Isaya 32 - Baibo Busansulushi Bwa Libuku Ili

Mwaami wabululami

¹ Amubone kulaakuba mwaami weshi akanoolela cabululami. Abalo beendeleshi balaakunokweendelesha cakutanyengelela.

² Womwi awomwi pakati kabo ulaakuba anga cakulishitilishaako muuwo, nabi anga ncakulishitilishaako cipuupu. Balaakuba anga nkalonga muluyanga nabi anga ncimfule ca mwaandami unene muliwesa.

³ Lyalo meenso a baabo balasha teshi akanoobula kubona. Ncakwiila matwi a baabo banyumfwa teshi akanooshinkite.

⁴ Tulango twa beshikubilima tulaakuba tulango tuyeeya alimwi tucite lushibo. Ayalo milaka icite tumaama ilaakuba kabotu akutalika kukonkabo kabotu.

⁵ Taaku weshi akanoociita baluya ayi nkumenkume. Nabi kupa bulemu bantu beshishimfulunganya.

⁶ Ceebo muluya ulaambabo shabuluya bwakwe. Kalango kakwe kulitaatitwebo kuyeeya bubi. Uleelibalabo kucita shintu shiteshi shabulesa akumwaya lwiisho lubisha liina lya Mwaami Lesa. Bafwite nsala ulabalekabo ansala yabo. Abalo bafwite nyotwa ulabeema maanshi.

⁷ Nshila sha muntu ushishimfulunganya nshabubi alimwi ulapanga miyeeyo ibiibi. Lakwe ncaapingabo, nkunyonyoola bakandu kwiinda mubunkulwe bwakwe nakubi kwaamba ayi shaamba bakandu shililuleme.

⁸ Sombi muntu ulemekwa ngooyo ushomeka, alimwi ushimpa mukusuminisha shiluleme.

Banakashi bene Jelusalemu

⁹ Mwebo nobanakashi, ee, mwebo nomushiite buumi bubotu, amunkutike. Mwebo nobalutundu nomutacite cakulisukama, amukutike makani ngooncite!

¹⁰ Paakwiindabo mwaaka aciindi ciniinibo, mwebo nomushiite kwakubula cakulisukama, mulaakututuma kuboowa. Mulaakututuma mukwiinga teshi mukatebulewo minyansa. Ncakwiila taaku shisepo nsheshi mukaboneewo.

¹¹ Amututume mwebo nobanakashi nomushiite buumi bubotu, Amulisukame mwebo nobalutundu nomutacite cakulisukama! Amufuule shakufwala shanu shibotu, amufwale masaka mumakome kutondesha buumba.

¹² Amulyuume pashaamba akuungumana ceebo ca myuunda yanu isangalasha, ee, ceebo ca myuunda yanu icata minyansa iyo yakanyonyoolwa.

¹³ Amulyuume pashaamba akuungumana ceebo ca cishi ca bantu bangu umo mutooya cimenabo myuumfwa ashisonsoonya. Ncakwiila amulile ceebo ca maanda abeshikusekelela aceebo ca ndabala iyi muli kusangalala.

¹⁴ Ŋanda ya bwaami ilaakucaala cisuukila. Ndabala inene iyi ilaakucaalabo matongo. Shiyubilo sha njiyo amaanda alaamfu a beshikulindilila shilaakucaalabo shikalikulukile shiine. Mumusena woonse uyu mulaakubabo mafulo a mbongolo alimwi ambelele.

¹⁵ Sombi Lesa ulaakututumina alimwi Mushimu wakwe kuswa kwiculu. Lyalo luyanga lulaakuba muunda wa mboleshi awalo muunda wa mboleshi ulaakuba musaansa.

¹⁶ Koombolosha cakutanyengelela kulaakukumanabo cishi coonse. Ncakwiila bululami teshi bukashiye musena mucishi camboleshi ico.

¹⁷ Ono ceebo cakwaamba ayi bantu boonse balaakucita shiluleme, mucishi mulaakuba luumuno, ee, mulaakuboolabo tontolo kwamuyayaya.

¹⁸ Lyalo bantu bangu balaakwikala mumaanda a luumuno, mutaamu cakulisukama alimwi mutaamu cibapilinganya.

¹⁹ Nakubi kwaamba ayi imfula ya mabwe ilaakunyonyoola musaansa andabala yanu inene,

²⁰ mulaakukondwa abuumbi ceebo mulaakupekwa coolwe. Mulaakunooshanga mbuto shanu munshaatulonga toonse, ashalo ŋombe ambongolo shanu shilaakunoolilitabo.