Isaya 28 - Baibo Busansulushi Bwa Libuku Ili

Kucenjesha kubulelo bwakumatwa

¹ Mapensho kubwaami bwa bene Efuleemu balisumpula alimwi bacakolwa! Bulemu bwabo butooya cimanabo anga ngumubala wa liluba litooya bunyana. Ee, mapensho kundabala ya Samaliya ilya ili mucinyika ca mboleshi, ndabala yabooshekwa panshi ceebo ca bacakolwa.

² Amubone Mwaami Lesa ulicite muntu shinkusu muyumu. Ulaakwisa anga nimfula ya mabwe alimwi ya muuwo unyonyoola. Ulaakwisa anga ngamaanshi asefuka akukokolola shoonse. Muntu uyo ulaakushindikila bene Efuleemu panshi cankusu.

³ Bwaami bwa bene Efuleemu balisumpula alimwi bacakolwa ncakwiila bulaakulyatoolwa.

⁴ Bulemu bwabo ubo butooya cimanabo anga ngumubala wa liluba litooya bunyana, abwa ndabala ya Samaliya ilya ili mucinyika ca mboleshi bulaakumaninabo limwi bweenka mbuli nkuyu shitaanguna kupya mboshilikwa pakumanabo kushiyapa.

⁵ Pabushiku ubo Mwaami Lesa Shinkusu shoonse ulaakuba anga ngumushini wa bulemu, ulaakuba anga ningala ya maluba yeebeleka, kubantu bakwe beshi bakacaaleewo.

⁶ Ulaakupa boomboloshi moyo wakoombolosha cakutanyengelela. Kubaabo bakunkana abalwani kuminjililo ya ndabala ulaakunoobapa nkusu.

Isaya abalaluki bene Juda bacakolwa

⁷ Abalo balaluki abapailishi balakolwa waini abuumbi cakutalantanta. Ncakwiila balapuwookapuwookabo uku akooku ceebo ca bwalwa. Ceebo cakukolwa, balaluki balaalilwa kunyumfwisha shili anga nshiloto isho Lesa nshaabatumina. Pamilandu ileta bantu kuli mbabo balaalilwa kupa bupingushi ceebo cabucakolwa.

⁸ Matebulu oonse aliswitebo malushi. Taaku pacaala pataapu matombe.

⁹ Balo balaamba ayi, “Ino ono ngani ngwaatokwiisha? Ngani ngwaatoosansulwita maswi aya? Makani aya nga baabo baleshekwa onoono, ncakwiila abo bakushikwabo kunkolo bulya.

¹⁰ Utokweelesha kutwiisha paniininiini. Kutwiisha liswi aliswi, mundando amundando wa maswi, ciiyo aciiyo.”

¹¹ Ono na mubule kunyumfwila nebo, Lesa ulaakusebensesha bantu baamba cishobo ceensu, ee, baamba cishobo ca ciswamashi, kwaamba ayi bamwiishe maswi aya.

¹² Ceebo ngondimwe ngwaakaambila ayi, “Anooyu musena wakookesheshaamo, abo balemete abese bookeshe mumusena uyu.” Sombi mwebo mwakakaka kumunyumfwila.

¹³ Paceebo ceeco Mwaami Lesa ulaakumwiisha maswi akwe, liswi aliswi, mundando amundando wa maswi, ciiyo aciiyo. Munshila iyo mulaakuwishikwa, kucisikwa, kuteyekwa alimwi akucatwa busha.

Libwe lya mulikonko lya muSiyoni

¹⁴ Anu amukutike maswi a Mwaami Lesa mwebo nobeshikucelebula, ee, mwebo nomulela bantu aba muJelusalemu.

¹⁵ Mulalisumpula ayi, “Swebo twapaanga cipangano alufu, ncakwiila twasuminishanya amusena wa bafu. Nabi shiyoosha shatupolela, taaku nceenga shatucitaawo. Ceebo mububeshi momuli ciyubilo cesu, ee, mukubeca motuyubila.”

¹⁶ Ono Mwaami Lesa Shinkusu shoonse waamba ayi, “Amubone ndabiika libwe muSiyoni, ncakwiila libwe liyumu abuumbi. Ndabiika libwe lya makwebo lya mulikonko lya ŋanda ayi libe lwiimbi lwiine lwiine. Muntu oonse weshi akashome muli ndilyo, teshi akalenshekwewo nsoni.

¹⁷ Ndaakulengesha ayi koombolosha cakutanyengelela kuba ntambo yakuyakisha, ee, bululami kuba ncecipimo.” Lyalo ciyubilo canu, ee, bubeshi, cilaakutolwa amfuula ya mabwe, maanshi alaakufwekelesha misena momuyubila.

¹⁸ Cipangano canu alufu cilaakubula nkusu, ncakwiila kusuminishanya kwanu amusena wa bafu kulaakumana ncito. Shiyoosha shaakumupolela, shilaakumana kumulobya.

¹⁹ Ncakwiila shilaakumukokolola kwaciindi aciindi, nkokwaamba ayi bwaca abwaca, malumwi nabi mashiku, nkumukokolola cakumaninina. Lyalo kunyumfwisha maswi aya kulaakunoomuletela kuloonda abuumbi!

²⁰ Ncakwiila mulaakubabo anga ngumuntu wa mukashimpi, uyo weelesha koona pabulo bufwaafwi cakutandabala, bucite linduumba liniini cakutakwana kulifweka kabotu.

²¹ Ono Mwaami Lesa ulaakunyamuka bweenka mbwaakacita paKalundu ka Pelasimu. Ulaakukalala bweenka mbwaakacita muCinyika ca kuGibyoni. Ulaakucita mulimo wakwe nabi cikaboneke ayi nceensu. Mulimo wakwe ulaakuumanisha, ee, mulimo wakwe uyo wabushishi.

²² Ono anu amucileeke kucelebula, kwabula boobo ncetani shanu shitoolemenaawo. Nebo Mwaami Lesa, Mwaami Lesa Shinkusu shoonse wandwiita, ee, wandwiita shakunyonyoola nkwaabambite pacishi cino coonse.

Busongo bwakwe Lesa

²³ Amukutike akunyumfwa liswi lyangu. Amubikeeko maano akunyumfwa nceshi ŋambe.

²⁴ Sa na mulimi walima, ulatolelela kunoolimabo kutashanga? Sa ulatolelelabo kunoopwaya mashinshiime akunooboteshaamo?

²⁵ Sobwe! Na wamanisha kweelanya bulongo, ulashangaamo mbewu mbuli sha bucisa. Ulashanga mbuto sha witi abale akushanga mbuto sha shili anga ngamaila shimwi mweela muunda.

²⁶ Mulimi ulishi bwakucita mulimo wakwe uyu kwiinda mulushibo lwakamupa Mwaami Lesa.

²⁷ Taasebenseshi shintu shilemu kulupula lupoko nabi lubanga, sombi ulasebensesha cakulupusha cuubu alimwi ceelete.

²⁸ Mulimi taanyonyooli witi kwiinda mukulupwita citaala. Uleenshaanyawo ŋoola kwaamba ayi ulupuke sombi maaki ayo taaupwayooli.

²⁹ Busongo boonse ubo bulaswa kuMwaami Lesa Shinkusu shoonse, ee, kuli Lesa uyo ukankamanisha mukupanda maano amubusongo bwakwe.