Isaya 11 - Baibo Busansulushi Bwa Libuku Ili

Buleelo bwa luumuno

¹ Ono pacishiko ca buJese palaakusonsa musampi. Musampi uyo ulaakucata shisepo kuswa kumiyanda.

² Mushimu wa Mwaami Lesa ulaakumuselukila, ee, Mushimu wa busongo akunyumfwishisha. NguMushimu wakupanda maano akupa nkusu. Mushimu wa lushibo akuloonda Mwaami Lesa.

³ Ncakwiila alakwe ulaakunoosangalala mukuloonda Mwaami Lesa. Lakwe teshi akanokoombolosha kwiinda mukulangilishabo muntu, nabi kwiinda mushintu shakunyumfwanyumfwabo.

⁴ Sombi ulaakunokoombolosha bataaku mbobabete cabululami. Ulaakunokoombolosha bakandu ba mucishi ca panshi cakutanyengelela. Bantu batanyumfwi ulaakunooboomishabo kumaswi, bamucita shibi ulaakubacaya.

⁵ Bululami bulaakuba ngolaamba wakwe. Kushomeka ngolaamba wakwe wakufwala mubukome.

⁶ Baumpe balaakwikala pantu pomwi abana ba mbelele, Abalo bashiluwe balaakunoosekana ampongo. Boombe balaakunoolita pantu pomwi abana ba nkalamu. Shoonse ishi shilaakunookweembelwabo kukanike.

⁷ Ŋombe shilaakunoolita pantu pomwi abasuntwe banene. Bana ba banyama abo balaakunoolita pantu pomwi muluumuno. Nkalamu shilaakunoolya bwiisu mbuli ŋombe.

⁸ Kateta ulaakukonsha kusekanina pabulyango bwa fumbe, Mwanike ulaakukonsha kunjisha lyaansa kubulyango bwa mpili cakutalumwa.

⁹ Ncakwiila paSiyoni kalundu kasalalite ka Mwaami Lesa, teshi pakabeewo cintu cikali alimwi teshi pakabeewo bubi. Mucishi ca panshi coonse bantu balaakunooswitebo lushibo lwa Mwaami Lesa, bweenka lweenge mboluswite maanshi.

Bantu bali mucishi cabusha balaakuboola

¹⁰ Bushiku bulaakushika mwaami uyo wamulunyungu lwakwe Jese ndyeshi akeemikanine bantu anga nimbembela yakukoma. Mishobo ya bantu ilaakumuyobolokela alimwi musena ngweshi akekaleewo ulaakunoocite bulemu.

¹¹ Mubushiku ubo Mwaami Lesa ulaakuyobolola bantu bakwe boonse beshi bakacaaleewo kuswa muAsilya, Ijipiti, Patilosi, Kushi, Elamu, Babiloniya, Amati amuloombe lwa lweenge.

¹² Mwaami Lesa ulaakwiimika mbembela yakwe kutondesha mishobo imwi yoonse ayi utooyobolola cipya bantu bakwe bene Isilaeli abene Juda. Ee, kuyobolola baabo bapalangene kuswa mumbasu shoonse shone sha cishi ca panshi.

¹³ Munyono wa bene Efuleemu ulaakumana. Balwani ba bene Juda balaakunyonyoolwa. Bene Efuleemu teshi bakafwitewo munyono bene Juda, abalo bene Juda teshi bakalwanewo bene Efuleemu.

¹⁴ Sombi balaakunyumfwana akucatana pomwi kuya mukulwana bene Filisiti kumbo. Balaakusaala shishi sha kwicwe. Balaakukoma bene Edomu abene Moabu. Abalo bene Amoni balaakuba mumaansaabo.

¹⁵ Mwaami Lesa ulaakuyumya maanshi pakusubukila lweenge lwa bene Ijipiti. Lyaansa lyakwe lilaakwiinsha muuwo ulungula paMulonga wa Yufuletisi. Ulaakupasoolamo tulonga tosanwe atobilo kwaamba ayi bantu bakanoosubukabo payumu nta.

¹⁶ Kulaakuba mukwakwa unene wakwiindaamo bene Isilaeli abo beshi bakacaaleewo pakuswa muAsilya bweenka mbokwakaba mukwakwa unene ndibakalinga kuswa mucishi ca Ijipiti.