Isaya 25 - Baibo Busansulushi Bwa Libuku Ili

Lwiimbo lwakulumbaisha

¹ NoBaami baLesa, ndimwe baLesa bangu. Ndanoosumpula akulumbaisha liina lyanu. Mwakacita shintu shikankamika abuumbi kwiinda mukushomeka kwanu kutacite kampenda, ee, shintu isho nshemwakabambabo kale kale.

² Amubone, ndabala inene mweesandula kuba mulwi wa shakapwayoolwa. Ncakwiila mwanyonyoola ndabala yalinga kucite lilinga. Ndabala inene iyi yalinga ciyubilo ca baswamashi, sombi bulya yaloba alimwi teshi ikayakululwewo tubili.

³ Paceebo ceeco mishobo yankusu ilaakumulemeka. Ee, bantu ba mumandabala a mishobo itacite nkumbu ilaakuloonda.

⁴ Bakandu kuli ndimwe nkobacicila, ndimwe mubafuna mumapensho abo. Ndimwe ciyubilo cabo kucipuupu, Ndimwe cimfule cabo kulumwi lukali. Ncakwiila bantu batacite nkumbu bali anga ncipuupu citokuuma kulubumbu,

⁵ nabi anga ndumwi lukali lwa muluyanga. NoBaami baLesa, mwebo moomusha kupilinganya kwa baswamashi bweenka likumbi mbolifwekelesha kulisuba akubombya lumwi. Munshila iyo inyimbo sha bantu batacite nkumbu shamana.

Mwaami Lesa mbwaakabamba kusekelela

⁶ Pakalundu aka, Mwaami Lesa ulaakubambila bantu ba mumishobo yoonse kusekelela. Mukusekelela umo mulaakuba shakulya shiindaawo kubota alimwi awaini ubotu wiindaawo.

⁷ Mpomunyaawo pakalundu mpweshi akafwekwite bantu likumbi lya buumba ilyo lyalinga pamishobo yoonse.

⁸ Ncakwiila Mwaami Lesa, ee, Mwaami Lesa Shinkusu shoonse ulaakulobya lufu kwamuyayaya! Ulaakukunkumuna minsonshi mumeenso a muntu woonse akumukusha musebaanyo uyo bantu bakwe ngobakalingaawo mucishi. Mwaami Lesa waamba!

⁹ Ici caakucitika, muntu woonse ulaakwaamba ayi, “Ncakwiila nguLesa wesu! Twakacinka manungo muli nguwe, ono anaapa watupulusha. Ncakwiila nguMwaami Lesa! Twakacinka manungo muli nguwe, ono anaapa tulikondetwe alimwi tulisangalete ceebo watupulusha.”

Lesa ulaakupa mulandu bene Moabu

¹⁰ Mwaami Lesa ulaakufuna Kalundu ka Siyoni, sombi bene Moabu ulaakubalyatoola bweenka bucitwa bwiisu mumboleshi.

¹¹ Balaakutandabika maansaabo anga ngumuntu utooyanda kusamba njabwe. Sombi Lesa ulaakumana kulisumpula kwabo nakubi kwaamba ayi balacita shabucenjeshi.

¹² Ulaakunyonyoola malinga a bene Moabu alaamfu mukwaapwayoola tibili apanshi. Ncakwiila kwaanyonyoola kushikila akabebo lusuko.