Isaya 19 - Baibo Busansulushi Bwa Libuku Ili

Mwaami Lesa ulaakupa mulandu bene Ijipiti

¹ Aya ngamakani aamba pacishi ca Ijipiti. Mwaami Lesa waashika cakufwambaana kuIjipiti kaatantite palikumbi. Shibumbwabumbwa shine Ijipiti shilatutuma kunembo lyakwe, bene Ijipiti boonse mumanungo mulatontola kuboowa.

² Mwaami Lesa waamba ayi, “Ndaakulengesha bene Ijipiti kubukila bene Ijipitinyina. Nkokwaamba ayi musankwa ulaakubukila mukwabo musankwa, shikamukobo ulaakubukila shikamukobonyina, ndabala ilaakubukila ndabalanyina, bulelo bulaakubukila bulelonyina.

³ Bene Ijipiti balaakutyongola alimwi ndaakulengesha miyeeyo yabo kubula mpindu. Balaakwiipusha kushibumbwabumbwa, kumishimu, kubeshi shamucaamba alimwi akubeshikwaamba amishimu.

⁴ Bene Ijipiti ndaakubaaba mumaansa a mwaami shilunkutwe, ncakwiila mwaami mukali ngweshi akabaleele. Nebo neMwaami Lesa, ee, neMwaami Lesa Shinkusu shoonse ndaamba.”

⁵ Mulonga wa Nailo ulaakuyuminina, ee, mwiinda maanshi mulaakuyumabo nta.

⁶ Tulonga twakupanga tulaakunoonunka pakuya ciyuma. Tulonga toonse tulaakunooya ciyuma paniininiini muIjipiti tibili tukayuminine. Matete alimwi amambulwe alaakunyana.

⁷ Shishango shoonse shili muloombe lwa Mulonga wa Nailo shilaakumana kuyuma. Myuunda yoonse ishangitwe muya mulonga uyo ilaakubabo lusuko akuululuka kumuuwo.

⁸ Beshikucaya nswi balaakutongela akulila. Ee, baloba nabi bawaala toombe muNailo. Ndoobo shabo atoombe twabo shilaakumana ncito.

⁹ Abalo beshikusebensa abutonje balaakutyongola. Ncakwiila kulangila kwa beshikutunga nsalu shiteshimite kulaakumana.

¹⁰ Basongo kuncito iyo yakupanga shisani balaakuungumana, abalo beshikusebensela ayi bakafoleshekwe balaakulila cabuumba.

¹¹ Bacinenenene ba mundabala inene ya Sowani mbaluya! Beshikupanda maano Falawo basongo balapa miyeeyo ifwite! Inga baambila buyani Falawo ayi, “Nebo ndi kulubasu lwa baabo basongo bakeeya kubamaami bakulukulu?”

¹² Ino ono basongo bako Falawo bali kuli bulya? Na nkobali abakushibishe isho Mwaami Lesa Shinkusu shoonse nshaapingite kucita kucishi ca Ijipiti.

¹³ Bacinenenene ba mundabala inene ya Sowani bababo shiluya. Bamatanjilili ba mundabala inene ya Memfisi bacenjeekwa. Bantu balemekwa mucishi ca Ijipiti balubya bamucishi cabo.

¹⁴ Mwaami Lesa wabatilila muuya wa cinshiingwa, batoolengesha bamucishi ca Ijipiti kutalantanta mushintu shoonse nshebatoocita, bweenka cakolwa mbwaatalantanta mumaluko akwe.

¹⁵ Taaku nabi womwi muIjipiti, mubile nabi mukandu, ulemekwa nabi utacite mpuwo, ukonsha kupa lucafwo.

Bene Ijipiti balaakulambila Mwaami Lesa

¹⁶ Ciindi cilaakushikila bene Ijipiti ndyeshi bakabe boowa anga mbanakashi. Balaakututuma kuboowa baakubona ayi ndyaansa lya Mwaami Lesa Shinkusu shoonse lyabaletela mapensho.

¹⁷ Cishi ca Juda cilaakunooloondesha bene Ijipiti, kulilabo weshi akanyumfwe shacishi ca Juda ulaakuloonda. Ulaakuloonda ceebo ca sheesho Mwaami Lesa Shinkusu shoonse nshaakapinga kucita kucishi ca bene Ijipiti.

¹⁸ Ciindi ico caakushikila ciEbulu cilaakwaambwa mumandabala ali osanwe ene Ijipiti. Bantu ba mumandabala ayo balaakushomesha cakulumbila kusebensela Mwaami Lesa Shinkusu shoonse. Yomwi pamandabala ayo ilaakunokwiitwa ayi, “Ndabala inene ya Lisuba.”

¹⁹ Ciindi ico caakushikila mukati mwiine muIjipiti mulaakuba cipaililo cakulambililaawo Mwaami Lesa. Akwalo kunyinsa ya ncico kulaakuba licincilo lyeshi likayakwe mukupa bulemu Mwaami Lesa.

²⁰ Shintu isho shilaakuba shitondesho kwaamba ayi Mwaami Lesa Shinkusu shoonse mwaali muIjipiti. Bushiku baakulyatililwa, na bakalilile Mwaami Lesa ayi abacaafwe, ncakwiila ulaakubatumina weshi akabafuune akubapulusha.

²¹ Mwaami Lesa ulaakuliyubulula kubene Ijipiti. Balaakumutambula akutalika kumulambila. Balaakunoobenga milambu akuleta shipo kuli nguwe alimwi balaakunooshomesha cakulumbila kuli nguwe akucita kweelana ambweshi bakanooshomesha.

²² Ee, Mwaami Lesa ulaakutuma mwaalu pabene Ijipiti. Baakwaana, ulaakubashilika. Balaakusandukila kuli nguwe alakwe ulaakukumbula kusenga kwabo akubashilika.

²³ Ciindi ico caakushikila kulaakuba mukwakwa unene kuswa muIjipiti kuya kuAsilya. Bene Asilya balaakunooya kuIjipiti abalo bene Ijipiti balaakunooya kuAsilya. Bene Ijipiti abene Asilya balaakulambilila pantu pomwi.

²⁴ Ciindi ico caakushikila bene Isilaeli, bene Ijipiti abene Asilya balaakulambilila pantu pomwi. Munshila iyo mishobo iyo ilaakuleta coolwe kucishi coonse ca panshi.

²⁵ Mwaami Lesa Shinkusu shoonse ulaakubapa coolwe mukwaamba ayi, “Pabene Ijipiti bantu bangu, pabene Asilya bantu mbondakalenga apabene Isilaeli bantu mbondakalisalila, apabe coolwe.”