Isaya 26 - Baibo Busansulushi Bwa Libuku Ili

Lesa ulaakulengesha bantu bakwe kukoma

¹ Pabushiku ubo bantu balaakwiimba lwiimbo ulu mucishi ca Juda ayi, “Tulicite ndabala inene iyumu, Lesa mwiine ngootabilila malinga a njiyo.

² Amucalule minjililo ya ndabala kwaamba ayi mushobo ululeme unjile, ee, unjile mushobo uyo ushomeka.

³ Mwebo noBaami baLesa, mulapa luumuno lwiine lwiine kubaabo bashomeka lyoonse ceebo cakucinka manungo muli ndimwe.

⁴ Amucinke manungo muMwaami Lesa lyoonse ceebo Mwaami Lesa ngumwaandami utufuna kwalyoonse alyoonse.

⁵ Abo balinaamuna ulababoosha panshi. Ndabala yabo uleenyonyoola. Lilinga lya njiyo ulalikuloola cakubabo lusuko.

⁶ Ono myeendo yeenka ya baabo mbobakalinga kulyatilila, njeitokwiindaawo, ncakwiila myeendo ya bakandu njeitoolyatoolaawo.

⁷ “NoBaami baLesa mulalengesha nshila ya baluleme kubula mankununkunu. NoMululeme mulalengesha nshila sha batacite tumpenda kubula mfumpu.

⁸ Swebo tulacita kweelana akuyanda kwanu alimwi tulalangila muli ndimwe. Tulisuni kubona liina lyanu kalisumpulwa akuya mpuwo.

⁹ Mashiku moyo wangu ulayeeyabo ndimwe, aalo macuunsa miyeeyo yangu ilababo kuli ndimwe. Ceebo koombolosha kwanu ndikuboneka mucishi ca panshi, bantu bekalaamo baleeya bululami mbobubete.

¹⁰ Na nkuumbu shatondeshekwa kumucita shibi, ndushinisho bululami taabwiiyiiwo napaceyi. Lakwe pakati ka bantu baluleme micito yakwe njakusendamya alimwi taalemeki Mwaami Lesa napaceyi.

¹¹ NoBaami baLesa lyaansa lyanu lilitambikitwe, sombi balo tabalibooni. Amubaboneshe lusuno lwanu pabantu banu, bafwe nsoni. Mulilo wanu ngomwakabambila balwani banu aubateente cakubalobya.

¹² “Ono swebo mulatupa luumuno noBaami baLesa ceebo ndimwe mutulengesha ayi tuswitilile mumilimo yoonse njetucita.

¹³ NoBaami baLesa, baLesa besu nabi twakalelwaawo kale abamaami bamwi, sombi mwebo nweenka ndimwebo Baami baLesa besu.

¹⁴ Ono bulya balifwite, ncakwiila tabacibete boomi. Teshi bakabukeewo musongo ceebo mwebo mwabapa mulandu akubanyonyoola. Ndushinisho taaku eshi akabeebalukeewo tubili.

¹⁵ “NoBaami baLesa, mwalengesha mushobo wesu kukomena. Mwakomenesha manyinsa a cishi cesu mumbasu shoonse. Paceebo ceeco mulapekwa bulemu.

¹⁶ “Bantu banu ndibakalinga mumapensho, NoBaami baLesa bakamulilila. Ndimwakabapa mulandu, ncakwiila bakapaila kuli ndimwe.

¹⁷ Swebo pameenso anu noBaami baLesa twakalinga kunoolilabo akunyongoloka anga ngumwanakashi utooyanda kutumbuka.

¹⁸ Ee, twakalinga anga ngushilifumo alimwi twakanyonwa akupenga. Nakubi boobo twakatumbukabo muuwo. Tatukwe kuleta lupulusho pacishi cino. Ncakwiila taaku mpindu njetwabonaawo naciceyi.

¹⁹ “Bantu banu bakafwa balaakubuka alimwi. Mibili yabo ilaakuba abuumi. Mwebo noonse nomuli mushuumbwe amubuke. Amubuke akwiimba cakusangalala. Bweenka mume mbootontosha inshi akubusha shishango, mbweeke ubo Mwaami Lesa mbweshi akabushe bakafwa kale kale.”

Mwaami Lesa ulaakupa bantu mulandu

²⁰ Kamuya nobene misheesu, amunjile mumaandaanu. Amulicalile mushipinda shanu kushikila bukali bwakwe Lesa bwiinde.

²¹ Amubone Mwaami Lesa ulaakuswa muŋanda yakwe ya kwiculu kwisa mukupa mulandu bantu bamucishi ca panshi ceebo ca shibiibi shabo. Cishi ca panshi cilaakuyubulula bulowa bwakatilwa muli ncico. Teshi cikashiseewo abo bakacaikwa.