Isaya 23 - Baibo Busansulushi Bwa Libuku Ili

Shapacishi ca Taya

¹ Aya ngamaswi aamba pacishi ca Taya. Amoolome akulila cabuumba nobeshikweensha maato a kuTashishi palweenge! Ndabala ya kucito cine mishaanu ya Taya yanyonyoolwa. Taaku ŋanda yacaala muli njiyo, cito coonse canyonyoolwa. Aya makani bakaanyumfwa pakuboola amaato kuswa kuSaipulasi.

² Amuumune cakulyuungumika mwebo nobeshimakwebo ba kuSidoni, ee, mwebo nomwakatuma bantu

³ kwitala lya lweenge mukuula akuulisha shili anga ngamaila isho shakalinga kushangwa muIjipiti alimwi akucita makwebo a mishobo yoonse. Mukucita boobo bakalengesha ayi mubile abuumbi.

⁴ Nyumfwa nsoni ondabala ya Sidoni! Ee, webo ondabala icite lilinga ya kulweenge ceebo lweenge lwaamba ayi, “Nebo nshikwe kunyonwawo kale lifumo alimwi nshikwe kushalaawo kale mwaana. Ncakwiila nshikwe kulelawo kale mwaana musankwa nabi mwanakashi.”

⁵ Bene Ijipiti abalo balaakukankamana akuungumana baakunyumfwa ayi ndabala ya Taya yanyonyoolwa.

⁶ Amoolome akulila cabuumba mwebo nobantu ba pansumbu. Amusubukile kuTashishi muloboke.

⁷ Sa ncakwiila njendabala ikulukulu ya Taya iyi? Ee, ndabala ilya yakalinga kutuma bantu kwitala lya lweenge kuya mukukoma akwikala mushishi shimwi?

⁸ Anu ngani wakapinga kucita cintu ca mushobo uyu kundabala ya Taya? Ngani wakapinga boobo kundabala ya bamaami yakalinga kucite beshimakwebo, banaabaami, bapukite cishi coonse?

⁹ Mwaami Lesa Shinkusu shoonse ngowakapinga kucita cintu ici. Wakaciyeeya kwaamba ayi amane kulisumpula kwabo pashintu nshebakacita akunyaya bulemu bantu abo bakalinga kulemekwa cishi coonse.

¹⁰ Amumwaike mucishi canu bweenka busefuka mulonga wa Nailo mwebo nobantu ba kuTashishi. Bulya taaku cintu citoomushinkilisha.

¹¹ Mwaami Lesa watandabika lyaansa lyakwe palweenge akulengesha malelo kututuma. Waamba ayi shiyubilo sha bene Kenani shinyonyoolwe.

¹² Ondabala ya Sidoni teshi ukakondweewo tubili. Ncakwiila bantu bako balyatililwa. Nabi bamwi pakati kanu balobokele kuSaipulasi, akwalo teshi bakacaneeko luumuno.

¹³ Amubone mucishi ca Babiloni, taamu muntu nabi womwi. Bene Asilya mbobakaalula ndabala ya Taya kuba musena wa banyama ba muluyanga. Bakalaampya lubumbu lwakutantilaawo pakwiishinguluka. Mpeeke bakapalanganya shiyubilo sha njiyo akwiinyonyoola.

¹⁴ Amoolome akulila cabuumba mwebo nobeshikweensha maato a kuTashishi kulweenge ceebo ndabala njemwakalinga kucinkitemo manungo yanyonyoolwa.

¹⁵ Ciindi cilaakushikila ico ndabala ya Taya ndyeshi ikaluubwe kwamyaaka ili 70, myaaka ya buumi bwa mwaami. Sombi myaaka iyi yaakwiinda, ceshi cikacitike kundabala ya Taya, cilaakuba bweenka mbuli mulwiimbo lwa mufuule lwaamba ayi,

¹⁶ “Nyamuna kalumbu kako, unooya cishinguluka mundabala, webo omufuule owakalubwa! Kalishe akwiimba nyimbo shako alimwi, kwaamba ayi alimwi wiibalukwe.”

¹⁷ Myaaka ili 70 iyo yaakwiinda, Mwaami Lesa ulaakulengesha bamundabala ya Taya kuboola mumakwebo akulukulu. Balaakunoosenga kwinjila ncito kumalelo amwi a mucishi.

¹⁸ Maali ngweshi bakanoocana balaakwaabika mumaansa a Mwaami Lesa. Ncakwiila teshi bakanoosunga beene, sombi abo beshi bakanoosebensela Mwaami Lesa mbweshi bakanokwaasebensesha kukuula shakulya ashakufwala shabo.