Isaya 13 - Baibo Busansulushi Bwa Libuku Ili

Lesa ulaakupa mulandu Babiloni

¹ Ono ngaaya maswi aamba paBabiloni Isaya mwanaakwe Amosi ngwaakatambula kuswa kuli Lesa.

² Imika mbembela ya nkondo peculu lya kalundu! Olobesha kubashilumamba akunyamuna lyaansa lyako kubasakisha kundabala inene ilya ilisumpula.

³ Nebo neMwaami Lesa ndaambila bantu bangu basalalite, ndeeta bashilumamba bangu kwaamba ayi babe cisebensesho ca bukali bwangu. Ncakwiila ayi banyonyoole bantu abo mbondafutatikila moyo.

⁴ Amunyumfwe ciyobeyobe patulundu, ciyobeyobe cili anga nca bantu baanji! Amunyumfwe coongo ca shimfulunganya pakati ka malelo, coongo cili anga nca bantu ba mushishi shiinji babungana. Mwaami Lesa Shinkusu shoonse mwiine ngowabunganya bashilumamba bakwe ayi baye kunkondo.

⁵ Bashilumamba abo batooswa kushishi sha kulaale. Ncakwiila batooswabo kwiine kweela cishi ca panshi. Mwaami Lesa mubukali bwakwe utoosa mukunyonyoola cishi ca Babiloni coonse.

⁶ Amulile mibila ceebo bushiku bwa bukali bwa Mwaami Lesa buli pafwaafwi, bushiku ubo Mwaami Lesa Shinkusu shoonse mbweshi akalete kunyonyoolwa kuyoosha.

⁷ Paceebo ceeco maansa oonse alaakuboolabo lempwete. Ncakwiila womwi awomwi ulaakunjilwa boowa.

⁸ Ee, boowa bulaakubacata cankusu. Kucisa abuumba shilaakubasakata. Balaakunootongelabo anga ngumwanakashi ucite lifumo lyabuka. Balaakunoolangilishanya cakukankamana, shiwa kashilokete kunsoni.

⁹ Amubone bushiku bwa bukali bwa Mwaami Lesa butoosa, bushiku buyoosha alimwi bufundeene kubukali. Butoosa mukunyonyoola cishi coonse akunyonyoola bamucita shibi boonse baliimo.

¹⁰ Nyenyeenshi shoonse mwiculu shilaakucileka kubala. Lisuba pakuswa lilaakushiyishikwa, awalo mweenshi teshi ukape mumuni wa nguwo.

¹¹ Mwaami Lesa waamba ayi, “Ndaakupa mulandu cishi coonse ceebo ca bubi bwa ncico akunyonyoola bamucita shibi ceebo ca shibiibi shabo. Ndaakuceesha bantu balisumpula. Ndaakumana kulinaamuna kwa baabo beshilunkutwe.

¹² Ndaakulengesha bantu beshibakacaaleewo kutabonekaboneka kwiinda golodi wiine wiine. Ncakwiila kushupa kucana bweenka bushupa golodi wa kuOfili.

¹³ Ndaakulengesha liculu kututuma acalo cishi ca panshi cilaakutenkaanishikwaawo pamusena wa ncico. Pabushiku ubo nebo neMwaami Lesa Shinkusu shoonse ndaakuyubulula bukali bwangu buyoosha.

¹⁴ “Baswamashi bekala muBabiloni balaakucicila kushishi shine mishaabo cakupalangana anga ninsefu shitooloonda bafwimi, nabi anga nimbelele shabula mweembeshi.

¹⁵ Ono kulilabo weshi akacanike, ulaakuyaswa. Ee, ulaakucaikwa amupeeni.

¹⁶ Bana babo bakateta balaakusansoolwa mutupanshapansha beene kabeebela. Maandaabo alaakusaalwa abamakaabo balaakucatwa ayi bakumanaabo cakubakakatisha mumeenso abo.

¹⁷ “Amubone ndaakubasonkomweta bene Mediya kwaamba ayi balwane bene Babiloni. Bene Mediya balo tabacite ncito asilifa, awalo golodi toobakushiwo moyo.

¹⁸ Balaakucaya basankwa bacikula bwangu amata abo. Teshi bakafwitewo nkumbu bakateta nabibo banike.

¹⁹ Babiloni mbulelo bubotu abuumbi apo bantu ba mumo mpobalisumpwita. Sombi nebo neMwaami Lesa ndaakunyonyoola Babiloni bweenka mbondakanyonyoola Sodoma aGomola!

²⁰ Taaku muntu nabi womwi weshi akekaleemo tubili. Taaku muAlabu shikwiingooka nabi womwi weshi akayakemo musumba alimwi taaku mweembeshi nabi womwi weshi akeembeleleemo mbelele shakwe umo.

²¹ Ulaakubabo matongo umo mweshi mukanookala banyama bamuluyanga abalo bamwiina mweshi bakanooyakilabo shiinswa. Ntibatiba mweshi shikanookalabo ampongo sha muluundu mweshi shikanootangalila.

²² Mushiyubilo shakwe sha mabwe mulaakunoolilabo basuntwe abalo baumpe mbweshi bakanookalabo mumaandaakwe abotu abwaami. Ciindi cakunyonyoolwa kwa Babiloni cashikila, ashalo nshiku isho tashicibete kulaale.”