Isaya 14 - Baibo Busansulushi Bwa Libuku Ili

Kuboola kwa bene Isilaeli kuswa mucishi ca busha

¹ Mwaami Lesa ulaakunyumfwila nkumbu bamulunyungu lwakwe Jakobo. Ulaakusala bene Isilaeli alimwi akubaboosha ayi bekale mucishi cabo. Baswamashi balaakwisa mukwikalaabo mucishi cabo akukakatila kuli mbabo.

² Mishobo imwi ya bantu ilaakucafwa bene Isilaeli kuboola kucishi ico cakabapa Mwaami Lesa. Mucishi ico bantu bamumishobo imwi iyo balaakuba basha kubene Isilaeli. Lyalo abo bakalinga bacata bene Isilaeli busha, balaakuba mbabo basha kubene Isilaeli. Ncakwiila bene Isilaeli balaakulela baabo bakalinga kubalyatilila.

Mwaami wa Babiloni mumusena wa bafu

³ Mwaami Lesa ulaakwaangulula bene Isilaeli kuswa kushuumo, mapensho alimwi akuncito iyumu iyo njebakalinga kukakatishikwa kucita.

⁴ Pabushiku aakucita boobo, bantu bakwe abakaweluluke mwaami wa Babiloni ayi, “Mwaami shilunkutwe walinga kwaalya sunu waaluba. Teshi akalyatililewo tubili muntu nabi womwi!

⁵ Ncakwiila Mwaami Lesa watyoloola musako wa baleli babiibi. Watyoloola nkoli ya bweendeleshi

⁶ iyo yakalinga kuumishikwa mishobo ya bantu cabukali alimwi cakutacilekaawo. Mubukali yakakoma mishobo iinji akwiipensha cakutaboolaawo pesule.

⁷ Bulya ono shishi shiinji shitokookesha alimwi shili muluumuno. Ncakwiila bamushishi isho batoosangalala akwiimba.

⁸ Ashalo shisamu sha mapaini asha sida sha kuLebanoni shitoosekelela ceebo ca kuwa kwako. Shitokwaamba ayi, ‘Ono bulya mbowabooshekwa panshi, taaku beshikutema beshi bakese mukututema.’

⁹ “Ncakwiila musena wa bafu walibambila kukutambula. Weemika mishimu ya baabo bakafwa kale kale, ee, mishimu ya baabo boonse bakalinga bamatanjilili kwaamba ayi ikwaanshe. Ee, weemika boonse abo bakalinga bamaami kuswa pashuuna shabo sha bwaami.

¹⁰ Boonse balaakwaamba ayi, ‘Bona awebo sunu nkusu shamana. Waba bweenka mbuli ndiswe.

¹¹ Wakalinga kulemekwa akwiimbilwa nyimbo alimwi akulishilwa tulumbu, sunu bulemu bwako boonse bwapampamukila mumusena wa bafu. Bulo bwako sunu ngamapila alimwi mapila ndyelinduumba lyako.’

¹² “Anu wawa buyani kuswa kwiculu webo Ontanda, onyenyeenshi yakumuyamaca? Waloshelwa pacishi ca panshi webo nowakalinga kukoma shishi shoonse.

¹³ Wakaamba mumoyo wako ayi, ‘Ntootanta kwiculu kwiine nkabike cuuna cangu ca bwaami peculu lya nyenyeenshi shakwe Lesa. Ndaakubika cuuna cangu peculu lya kalundu kakubunganinaawo, ee, peene pansonga ya kalundu kasalalite.

¹⁴ Ndaakutanta peculu lya makumbi akuba anga nguLesa wa kwiculu Wiindaawo.’

¹⁵ Sombi anaapa waletwa mucuumbwe, ee, kuunshi kwiine kwa musena wa bafu.

¹⁶ “Bafu baakukubona balaakukulangilisha akucatabo pamilomo. Balaakwiipusha ayi, ‘Sa uyu teshi ngomusankwa ulya wakatenkaanya cishi ca panshi akulengesha bamaami kututuma?

¹⁷ Sa te ngowooyu wakalengesha cishi ca panshi kuba luyanga akukoma mandabala anene akalinga mumo? Sa te ngooulya watakalinga kwaangulula basha mbwaakalinga kucata ayi baboole kumishaabo?’

¹⁸ “Bamaami bamwi ba mishobo imwi yoonse boonekwa mushuumbwe, ee, womwi awomwi ulicite cuumbwe cakwe.

¹⁹ Ono webo wayumbulwabo pantu pomwi abaabo bakacaikwa, ncakwiila abo bakacaikwa kumipeeni. Wawaalwabo ambabo mucuumbwe ca mabwe akulyatoolwa.

²⁰ Teshi ukabikwe bubikwa bamaaminyoko mukwiinga wakanyonyoola cishi cako akucaya bantu bako. Bamulunyungu lwako webo omucita shibi teshi bakanyumfwikeewo tubili.

²¹ Akubambwe musena wakucailaako bana bakwe basankwa! Batoocaikwa ceebo ca shibiibi sha bamashali babo bakulukulu. Taaku nabi womwi pakati kabo weelete kulela cishi. Taaku weelete kususha cishi ca panshi amandabala akwe anene.”

Mwaami Lesa ulaakunyonyoola Babiloni

²² Mwaami Lesa Shinkusu shoonse waamba ayi, “Ntoonyamuka kwaamba ayi ndwane Babiloni. Liina lyakwe ndaakulilobeshelabo limwi pantu pomwi abaabo bakacaalaawo. Taaku mwanaabo nabi wamulunyungu lwabo weshi akapuluke. Nebo neMwaami Lesa ndaamba!

²³ Musena uyo ndaakuwaalula kuba cilonga. Ulaakuba umo mweshi mukanookalabo bamwiina. Ndaakuupyanga acipyaango cakunyonyoola, Nebo neMwaami Lesa Shinkusu shoonse ndaamba.”

Mwaami Lesa ulaakunyonyoola bene Asilya

²⁴ Mwaami Lesa Shinkusu shoonse washomesha cakulumbila ayi, “Bweenka mbondakayeeya, ncakwiila mbweshi cikabe, ee, bweenka mbondakabamba, bweenka ubo mbociimfwi.

²⁵ Bene Asilya ndaakubanyonyoola mucishi cangu. Ndaakubalyatoola peculu lya tulundu twangu. Lijoko lya bweendeleshi bwa cishi ca Asilya ndaakulikushaawo pabantu bangu. Ndaakubatula mukuli uyo kuswa pashifushi shabo.

²⁶ Anu ubo mbondabamba ayi nkacite mucishi coonse ca panshi. Ndanyamuna kale lyaansa lyangu kwaamba ayi mpe mulandu bantu bamishobo yoonse.”

²⁷ Mwaami Lesa Shinkusu shoonse mwiine ngwaashinisha ayi ulaakucita shintu ishi. Ono ngani weenga wakonsha kumukasha? Lyaansa lyakwe walinyamuna kale kwaamba ayi ape mulandu. Ono ngani weenga wakonsha kuliboosha panshi?

Mwaami Lesa ulaakunyonyoola bene Filisiti

²⁸ Maswi aya akaambwa mumwaaka uyo mwaami Aasi ngwaakafwitaamo.

²⁹ Mutasangalali mwebo nobene Filisiti kwaamba ayi Asilya, iyo nkoli ya bweendeleshi yalinga kumuuma yatyoka. Ceebo kuswa kumushobo wa nsoka ilya, kulaakuswa mpili. Mumpili mulaakuswa cifukufuku ucite busoka bucaya.

³⁰ Bakandu beelaako kubukandu balaakuba ashakulya. Ncakwiila bataaku mbobabete balaakwikala kwakubula cakulisukama. Sombi mwebo abamulunyungu lwanu ndaakumucaya kunsala. Taaku nabi womwi weshi akapuluke kunsala iyo.

³¹ Amulile mwebo nobamundabala inene! Amoolome akuloonda nobene Filisiti noonse. Amubone lusuko mbolwatumba kulubasu lwa kumalenge! Ndikoto lya bashilumamba litoosa. Pakati kabo taapu moowa.

³² Anu tutoobakumbula ayinshi beshinkombe bene Filisiti? Tutoobaambila ayi, “Mwaami Lesa weemika ndabala ya Siyoni kwaamba bantu bakwe batoopenga bakapulukile nkuko.”