Isaya 22 - Baibo Busansulushi Bwa Libuku Ili

Shapandabala inene ya Jelusalemu

¹ Aya ngamaswi aamba paCinyika ca cili anga Nciloto. Ono nciinshi cacitika calenga ayi noonse mutante peculu pashiluli shanu?

² Nciinshi cacitika mwebo nobamundabala inene ya shimfulunganya, ciyobeyobe alimwi amangwengwe? Basankwa banu bakacaikwa tabakwe kufwa kumipeeni, ncakwiila tabakwe kufwita kunkondo, sobwe.

³ Bamatanjilili banu bakoondomokako lubilo nakubi boobo bakacatwa kabatana kuwaalwaawo mufwi nabibo womwi. Boonse abo bakacatwa, bakatolwa mubusha ceebo bakacicilabo limwi balwani babo kabacilibo kulaale.

⁴ Paceebo ceeco ndaamba ayi, “Amundeeke ndile bene misheesu abo boonse bakanyonyoolwa. Mutangumushiiwo napaceyi.”

⁵ Mwaami Lesa, ee, Mwaami Lesa Shinkusu shoonse wabamba bushiku, ncakwiila bushiku bwa mapensho, kulyatoolwa alimwi buyoosha muCinyika ca cili anga Nciloto. Bulaakuba bushiku bwakupumununa lilinga lya ndabala alimwi bwakulilila kutulundu.

⁶ Bene Elamu bapakata shipokolo sha mifwi amata alimwi akutanta pamaaki amushikoci sha nkondo. Abalo bene Kili babamba mayawo abo.

⁷ Shinyika shiindaawo kubota shasula shikoci sha nkondo, kuminjililo ya ndabala inene ya Jelusalemu kwalo batumaako beshimaaki.

⁸ Ncakwiila shitabilisho sha bene Juda shakanyonyoolwa cakumaninina. Bushiku ubo mwakalanga kushakulwanisha shakalinga kuŊanda ya bwaami ya Musaansa.

⁹ Ono mwakabona ayi lilinga lya Ndabala yakwe Defedi lyakalinga kupumunukite mumwi. Mwakasunga maanshi muCishiba ca Muunshi.

¹⁰ Mwakeendaana kuya cibelenga maanda oonse muJelusalemu, mpeeke mwakapumununa maanda amwi ayi mushimpye lilinga.

¹¹ Mpeeke pakati ka malinga obilo mwakayakawo cishiba cakusungilaamo maanshi kwaamba ayi maanshi akalinga kukunka kuswa muCishiba Cikulukulu anooya mumo. Nakubi boobo Lesa uyo wakabambilabo limwi shintu shoonse ishi ayi shikacitike tamukwe kumubikaako maano.

¹² Mwaami Lesa, ee, Mwaami Lesa Shinkusu shoonse wakamwiita pabushiku ubo ayi mulile cakooloma amibila. Wakamwiita ayi mukulule misusu yanu akufwala masaka kutondesha buumba.

¹³ Sombi amubone, kulibo kusangalala akusekelela, kucaya ŋombe ambelele! Ncakwiila kulibo kulya nyama akunwa waini! Batokwaamba ayi, “Atulitoolimwi akunwa ceebo ciilo tulaakufwa.”

¹⁴ Mwaami Lesa, ee, Mwaami Lesa Shinkusu shoonse waŋambila ayi, “Cibiibi cabo teshi cikalekelelweewo kushikila bakafwe. Nebo neMwaami Lesa, Lesa Shinkusu shoonse ndaamba.”

Kucenjesha kuli Shebina

¹⁵ Mwaami Lesa Shinkusu shoonse wandwiita ayi, “Uye kuli Shebina mweendeleshi wa ŋanda ya kubwalo akumulwiita ayi,

¹⁶ ‘Anu utoocitanshi kuno? Ngani wakusuminisha kulipangila cuumbwe kuno? Ngani wakusuminisha kulibesela cuumbwe pakalundu aka? Ee, kulibesela mumwaandami kuno?

¹⁷ Cenjela, Mwaami Lesa ulisuni kukubwesa akukusowelabo kulaale, webo omuntu shinkusu.

¹⁸ Ulaakukufungaila kushikila ukabebo anga nimpila akukusowela mucishi cimwi cinene. Uko kweenka nkweshi ukafwite. Acalo cikoci cabulemu bwako nkweshi cikacaale, webo omuntu olensha nsoni muŋanda ya mwaami wako.’ ”

¹⁹ Mwaami Lesa waamba ayi, “Ndaakukukusha amulimo wako, ee, ndaakukutumunaawo pacuuna cako.

²⁰ “Pabushiku ubo ndaakwiita musebenshi wangu Eliyakimu mwanaakwe Ilikiya.

²¹ Ndaakumufwalika mungaanjo wako alaamba wako alimwi akumubika pacuuna cako. Ulaakuba anga ngumushali musankwa kubaabo boonse bekala mundabala ya Jelusalemu amucishi ca Juda coonse.

²² Ndaakumupa cakucalwisha cakwe Defedi. Ico nceenga wacalula taaku weenga wacicala acalo nceenga wacala taaku weenga wacicalula.

²³ Ndaakumushimpya pamusena wakwe anga nimpoopo yakapopwa cankusu. Ulaakulengesha bamuŋanda ya baishi kuba abulemu.

²⁴ “Sombi alimwi bamakwabo abaabo mbweshi akanoolela balaakuba anga ngumukuli unene pali nguwe. Bweenka mipika, mbale shifongomene mboshileleela kunkobeko, mbweeke ubo abalo mbweshi bakanoocatite kuli nguwe!

²⁵ Ico caakucitika mpoopo iyo yakapopwa cakwiishimpya ilaakutenkaana akuwa. Lyalo shoonse isho sheshi shikanookobeketweeko shilaakunyonyooka cakumaninina.” Mwaami Lesa waamba.