Isaya 27 - Baibo Busansulushi Bwa Libuku Ili

¹ Pabushiku ubo Mwaami Lesa ulaakusebensesha mupeeni wakwe wa nkusu alimwi ucaya, kupa mulandu Lefayatani, cisoka cilipeta cilya. Ee, kucaya shinshimwe wa mulweenge ulya.

² Pabushiku ubo Mwaami Lesa ulaakwaamba ayi, “Amwiimbe lwiimbo lwa muunda wa minyansa ucata.

³ Nebo neMwaami Lesa ndaulama, muunda uyo lyoonse ndautilila. Ndaulindilila mashiku amalumwi kwaamba ayi kubule weenga waunyonyoola.

⁴ Nebo nshikalaliteewo pamuunda uyo alimwi nimwalinga myuumfwa ashisonsoonya shitoonshinkilisha, naakwiinga ndeelwana akeembe kangu akwiitenta cakumaninina.

⁵ Ono na balwani ba bantu bangu balisuni ayi noobatabilila, bataangune kusuminishanya luumuno anebo. Ncakwiila abasuminishanye luumuno anebo.”

⁶ Muciindi citoosa bamulunyungu lwakwe Jakobo balaakushimpa anga ncisamu catola miyanda panshi. Ee, bene Isilaeli balaakushalana anga ncisamu casapuka maluba akucata shisepo. Aboobo balaakwisusha cishi coonse ca panshi ashisepo shabo.

⁷ Mwaami Lesa taakwe kupawo bene Isilaeli mulandu weelene awa balwani babo, nabi kufwitwa mweelo wa basankwa weelene awaabo.

⁸ Mwaami Lesa wakaanishabo bantu bakwe kwiinda mukubatuma mubusha. Wakabalekelela kwaamba ayi batolwe acipuupu cikali ciswa kwicwe.

⁹ Ono shibiibi sha bene Isilaeli shilaakulekelelwabo na bakapwayoole mabwe a shipaililo sha bakunsengwe kushikila akabebo anga mbusu. Ee, cakutashiya shipaililo shakutentelaawo tununkila kabotu nabi cikoshanyo cakwe Ashela lesa mwanakashi.

¹⁰ Ndabala inene ya lilinga yaba matongo, yaba musena usuulitwe anga nduyanga. Ono mwaba momumafulo a shifubwa. Shilapanga milela akulya matewu kumisampi.

¹¹ Misampi iyo na yayuma ilaponsoka. Lyalo banakashi balesa beebwesa yaya mukuba nkuni. Ceebo bantu aba tabanyumfwishishiiwo, aboobo Mulengi wabo taaciteewo coopa nkoye nabi nkumbu pali mbabo

¹² Pabushiku ubo, Mwaami Lesa ulaakubunganya bantu bakwe womwi awomwi kuswa kuMulonga wa Yufuletisi tibili akunyinsa ya Ijipiti bweenka muntu mbwaapupulusha witi ayi upansaane abuungu.

¹³ Ubo bushiku bwaakushika lupeenga lunene lulaakulishikwa kwiita bene Isilaeli boonse bali mubusha kucishi ca Asilya aca Ijipiti kwaamba ayi baboole. Ncakwiila balaakwisa mukulambila Mwaami Lesa mundabala ya Jelusalemu, ee, pakalundu kakwe kasalalite.