Isaya 34 - Baibo Busansulushi Bwa Libuku Ili

Mwaami Lesa mbweshi akape mulandu balwani bakwe

¹ Mwebo nobaswamashi noonse. Amusene pafwaafwi alimwi akuteya matwi. Amukutikishe mwebo nomishobo imwi yoonse. Ee, cishi coonse cinyumfwe ashintu shoonse shikalaamo!

² Mwaami Lesa wakalalila baswamashi boonse, bukali bwakwe buli pamakoto abo oonse a bashilumamba. Boonse ulaakubanyonyoola cakumaninina. Ulaakubaaba ayi bacaikwe.

³ Bantu babo beshi bakacaikwe balaakusowekwabo, mituntu yabo ilaakunoonunka cilensha bunya. Tulundu tulaakubabo lololo kubulowa bwabo.

⁴ Lyalo nyenyeenshi shoonse sha kwiculu shilaakusunguluka, alyalo liculu lilaakufungeelwabo anga nimpasa. Shoonse shibala mwiculu shilaakumana kuloka. Shilaakunoolokabo anga ngamatewu a cisamu ayuma, nabi anga ninkuyu shanyana shitooloka kucisamu.

⁵ Ono mupeeni wangu neMwaami Lesa walibambila kale kunyonyoola. Ncakwiila ulaakwisa mukupa mulandu bene Edomu, bantu abo mbondakaamba cakushinisha ayi balyeelete kunyonyoolwa.

⁶ Mupeeni wa Mwaami Lesa ulaakupila mumalowa. Ee, ulaakufwekeleshekwa amafuta abo, kufwekeleshekwa bweenka mupeeni mbooba kubulowa bwa mbelele ampongo, alimwi akumafuta a kunsa sha mbelele shisankwa. Ceebo Mwaami Lesa ulaakubenga mulambu mundabala ya Bosila. Ee, muEdomu mulaakuba kucaikwa kuyoosha.

⁷ Ubo bushiku abo baambwa ayi ninyati sha bantu balaakufwitabo pantu pomwi ambabo. Ee, kufwita pantu pomwi abaabo bacite nkusu anga mbacende baana nabi bacende banene. Cishi cabo cilaakunoolibo tontolo kumalowa, ncakwiila bulongo boonse bulaakunoolibo lololo kumafuta.

⁸ Ndushinisho Mwaami Lesa ulicite bushiku mbwaatooyanda kuboosha cishole, bushiku bwakulambula bubi mukufuna ndabala ya Siyoni kubalwani ba njiyo.

⁹ Maanshi a mutulonga alaakwaaluka manenekela, abwalo bulongo bulaakwaaluka salufa. Cishi cabo coonse cilaakubabo linyaku lya mulilo wa manenekela!

¹⁰ Mulilo uyo ulaakunoonyakabo mashiku amalumwi, abwalo bwiishi bwa nguwo bulaakunoosuntabo kwalyoonse alyoonse. Cishi ico cilaakunoolibo mumatongo kuswa kulishalane akulishalane. Taaku muntu nabi womwi weshi akeendemo tubili mucishi ici.

¹¹ Bakapwa amakwiikwi nsheshi shikanookalaamo. Bamwiina abo pantu pomwi abacikwangala balaakunoopangamo shiinswa.

¹² Bacinenenene teshi bakasalewo tubili mwaami umo ceebo banaabaami boonse ba mumo balaakukushikwaamo.

¹³ Mushiyubilo shabo sha nkondo mulaakwisulabo shisamu sha myuumfwa. Mumandabala abo acite malinga mulaakumena tukoloŋonso. Ncakwiila cishi cabo cilaakubabo musena wa bamwaaba akubabo maanda a bamwiina.

¹⁴ Banyama bamuluundu balaakunokwiingookabo umo. Abalo bashikaswa balaakunokwiitana ayi banookalaamo alimwi ndushinisho balaakucana misena yakookesheshaamo.

¹⁵ Mwiina ulaakuyaka ciinswa umo akushala mayi. Ulaakwaakonkola akulela twana twakwe mweenka umo. Aalo makubi alaakwisa obilo obilo akabunganeemo, nkokwaamba ayi lisankwa alyanakashi.

¹⁶ Amulangoole Libuku lya Mwaami akubelengaamo. Lilaamba ayi, “Pashilengwa ishi taaku nabi comwi ceshi cikaluube alimwi taaku nabi comwi ceshi cikabule cibye kwaamba ayi kashishalana. Ceebo nguMwaami Lesa mwiine waamba ayi cibe boobo alimwi Mushimu wakwe washibunganya pantu pomwi.

¹⁷ Ndushinisho mwiine ngweshi akashibunganye. Ee, ngowashibaanya cishi ico. Lyaansa lyakwe mwiine ndilyacibaanya mushipansha shipimitwe. Cishi ico cilaakuba ca nshisho kwamuyayaya. Shinanookalaamo kuswa lishalane alishalane.”