Isaya 30 - Baibo Busansulushi Bwa Libuku Ili

Cipangano cifwite abene Ijipiti

¹ Mwaami Lesa waamba ayi, “Mapensho kubaabo beshicimpamya, ee, kubaabo bacita shamumiyeeyo yabo beene kuleka yaangu. Balapanga shipangano, sombi cakutatanjililwa aMushimu wangu. Mukucita boobo balalundika shibiibi peculu lya shibiibi.

² Balaya kuIjipiti cakutanjipushaawo, kuya kuli Falawo mukusenga kutabililwa. Ee, kuya mukuyubila kushimfule sha mucishi ca Ijipiti.

³ Ono kutabililwa kuli Falawo kulaakumulensha nsoni. Shimfule sha mucishi ca Ijipiti shilaakumuletela musebaanyo.

⁴ Ono nabi balicite kale bacinenenene mundabala ya Sowani, alimwi beshikwiimikanina bakashika kale mundabala ya Anesi,

⁵ boonse balaakulenshekwa nsoni ceebo ca mushobo utakoonshi kubacafwa. Ee, ceebo ca mushobo uyo utabaleteliiwo lucafwo nabi coolwe, sombibo nsoni alimwi amusebaanyo.”

⁶ Ono maswi aamba pabanyama ba kuNegefu ngaaya: “Beshikwiimikanina baleenda mucishi ciyoosha, umo muli nkalamu, mpili ansooka shimwi shuuluka. Balanyamuna shintu shabo shamakwebo pambongolo. Balalundika maboni abo pamisana ya ngamela kutolela mushobo utakoonshi kubacafwa.

⁷ Ncakwiila balatolela cishi ca Ijipiti ico cicite lucafwo lutaaku mbolubete. Paceeco ceeco cishi ico ndakacitumba ayi, ‘Shinshimwe utacite meeno.’ ”

Bantu batanyumfwili

⁸ Ono Mwaami Lesa wakandwiita ayi, “Koya ulembe cikani ca bushicimpamya bwabo mulibuku kwaamba ayi kunembo bukabe bukamboni bwamuyayaya pali mbabo.

⁹ Bantu aba mbaashu, mbabeshi mbaana batalibambite kunyumfwila milasho ya Mwaami Lesa.

¹⁰ Balaambila beshikubona ayi, ‘Amucileeke kubona shili anga nshiloto!’ Ee, balaambila balaluki ayi, ‘Amucileeke kutulwiita shili anga nshiloto shaamba shintu shiluleme!’ Kamutwaambila shintu sheenga shatusangalasha. Kamulaluka shintu shakuyeeyelabo.

¹¹ Amuswe munshila, mutashinkilishi muyeeyo wesu. Tatusuni kunyumfwa shaWooyo Usalalite wa bene Isilaeli.”

¹² Sombi Usalalite wa bene Isilaeli waamba ayi, “Ono ceebo cakwaamba ayi mwakaka nshendamulwiita akucinka manungo munkondo abubeshi,

¹³ cibiibi canu ici cilaakumubeta anga ndubumbu lulaamfu lucite mwaansha utooya cilakamuka. Lubumbu ulo lulawa cakufwambaana alimwi cakuteengashila.

¹⁴ Ncakwiila lulapwayooka mutupanshapansha anga ninongo yapwaikwa cakutanenekela. Mpoyapwaikila palabula akapansha keenga kasebenseshekwa kulapula mulilo, nabi kutekwishako maanshi mumungomo.”

¹⁵ Mwaami Lesa Shinkusu shoonse, Lesa Usalalite wa bene Isilaeli waamba ayi, “Na mwasanduka akuboola kuli ndime, inga mwapuluka. Na mwanshooma akulangila kuli ndime, inga mwaba ankusu. Sombi mwebo mwakakaka kucita boobo.

¹⁶ Mwebo mwakaamba ayi, ‘Sobwe. Swebo tulaakucica pamaaki esu.’ Anu ncibotu mulaakucica. Mwakaamba ayi, ‘Tulaakucica pamaaki esu eendaawo kucica.’ Sombi beshibakanooya cimutandaanya balaakumwiindaawo lubilo.

¹⁷ Bashilumamba banu bali cuulu balaakukongwa akucica kumulwani womwi. Ingayi bali bosanwe, likoto lyanu lyoonse lilaakucica. Taaku nabi womwi weshi akacaale kulekabo cisamu ca mbembela peculu lya kalundu!”

¹⁸ Nakubi boobo Mwaami Lesa ulisuni abuumbi kumunyumfwila luse. Ulilibambite kumunyumfwila nkumbu ceebo ulacita shintu shiluleme. Balicite coolwe bacinkite manungo muMwaami Lesa!

Mwaami Lesa ulaakupa coolwe bantu bakwe

¹⁹ Mwebo nobantu ba muSiyoni, ee, mwebo nomwikala muJelusalemu, teshi mukalilewo tubili sobwe. Mwaami Lesa ulaakumunyumfwila luse bushiku mbweshi mukamulilile ayi amucaafwe. Ncakwiila aakunyumfwabo kusenga kwanu, ulaakumukumbula.

²⁰ Nakubi kwaamba ayi Mwaami Lesa ulaakumwiinsha mushiindi shiyumu, ulaakunooli amwebo alimwi ulaakunoomwiisha. Teshi mukamuyandoolewo tubili.

²¹ Na kwaba kupambuka munshila akulanga kulubasu lwa kucipiko nabi kululyo, mulaakunyumfwa liswi lyakwe kuswa kwisule lyakumulwiita ayi, “Nshila iluleme njeeyi. Amukonkele njiyo.”

²² Lyalo shibumbwabumbwa shanu shinanikitwe silifa ashikoshanyo shanu sha balesa bamwi isho shinanikitwe golodi, mulaakushisowa anga ninsalu ishipite cakwiiluka. Pakushisowa mulaakunokwaamba ayi, “Nshisuni akumubonawo tubili.”

²³ Kulilabo na mwashanga mbuto shanu Mwaami Lesa ulaakumuloshesha mfula kwaamba ayi shikule kabotu akucata bunene. Ashalo shifubwa shanu shilaakuba amweemfu uunji.

²⁴ Basune ambongolo shilima myuunda yanu shilaakunoolya bwiisu bwiindaawo kubota ubo bwakasenkanishikwa kabotu amafoloko alimwi amafosholo.

²⁵ Ono bushiku balwani banu baakucaikwa, maandaabo alaamfu a beshikulindila aakuwa, tulonga tulaakukunka kuswa mutulundu toonse, tunene atuniini.

²⁶ Mweenshi ulaakubala anga ndisuba alyalo lisuba lilaakubala abuumbi akuba amumuni uli anga ngwa nshiku shosanwe ashobilo kuubika pantu pomwi. Ishi shoonse shilaakucitika Mwaami Lesa aakupombela tusani pashilonda sha bantu bakwe isho nshaakabacisa akushishilika.

Mwaami Lesa ulaakupa mulandu bene Asilya

²⁷ Amubone bulemu bwa Mwaami Lesa bulabonekelabo kulaale. Mwaami Lesa ulatondesha bukali bwakwe mumulilo, alimwi amulikumbi lya bwiishi. Milomo yakwe itootutumabo kubukali aalo maswi akwe alibo anga ngumulilo unyonyoola.

²⁸ Kuyoya kwakwe kuli anga ngumulonga wasefuka utolelela shintu shoonse. Ulaseba mishobo ya bantu musefa walunyonyooko. Mumicendwa yabo ulabikaamo tweela twakubeensheshaako kubapambusha munshila ibotu.

²⁹ Sombi mwebo nobantu bakwe Lesa, mulaakwiimba bweenka mbuli pabushiku bwakusekelela kusalalite. Myoyo yanu ilaakusangalala bweenka mboiba bantu ndibaya amitoolilo mukutanta pakalundu ka Mwaami Lesa. Ee, ndibaya kuMwaandami wa bene Isilaeli.

³⁰ Mwaami Lesa ulaakulengesha bantu kunyumfwa liswi lyakwe lya bwaami. Ulaakubalengesha kubona lyaansa lyakwe lya bukali kalisa pali mbabo. Lilaakwisa abukali buyoosha, mumulilo unyonyoola kukwamooka kwa makumbi alimwi amfuula ya mankalunkalu.

³¹ Bene Asilya balaakulenshekwa boowa pakunyumfwa liswi lya Mwaami Lesa aakubooma nkoli yakwe ya bwaami.

³² Muciindi bene Asilya baakunoopekwa mulandu, balo bantu bakwe Lesa balaakunooshana kumukumo wa misebe atulumbu. Mwaami Lesa mwiine ulaakulwana bene Asilya.

³³ Musena wakutentelaako shintu wakabambwabo kale kale. Uko kweenka nkweshi kukabe mulilo wakutentelaamo mwaami wa bene Asilya. Cilindi ca mulilo uyo cakalongola alimwi ncinene. Cilindi ico cilicite nkuni shiinji abuumbi. Ono kuyoya kwa Mwaami Lesa, uko kuli anga ngumulilo wa salufa, nkweshi kukakumike mulilo pankuni isho.