Isaya 33 - Baibo Busansulushi Bwa Libuku Ili

Mupailo wakusenga lucafwo

¹ Mapensho kuli ndiwe oshikunyonyoola, ee, webo nootana kunyonyoolwaawo. Mapensho kuli ndiwe oshikwaaba bantu ee, webo nootana kwaabwaawo. Waakucileka kunyonyoola, ulaakunyonyoolwa. Waakucileka kwaaba bantu, ulaakwaabwa.

² NoBaami baLesa amutunyumfwile luse mukwiinga taaku aumwi ngotucinkitemo manungo. Kamutupa nkusu macuunsa lyoonse akuba bapulushi besu ciindi ndituba mumapensho.

³ Paciindi liswi lyanu ndyeliluluma, mishobo ya bantu ilacica. Na mwakalala akunyamuka, mishobo imwi ilamana kupalangana.

⁴ Shintu shisaalwa sha bamumishobo shilabwesekwa cakumaninina anga ncisoshi ceenda mumuunda. Ncakwiila balwani babo boolukila shintu isho anga ncisoshi.

⁵ Mwaami Lesa ulalemekwa abuumbi, mukwiinga ngoolela mishobo yoonse. Ncakwiila ulaakususha bululami akoombolosha cakutanyengelela mundabala ya Jelusalemu.

⁶ Ulalengesha mushobo wa bantu kutatenkaana. Ulatabilila bantu bakwe akubapa busongo alushibo. Buboni bwa shintu shoonse ishi inga babucanabo kwiinda mukumuloonda.

⁷ Amubone, bantu babo batacite boowa batokoolobesha mumikwakwa. Beshikwiimikanina babo abo bakaya mukusenga luumuno batoolila abuumbi.

⁸ Mikwakwa inene yacaalabo bwaashi. Ncakwiila taamu beshikweenda baliimo. Cipangano capwaikwa, bakamboni ba ncico banyanshikwa. Taaku nabi womwi ulemekwa.

⁹ Myuunda ya cishi yacaala ilishiitebo alimwi mumatongo. Misaansa ya Lebanoni yamana kuyuma Cinyika ca mboleshi ca Shalino cababo anga nduyanga. MuBashani apaKalundu ka Kamelo matewu atoolukumukaako kushisamu.

Mwaami Lesa utoocenjesha balwani bakwe

¹⁰ Mwaami Lesa utokwaamba ayi, “Ono ntoonyamuka, ee, ntoomutondesha nkusu shangu. Lyalo ntooba abulemu.

¹¹ Mulapangana shifwite alimwi shoonse nshemucita taaku mboshibete. Ncakwiila mulalinyonyoola nobeene.

¹² Bantu balaakupya anga ngamalasha asekesa, ee, cakubabo anga njimyuumfwa yalokota kuba milota.”

¹³ Mwebo nomuli kulaale, amunyumfwe nshendacita. Amwebo nomuli pafwaafwi noonse amwishibe nkusu shangu.

¹⁴ Bamucita shibi muSiyoni baloonda, ee, batalemeki Lesa batootutumabo kuboowa. Batokwaamba ayi, “Anu ngani pakati kesu weenga wapuluka mumulilo ulya unyonyoola? Anu ngani pakati kesu weenga kaacili muumi mumulilo utamaani?”

¹⁵ Ngooyo weenda cakubula kampenda akwaamba shintu shiluleme. Ngooyo ukaka mpindu yabupambi, utasuni kutambula makulo utasuni kuteya matwi kubaabo bapangana shabucayi alimwi utasuni kulansha meenso akwe pabubi.

¹⁶ Uyu ngomuntu weshi akabule cakulisukama. Uyo ulaakunoolibo anga ngumuntu ucite ciyubilo pakalundu. Ulaakunoopekwa shakulya aalo maanshi teshi akamumanineewo.

Nshiku shitoosa sha bulemu

¹⁷ Lyalo muntu uyo ulaakubona mwaami mubulemu bwakwe alimwi ulaakubona acishi citandabukite mumbasu shoonse kulaale.

¹⁸ Mumyoyo yanu mulaakunokwiibaluka shintu isho shakalinga kumulengesha boowa. Mulaakunooliipusha ayi, “Ino mutanjilili wa bashilumamba ulya uli kuli? Ino ulya wakalinga kuya cibwesa musonko uli kuli? Ino shilumamba weendelesha maanda alaamfu abeshikulindilila uli kuli?”

¹⁹ Anu bantu boonse aba balinaamuna teshi mukababonewo tubili. Ee, aba boonse baamba cishobo ciyumu, ncakwiila cishobo ceensu alimwi citanyumfwiki.

²⁰ Amulangilishe paSiyoni ndabala yakusekelela kupa bulemu kuli Lesa. Ndabala ya Jelusalemu mulaakwiibona ameenso anu. Nindabala ya luumuno iyo ili anga nitente icatite cankusu. Nitente icite mpoopo shitakoonshi kushuka alimwi antaambo shitakoonshi kusutuka napaceyi.

²¹ Mwaami Lesa ngoShinkusu wesu mundabala iyo. Ilaakuba musena wa milonga inene atulongabo. Sombi maato a balwani teshi akanokwiindaawo, aalo anene eenda palweenge teshi akeendeewo.

²² Ceebo Mwaami Lesa ngomoomboloshi wesu, Mwaami Lesa eenka uyo ngooshikutupa milawo alimwi Mwaami Lesa ngweeke ngomwaami wesu. Ncakwiila ngweeke ngweshi akatupulushe.

²³ Intambo sha maato a balwani shasutooka, cisamu cicata shisani shakweensheshako bwaato citooshunkuma, ashalo shisani shakweensheshako bwaato tashitoofunguluka. Paceebo ceeco shintu nsheshi tukasaale shilaakufula abuumbi cakwaamba ayi pakubaana, abalema boonse balaakubwesaako.

²⁴ Lyalo mundabala ya Siyoni teshi mukanyumfwikewo mulwashi. Shibiibi sha baabo bekala mundabala iyo, shilaakulekelelwa.