Isaya 17 - Baibo Busansulushi Bwa Libuku Ili

Mwaami Lesa ulaakupa mulandu Silya aIsilaeli

¹ Aya ngamaswi aamba pandabala ya Damasikasi. Mwaami Lesa waamba ayi, “Damasikasi teshi inoocili ndabala inene, sobwe. Bulya ilaakubabo mulwi wa sheesho sha kanyonyoolwa.

² Mandabala anene a Silya alaakucaala matongo kwamuyayaya. Ncakwiila alaakubabo mafulo a mbelele aŋombe umo mweshi shikanoolita kwakubula ushitandaamo.

³ Mucishi ca bene Efuleemu teshi munoocili ndabala inene icite lilinga lya mabwe. KuDamasikasi teshi kukabewo tubili bwaami. Abalo ba kuSilya beshi bakacaaleewo balaakunyaikwa bulemu anga mbantu bene Isilaeli. Ubo mbondaamba nebo neMwaami Lesa Shinkusu shoonse.

⁴ “Pabushiku ubo bulemu bwa bamulunyungu lwakwe Jakobo bulaakuba anga ninsalu yamana mubala. Mumusena wakuba babile balaakuba bakandu.

⁵ Cishi ca Isilaeli cilaakucaalabo bweenka bucaala muunda wa maila waceswa, nabi muunda watebulwa muCinyika ca Lefaimu.

⁶ Ncakwiila mbaniinibo beshi bakapuluke. Lyalo cishi ca Isilaeli cilaakubabo anga ncisamu ca maolifi cayapwa maolifi oonse kulekabo obilo nabi otatwe eenga kaali peculu peene nabi aniini eenga kaali kumisampi ya muunshi bunene. Nebo neMwaami Lesa, Lesa wa bene Isilaeli ndaamba.”

⁷ Pabushiku ubo bantu balaakulansha meenso abo kuMulengi wabo. Ee, balaakwaalansha kuUsalalite wa bene Isilaeli.

⁸ Teshi bakaciinke manungo mushipaililo isho nshebakayaka amaansaabo. Ncakwiila teshi bakaciinke manungo mushikoshanyo shakwe Ashela lesa wabo mwanakashi, nabi mushipaililo sha tununkila kabotu nshebakayaka amaansaabo.

⁹ Pabushiku ubo mandabala a bene Isilaeli ayo acite malinga ayumu balaakwaashiyabo cisuukila, bweenka bwakacita bene Amoli abene Ifi ndibakalinga kuloonda bene Isilaeli. Mulaakucaalabo kamushinka, ee, shoonse shilaakucaalabo mumatongo.

¹⁰ Nobene Isilaeli, ncakwiila mwaluba Lesa wanu uyo wakamufuna ee, mwaluba Mwaandami wanu umutabilila. Mulashanga amyuunda isalalite ayi munoolambililamo balesa banu. Paceebo ceeco nabi mukashange shishango shibotu buyani, ee, nabi mukashange minyansa yakuula kuswa kucishi cimwi,

¹¹ nabi shikameene macuunsa eenkaayo ngomwashishangilaamo, taaku nceshi mukatebuleemo. Sombi kulaakubabo mapensho akucisa kutashilikiki.

Mishobo ya balwani yakomwa

¹² Amunyumfwe bukali bwa bantu bamumishobo iinji. Mbakalibo anga ncipuupu ciyoosha ca palweenge! Ciyobeyobe cabo cilibo anga nciwuutila ca maaba ayoosha!

¹³ Sombi nabi bayoome anga nciwuutila ca maaba ayoosha, baloondomokelabo kulaale na Lesa wabakalalila. Balayabo kulaale bweenka buungu mbobuululuka kumuuwo pakalundu, nabi anga mbwiisu mbobuya kukapupuulwa.

¹⁴ Macolesha kabaloondesha! Sombi na bwaca macuunsa bacica. Anu ubo mbweshi cikabe kubaabo boonse batusaala, ee, kubaabo batubwesela buboni.