Isaya 21 - Baibo Busansulushi Bwa Libuku Ili

Shakuwa kwa Babiloni

¹ Ono ngaaya maswi aamba paBabiloni. Malwesa alaakwisa kuswa kucishi cilensha boowa, bweenka kapupuulwa mbokakwenga mucishi cakumalenge.

² Ndakabona shintu shiyoosha mucili anga nciloto. Shikwaaba babye, kaabaaba alakwe shikusaala, kaasaala. Nobene Elamu amulwane! Nobene Mediya amushinguluke mandabala! Ndaakumanisha mapensho oonse bene Babiloni ngobakalengesha ayi acitike.

³ Paceebo ceeci, shintu nshendakabona akunyumfwa shanenga boowa abuumbi. Mubili wangu waana kukucisa, kucisa kuli anga nkwa mwanakashi utooyanda kutumbuka. Ndatutuma kusheesho nsheenyumfwa. Ncakwiila nsheentoobona shapensha moyo wangu abuumbi.

⁴ Moyo wangu utookulunkunta, ntootutumabo kuboowa. Ndalinga kulilila ayi nshike bwangu mumuntungulya, sombi muntungulya wandetelabo boowa.

⁵ Amubone babamba matebulu, bayala mpasa, balya akunwa! Ono cakuteengashila banyumfwabo liswi kalyaamba ayi, “Amunyamuke mwebo nobamatanjilili ba bashilumamba munanike mafuta kumayawo anu.”

⁶ Lyalo Mwaami Lesa wandwiita ayi, “Koya utumeeko shikulindilila kwaamba ayi aluule nsheshi abone.

⁷ Na abone bashilumamba bali bobilo bobilo batantite pamaaki, abamwi batantite pambongolo nabi pangamela, alibambile cakumaninina.”

⁸ Mpeeke shikulindilila wakoolobesha ayi, “Nkambo, malumwi amalumwi ndeemikana paŋanda ilaamfu yakulindilililaawo. Mashiku amashiku ndeemikana pakusompela akulindilila.

⁹ Ono anaaba baashika! Bashilumamba bobilo bobilo bali pamaaki baashika.” Mpomunyaawo shikulindilila wakaambilisha ayi, “Babiloni wawa! Ee, Babiloni wawa! Ono sunu shibumbwabumbwa shoonse nshebalambila shitoopwayoolwa.”

¹⁰ Nobene Isilaelima, mwalyatoolwa anga nguwiti palubansa lwakulupwitaawo. Ono ndaambilisha kuli ndimwe makani abotu ayo ngondanyumfwa kuMwaami Lesa Shinkusu shoonse, Lesa wa bene Isilaeli.

Shapacishi ca Edomu

¹¹ Aya ngamaswi aamba pacishi ca Edomu. Umwi muntu kuswa kuEdomu utokoolobesha kuli ndime ayi, “Oshikulindilila, mashiku atoomana lili? Oshikulindilila, mashiku atokwiinda lili?”

¹² Shikulindilila wakumbula ayi, “Macuunsa atoosa, sombi aalo mashiku acisa. Na unanoocisuni kwiipusha, use wiipushe alimwi.”

Shapacishi ca Alebya

¹³ Aya ngamaswi aamba pacishi ca Alebya. Nobene Dedani, mwebo nomucite milongo ya ngamela nomuyaka misumba muluyanga lwa Alebya,

¹⁴ amupe maanshi bantu batoocicila kuli ndimwe. Mwebo nobamucishi ca Tema, amupe shakulya kubaabo batoosa mukuyuba kuli ndimwe.

¹⁵ Bantu abo batoocica mipeeni isuni kubacaya, batoocica mifwi ili mumata eeleketwe kale alimwi akukalala kwa nkondo.

¹⁶ Mpeeke Mwaami Lesa wakandwiita ayi, “Mwaaka womwi wakwanabo, kulisumpula kwa mishobo ine Keda kunanoomanite bweenka bumana cipangano cakusebensa ca mwaaka womwi.

¹⁷ Basankwa bene Keda mbobeendaawo kubula boowa kumata, sombi mbaniinibo beshi bakacaaleewo. Nebo neMwaami Lesa, Lesa wa bene Isilaeli ndaamba.”