Isaya 36 - Baibo Busansulushi Bwa Libuku Ili

Bene Asilya mbobakatuma beshinkombe kundabala ya Jelusalemu

¹ Mumwaaka walikumi amyaaka yone wa bwaami bwakwe Esekiya, Senakelibu mwaami wa bene Asilya, wakaya mukulwana mandabala anene akalinga kucite malinga a bene Juda akwaakoma.

² Lyalo Mwaami wa bene Asilya wakatuma mutanjilili wa bashilumamba pantu pomwi abashilumamba baanji baanji kuswa kuLakishi kuya kuJelusalemu ayi bakaambile mwaami Esekiya ayi alyaabe mumaansa a bene Asilya abo. Mpeeke mutanjilili wa bashilumamba uyo wakeemikana mumukwakwa uyo beshikutunga nsalu mobakalinga kusebensela, pafwaafwi amufolo wakalinga kuleta maanshi kuswa kucishiba ca peculu.

³ Lyalo bacinenenene bakwe Esekiya botatwe bakaya mukubakumanya. Pakalinga Eliyakimu mwanaakwe Ilikiya uyo wakalinga kweendelesha ŋanda ya bwaami, Shebina uyo wakalinga mulembi alimwi aJowa mwanaakwe Asafu uyo wakalinga mulembi wa makani a buleelo.

⁴ Mpomunyaawo mutanjilili wa bashilumamba umwi wa bene Asilya wakabaambila kulwiita Esekiya ayi, “Mwaami shinkusu wa bene Asilya waamba ayi, ‘Nciinshi citookupamya?

⁵ Sa utooyeeya ayi maswi inga eelana alushibo lwa nkondo alimwi ankusu? Ngani ngootooyeeya ayi inga wakucafwa kubukila bene Asilya?

⁶ Webo utooyeeyela kucafwikwa kubene Ijipiti. Ico inga caba anga nkushimpila kulitete pakweenda. Litete ilyo inga lyatyoka akukuyasa mulyaansa omwiine. Anu ubo mwaami wa bene Ijipiti mbwaabete na muntu wacinka manungo muli nguwe.’ ”

⁷ Mutanjilili mwine Asilya wakatolelela kwaamba ayi, “Sa utooyanda kundwiita ayi Mwaami Lesa, Lesa wako ngooncinkitemo manungo? Sa teshi ngomwine misena yakulambililaako ya patulundu alimwi ashipaililo shakwe isho Esekiya nshaakanyonyoola ndyaakaambila bene Juda abene Jelusalemu kunoolambililabo kucipaililo comwibo kuJelusalemu?

⁸ Kosa tunyumfwane muliina lya mwaami wa bene Asilya. Ntookupa maaki ali 2,000 na ucane bantu beenga baatanta!

⁹ Webo tookoonshi kukoma aweelaako pabacinenenene ba bene Asilya, nakubi boobo utooyeeya ayi bene Ijipiti bakutumine shikoci abeshikulwanina pamaaki!

¹⁰ Sa utooyeeya ayi inga ndesa mukulwana cishi cako akucinyonyoola kwakubula liswi kuswa kuMwaami Lesa? Mwaami Lesa mwiine ngowakandwiita ayi nse ndwane cishi cako akucinyonyoola.”

¹¹ Lyalo Eliyakimu mwanaakwe Ilikiya, Shebina alimwi aJowa bakalwiita mutanjilili uyo ayi, “Kamutwaambila muciAlamaiki mukwiinga acalo tulacinyumfwa. Mutanootwaambila muciEbulu ceebo bantu boonse bali kulubumbu batoonyumfwa.”

¹² Mutanjilili uyo wakakumbula ayi, “Sa mutooyeeya ayi mwaami wangu wantuma ayi nse ŋambe makani aya kuli ndimwebo amwaami wanu? Sobwe, ntoolwiita abantu bashiite palubumbu abo beshi bakalye tushi akunwa mikonso yabo beene bweenka mbuli ndimwe.”

¹³ Mpomunyaawo mutanjilili uyo wakanyamuka akoolobesha muciEbulu ayi, “Amukutike mbwaatokwaamba mwaami shinkusu wa bene Asilya!

¹⁴ Utoomucenjesha ayi, ‘Esekiya atamubeeci. Ncakwiila Esekiya taakoonshi kumupulusha kuswa kumaansaangu.

¹⁵ Atamuyungooli ayi mucinke manungo muMwaami Lesa. Mutanooyeeya ayi Mwaami Lesa ulaakumufuna nabi kukasha likoto lya bashilumamba bene Asilya kubwesa ndabala yanu.’

¹⁶ Mutakutiki shitokwaamba Esekiya. Mwaami wa bene Asilya waamba ayi musweemo mundabala iyi akulyaaba mumaansaakwe. Lyalo mulaakusuminishikwa kunoolya minyansa kushisamu shanu, ankuuyu kushisamu shanu alimwi akunwa maanshi kuswa mumikalo yanu nobeene.

¹⁷ Mulaakunoocita boobo kushikila mwaami wa bene Asilya akamukalike mucishi ico cili anga ncishi canu, uko kuli minyansa yakutyanako waini alimwi kuli ashili anga ngamaila shakupangisha shinkwa.

¹⁸ Esekiya atamubeeci ayi Mwaami Lesa ulaakumupulusha. Sa balesa ba mishobo imwi bakafunawo kale shishi shabo kuswa kumwaami wa bene Asilya?

¹⁹ Ino balesa bakwe Amati alimwi aAlipadi bali kuli cino ciindi? Ino balesa bene Sefafaimu bali kuli? Sa kuliiwo wakapulusha Samaliya?

²⁰ Ngani pabalesa ba mushishi ishi bakakonsha kufuna cishi cabo kuswa kumwaami wesu? Ono nciinshi ncemutooyeeyela ayi Mwaami Lesa inga wafuna Jelusalemu?”

²¹ Sombi bantu bakoomunabo tontolo bweenka mwaami Esekiya mbwaakabaambila. Tabakwe kwaambaawo nabibo liswi.

²² Lyalo Eliyakimu mwanaakwe Ilikiya uyo wakalinga kweendelesha ŋanda ya bwaami, Shebina uyo wakalinga mulembi alimwi aJowa mwanaakwe Asafu uyo wakalinga mulembi wa makani a bulelo bakakwamoona shakufwala shabo kubuumba. Mpeeke bakaya mukulwiita mwaami Esekiya isho shakaamba mutanjilili wa bashilumamba ba bene Asilya.