Isaya 29 - Baibo Busansulushi Bwa Libuku Ili

Mapensho kundabala ya Jelusalemu

¹ Mapensho kuli ndiwe Jelusalemu ocipaililo cakwe Lesa. Ee, ondabala inene umo Defedi mwakayaka misumba. Ncakwiila apeendebo mwaaka womwi nabi yobilo, akwalo kusekelela kucitwa muli njiyo akutolelelebo.

² Ono ndaakushinguluka ndabala iyo yaambwa ayi ncipaililo cakwe Lesa. Ndushinisho kulaakuba kulila abuumba buyoosha muli njiyo. Ndabala yoonse ilaakubabo pyupyupyu kubulowa anga ncipaililo.

³ Ee, ndaakukubika mukati kwaamba ayi nkulwaane. Ndaakukushingulusha maanda alaamfu a beshikulindilila alimwi ndaakukushingulusha citunta cakutantilaawo pakukulwana.

⁴ Lyalo ulaakunokwaambila panshi, liswi lyako lilaakunooswa mubulongo. Ulaakunoobulubushabo anga ncipuku, ncakwiila liswi lilaakunoonyumfwika anga utootepetabo mubulongo.

⁵ Nakubi boobo makoto makoto abalwani bako alaakubabo anga ndusuko luyabo amuuwo. Ee, balwani banu batacite nkumbu balaakubabo mbuungu butooya cuululuka. Ncakwiila muciindi ciniinibo alimwi cakuteengashila

⁶ Mwaami Lesa Shinkusu shoonse ulaakwisa mukukupulusha acilulumo, citentaanshi alimwi acoongo cinene. Ulaakwisa amfuula ya muuwo, cipuupu cinene alinyaku lya mulilo ukali.

⁷ Lyalo balwani bako boonse abo bakulwana ocipaililo ca Mwaami Lesa, ee, abo bakulwana akunyonyoola shiyubilo shako alimwi akukushinguluka, ncakwiila balaakuba anga nciloto.

⁸ Balaakuba anga ngumuntu ufwite nsala walota kulya, sombi na wabuka yalo nsala kunoociinyumfwitebo. Nabi anga ngumuntu ufwite nyotwa uyo walota kunwa, sombi na wabuka yalo nyotwa kunoociinyumfwitebo. Anu ubo mbweshi cikabe kubalwani boonse abo balwana Kalundu ka Siyoni.

Kucenjeshekwa kwakasuulwa

⁹ Amutolelele kuba baluya! Amutolelele kuba boofu! Kamukoletwe, sombi kuteshi ceebo ca waini. Kamutalantanta, sombi kuteshi ceebo ca bwalwa.

¹⁰ Mwaami Lesa wamulengesha kushinshila ayi moone cakufwa. Balaluki abo bali anga ngomeenso anu wabacala pameenso. Ee, wacala meenso a beshikubona abo bamutanjilila.

¹¹ Aboobo busansulushi bwa maswi a bulaluki ali mucili anga nciloto bwashisikwa kuli ndimwe. Buli anga ndibuku lyakalamatikwa. Nabi mukaye kumuntu ucishi kubelenga akumwaambila ayi, “Twaseenga mutubelengeleko cintu ici,” ulaakukumbula ayi, “Nshikoonshi kucibelenga! Cililamatikitwe.”

¹² Nabi mukatole kumuntu utacishi kubelenga akwaamba ayi, “Twaseenga utubelengeleko cintu ici,” ulaakukumbula ayi, “Nshicishiiwo kubelenga.”

¹³ Mwaami Lesa ulaamba ayi, “Aba bantu balaba pafwaafwi anebo mukwaamba, balandemekabo pamulomo, sombi myoyo yabo ili kulaale anebo. Kupaila nkobampaila, taaku mbokubete mukwiinga baleeisha milawo ipangabo bantu anga njemilawo yakwe Lesa.

¹⁴ Paceebo ceeco bantu aba ndaakubakankamika alimwi. Balaakubona shaankamiko peculu lya shaankamiko. Ndaakumana busongo bwa basongo, alimwi ndaakulobya maano a bantu bacenjete.”

Kulangila shintu shibotu shitoosa

¹⁵ Mapensho kuli baabo beelesha cankusu kushisa miyeeyo yabo kuswa kuMwaami Lesa. Ee, kubantu abo bacita milimo yabo mumunshinshe akuyeeya ayi, “Anu ngani weenga watubona? Anu ngani weenga weshiba?”

¹⁶ Mulasandamuna shintu shoonse, mwebo mulayeeya ayi shikubumba ulyeelenebo ashintu nshaabumba. Ono sa cakabumbwa inga caambila wakacibumba ayi, “Teshi ngowakamumba?” Nabi na nongo inga yaambila shikubumba ayi, “Toocishi ncootoocita?”

¹⁷ Muciindi ciniini cishi ca Lebanoni cilaakuba muunda wa mboleshi. Awalo muunda wa mboleshi ulaakuba musaansa.

¹⁸ Lyalo pabushiku ubo bashinkite matwi balaakunyumfwa maswi ali mulibuku. Abalo boofu balinga kwikalabo mumunshinshe, balaakulasha akubona.

¹⁹ Ncakwiila bantu balibombya balaakusangalala alimwi muMwaami Lesa. Ee, bakandu balaakusangalala muWooyo Usalalite wa bene Isilaeli.

²⁰ Sombi ico ciindi batacite nkumbu balaakuloba. Beshikucelebula babyaabo balaakushimingana abamucita shibi bamwi boonse balaakunyonyoolwa.

²¹ Nkokwaamba ayi boonse bafuya babyaabo, bafuninina baabo beelete kupekwa milandu munkuta, balaakuloba. Ee, balaakunyonyoolwa boonse bapa bukamboni bwakubeca akulengesha baabo batacite milandu kutoomboloshekwa cabululami.

²² Paceebo ceeco makani ngaaya Mwaami Lesa, uyo wakapulusha Abulaamu, ngwaatokwaambila bamulunyungu lwakwe Jakobo. Utokwaamba ayi, “Bamulunyungu lwakwe Jakobo teshi bakanyumfwewo nsoni tubili. Teshi bakanokweendaawo ashiwa shilokete.

²³ Baakubona baana mbweshi nkabape, balaakusumina ayi ndime Wooyo Usalalite wa bamulunyungu lwakwe Jakobo. Lyalo balaakunoondemeka neLesa wa bene Isilaeli.

²⁴ Paciindi ico baluya balaakuba amaano, abalo abo beshikunootongookabo balaakusumina kwiishikwa.”