Isaya 20 - Baibo Busansulushi Bwa Libuku Ili

Citondesho ca mulaluki uli mumakatasho

¹ Mumwaaka umwi Saligoni, mwaami wa bene Asilya, wakatuma mutanjilili wa bashilumamba bakwe ayi alwane ndabala ya Ashidodi. Ncakwiila wakeelwana akwiikoma.

² Paciindi ico, kapeendite myaaka yotatwe Mwaami Lesa ndyaakaambila Isaya mwanaakwe Amosi ayi afuule masaka alimwi ankwabilo. Alakwe wakacita kweelana abwakaamba Lesa akutalika kweendabo matakosha alimwi amyeendobo.

³ Ndabala ya Ashidodi ndiyakakomwa, Mwaami Lesa wakaamba ayi, “Bweenka Isaya musebenshi wangu mbwaalinga kuya ceendabo matakosha alimwi amyeendobo kwamyaaka yotatwe ayi ncitondesho cakucenjesha bene Ijipiti abene Kushi,

⁴ mbweeke ubo mwaami wa bene Asilya ulaakutola busha bene Ijipiti abene Kushi kabali matakosha alimwi kabali myeendobo. Banike abamanene boonse balaakunooyabo amatako patuba mukulensha nsoni bene Ijipiti.

⁵ Lyalo abo bakalinga kucinkite manungo mubene Kushi akunoolisumpwita mubene Ijipiti balaakuloonda akulenshekwa nsoni.

⁶ Ciindi ico caakushikila bantu abo bekala muloombe lwa lweenge umu balaakwaamba ayi, ‘Amubone cacitika kubaabo mbotwalinga kucinkitemo manungo, ee, abo mbotwalinga kucicilaako ayi batucaafwe akutufuna kuswa kumwaami wa bene Asilya! Ono bulya inga twapuluka buyani?’ ”