Isaya 3 - Baibo Busansulushi Bwa Libuku Ili

Mapensho kundabala ya Jelusalemu acishi ca Juda

¹ Amubone! Mwaami Lesa, Mwaami Lesa Shinkusu shoonse utooyanda kukusha lucafwo lwakwe lwa mushobo uli woonse muJelusalemu amucishi ca Juda. Utooyanda kucileka kubapa shakulya amaanshi.

² Utooyanda kukusha beshinkusu abashilumamba babo, boomboloshi abalaluki babo, beshikulotela abamaloba babo.

³ Utooyanda kukusha bamatanjilili babo bacishi aba bashilumamba, beshikupanda maano, bacibwene shakupangapanga alimwi abaloshi.

⁴ Mwaami Lesa ulaakulengesha ayi bantu beendeleshekwe kubanike basankwa. Ee, banike mbweshi bakabe beendeleshi babo.

⁵ Lyalo bantu balaakutalika kulyatililana, nkokwaamba ayi musankwa kulyatilila musankwanyina, shikamukobo kulyatilila shikamukobonyina. Bacikula bwangu balaakunoonyansha bamanene abalo bantu bataaku mbobabete balaakunoonyansha bamatanjilili babo.

⁶ Ncakwiila ciindi cilaakushikila ndyeshi bamumukowa womwi bakaambilane ayi, “Mwebo mukwaabo muliciteko shakufwala shibonekako kabotu, aboobo amube batanjilili besu muciindi ca mapensho cino.”

⁷ Sombi pabushiku ubo ulaakukumbula ayi, “Nebo sobwe! Taaku cintu nceenga ndamucafwaawo. Nshiciteewo shakulya nabi shakufwala kuŋanda yangu. Mutambiki kuba mutanjilili wanu.”

⁸ Ncakwiila ndabala ya Jelusalemu yatenkaana, cishi ca Juda citooya ciwa. Bantu ba mumo balaamba akucita shintu isho Mwaami Lesa shakumulwana. Capatuba balacobola Lesa.

⁹ Mbonekelo sha shiwa shabo shilabashinina. Balacita shibiibi cakutashisa bweenka bwakalinga kucita bene Sodoma. Ndushinisho balyeelete kunyonyooka alimwi kunyonyooka uko nkwakuliletela beene.

¹⁰ Amulwiite baluleme ayi balo shintu shilaakunoobeendela kabotu. Ceebo balaakusangalala mumilimo ya maansaabo beene.

¹¹ Sombi mapensho kubamucita shibi! Balo balaakunyonyoolwa. Nshebakalinga kucita kubamwi, shilaakuboolela mbabo.

¹² Banike mbobatoolyatilila bantu bangu, banakashi mbobatoobalela. Nobantu bangu, bamatanjilili banu bamulubya. Ncakwiila bamupambusha munshila iluleme.

Mwaami Lesa mbwaatokoombolosha bantu bakwe

¹³ Ono Mwaami Lesa wekala pacuuna cakwe ca koombolosheshaawo. Bulya wanyamuka kwaamba ayi oomboloshe bantu bakwe.

¹⁴ Mwaami Lesa waleta bamaloba abamatanjilili ba bantu bakwe mukoomboloshekwa. Utoobashinina ayi, “Mwasaala myuunda yangu ya minyansa alimwi mumaandaanu muliswitebo shintu nshimwakanyaya bakandu.

¹⁵ Anu mutooyeeya ayi ndimwe baani pakulyatilila bantu bangu akunoolita masuku pamitwi ya bakandu?” Ubo mbwaatokwaamba Mwaami Lesa, ee, Mwaami Lesa Shinkusu shoonse.

Kucenjesha kubanakashi bene Jelusalemu

¹⁶ Mwaami Lesa waamba ayi, “Amubone banakashi bene Jelusalemu mbobatoolisumpula. Baleenda cakunonomona nshingo akulasha meenso a nkwela. Baleenda cakunangaila uku kabalisha makosa ayo ngobafwala kumyeendo.

¹⁷ Paceebo ceeco nebo neMwaami Lesa ndaakulengesha ayi mumitwi yabo mube shiloonda. Womwi awomwi ndaakumulengesha kuba alubala.”

¹⁸ Pabushiku ubo Mwaami Lesa ulaakubanyaya shakulibotesha shabo shoonse. Nkokwaamba ayi makosa a kumyeendo, mitintiko ya cipaale, ncetani sha munshingo,

¹⁹ masikiyo, makosa, tusani ntobalifweka pameenso,

²⁰ shisooti, mpatishi, balaamba banene banene, misaashi ya mafuta anunkila kabotu, mpiimpi,

²¹ ninga sha kuminwe asha munshono,

²² mingaanjo ya nsalu shiteshimite, shakufwala sha peculu, mpontomona,

²³ shilola, shakufwala sha nsalu ilasha, tutambala twa nkasaalo alimwi ashitambala shilaamfu nshebafwala kumutwi.

²⁴ Ono mumusena wakununkila mafuta abotu, balo balaakunoonunka nkasaalo. Mumusena wakufwala laamba wiine, balo balaakunoofwala looshi. Mumusena wakuba amisusu ibambitwe kabotu, balo nkuba alubala. Mumusena wakufwala shakufwala shibotu, balo balaakufwala sha masempele alimwi mumusena wakuboneka kabotu, balo balaakunoolensha nsoni.

²⁵ Basankwa boonse bamundabala inene iyo balaakucaikwa. Ee, nabibo bashimpite balaakucaikwa munkondo.

²⁶ Aboobo paminjililo ya Jelusalemu palaakuba kulila kuyoosha abuumbi. Yalo ndabala ilaakubabo anga ngumwanakashi wafwitwa ushiitebo panshi, utacite apakucata.