha Mwaami Lesa Shinkusu shoonse nsheshi shikashiciite.

³³ “Aboobo pamwaami wa bene Asilya, Mwaami Lesa waamba ayi, ‘Teshi akenjilewo mundabala inene ino, nabi kuwaala mufwi muno nabi womwi. Teshi akese aliyawo kundabala inene ino nabi kushingulusha mukuti wakutantilaawo kulubumbu.

³⁴ Ulaakuboolela anshila yeenka njaakesitaamo, ncakwiila teshi akenjileewo mundabala ino. Nebo neMwaami Lesa, ndaamba.

³⁵ Ndaakutabilila ndabala inene ino akwiipulusha, ceebo ca bulemu bwangu acakwe Defedi musebenshi wangu.’ ”

³⁶ Lyalo munjelo wa Mwaami Lesa wakaya kumisumba ya bene Asilya akucaya bashilumamba bali 185,000. Kumuyamaca bantu ndibakabuka bakacanabo mituntu apa apapalya!

³⁷ Lyalo Senakelibu mwaami wa bene Asilya wakamwaya misumba akuboolela kuNinife.

³⁸ Bumwi bushiku ndyaakalinga kulambila kuli Nisiloku lesa wakwe, Adilameleki alimwi aSalesa, bana bakwe basankwa, bakamucaya amipeeni yabo. Lyalo bakacicila kucishi ca Alalati. Mpeeke Esaadoni, mwanaakwe musankwa umwi ngowakapyana bwaami bwakwe.