Isaya 24 - Baibo Busansulushi Bwa Libuku Ili

Mwaami Lesa ulaakupa mulandu cishi ca panshi

¹ Amubone, Mwaami Lesa ulaakunyonyoola cishi ca panshi akucilengesha kuba matongo. Ulaakusandamuna akumwaya bantu boonse bekala muli ncico.

² Lyalo cililo ca nkumo kumuntu womwi awomwi cilaakuba ncimwi. Kumupailishi akubantubo, kumwaami musankwa akumusha wakwe, kumwaami mwanakashi akumusebenshi wakwe mwanakashi, kushikuulisha akuushikuula, kushikusenga akuushikupa, kushinkongole akushikukongosha.

³ Ncakwiila cishi coonse ulaakucinyonyoola cakumaninina akucisandula luyanga. Mwaami Lesa waamba.

⁴ Cishi ca panshi cayuma, ncakwiila coonse caangana. Cishi ca panshi aliculu shabola.

⁵ Ceebo bantu bacilengesha kutanoosalalite kwiinda mukupwaya milawo yakwe Lesa. Ee, bakapwaya cipangano ico ncaakapanga ambabo kwaamba ayi cikanooliikobo kwalyoonse alyoonse.

⁶ Mwaami Lesa washingana cishi ca panshi. Bantu bekala mumo bapekwa mulandu paceeco ncebakacita. Aboobo bantu bamana kuloba cakwaamba ayi kwacaalabo baniini.

⁷ Minyansa yayuma, aboobo waini taaku. Ncakwiila boonse beshikulisangalasha batootongela.

⁸ Kulila kwa misebe kwamana. Ciyobeyobe cakusangalala ca bantu camana, kulila kwa tulumbu koomushikwa.

⁹ Bantu bacileka kwiimba pakunwa waini, ee, bwalwa bwabo butoobica mukanwa.

¹⁰ Ndabala inene ya shimfulunganya ilya yacaala matongo. Mulyango wa ŋanda yomwi ayomwi ulicalitwe.

¹¹ Bantu batokooloma mumikwakwa ceebo cakubula waini. Ncakwiila kusangalala koonse kwamana, ee, kwamana mucishi coonse ca panshi.

¹² Ndabala inene yanyonyoolwa acalo cisasa ca pamwinjililo capwayoolwa akubabo tupanshapansha.

¹³ Mbweeke ubo mbweshi cikabe kumushobo womwi awomwi mucishi coonse ca panshi. Cilaakuba bweenka mbociba kushisamu sha maolifi na maolifi aloshekwaako ayalo minyansa yoonse yayapwaako kushisamu sha njiyo.

¹⁴ Bantu beshi bakacaaleewo, balaakwiimba cakusangalala. Bakumbo balaakulumba bulemu bwa Mwaami Lesa.

¹⁵ Aboobo mwebo nobakwicwe amulemeke Mwaami Lesa, Lesa wa bene Isilaeli. Amumulemeke amwebo nomuli pansumbu sha palweenge.

¹⁶ Kuswa kushishi sha kulaale tutoonyumfwa lwiimbo lwakwaamba ayi, “Amulemeke wooyo Ululeme.” Sombi nebo ndaamba ayi, “Ndamanaawo! Ndamanaawo! Mapensho kuli ndime! Beshikwaaba babyaabo baciyabo kunembo, bubeshi bwabo tabutooboolawo pesule!”

¹⁷ Nobamucishi ca panshi noonse, kuli shiyoosha, shilindi atoose shitoomulindilila kunembo.

¹⁸ Uyo woonse weshi akeeleshe kucica shiyoosha, ulaakuwita mucilindi. Uyo weshi akeeleshe kuloboka kuswa mucilindi, ulaakucatwa mukoose. Kulaakuloka mfula inene abuumbi kuswa kwiculu alimwi lwiimbi lwa cishi ca panshi lulaakutenkaana.

¹⁹ Cishi ca panshi casekemuka alimwi capasooka akutenkaanishikwa.

²⁰ Cishi citootalantanta anga ngucakolwa, citootenkaana anga nkaanda kucipuupu cinene. Ncakwiila calemenwa shibiibi sha bantu ba muli ncico. Cilaakuwa cakutabukaawo tubili.

²¹ Pabushiku ubo Mwaami Lesa ulaakupa mulandu beshinkusu mwiculu abamaami ba pacishi ca panshi.

²² Bamaami abo balaakubunjikwa mucilindi anga mbakaili muntolongo. Balaakucalilwa muntolongo akupekwa mulandu paakwiinda nshiku shiinji.

²³ Mweenshi ulaakushiya, alyalo lisuba lilaakucileka kubala ceebo Mwaami Lesa Shinkusu shoonse ngweshi akanoolela paKalundu ka Siyoni muJelusalemu. Ulaakulela cabulemu kunembo lya bamaloba ba bantu umo.