Isaya 10 - Baibo Busansulushi Bwa Libuku Ili

¹ Mapensho kuli baabo bapanga milawo italuleme, ee, milasho yakulyatilila bantu bangu.

² Munshila iyo balalengesha bakandu kubula nkusu shakupabuka akushinkilisha milandu ya baabo balyatililwa ayi itoomboloshekwi cabululami. Pabamukalubinje abana banshiwa mpobashanina kasela kwiinda mukunoobanyaya buboni.

³ Ono mulaakucita buyani pabushiku bwa bukali bwakwe Lesa, bushiku ubo kunyonyoolwa ndyeshi kukaswe kulaale? Anu ngani ngweshi mukacicileeko ayi amucaafwe? Ino bubile bwanu mulaakubushiya kuli?

⁴ Ncakwiila mulaakucaikwa munkondo nabi kutolwa busha. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

Lesa mbwaakasebensesha muleli munene wa kuAsilya

⁵ Mwaami Lesa waamba ayi, “Mapensho kuli ndiwe Asilya! Ee, ndiwe nsebensesha anga nimpimfwa ya kuumisha baabo bankalasha.

⁶ Asilya, ndiwe ndakatuma kuya mukulwana mushobo utalemeki ndime neLesa, mushobo uyo wakankalasha. Ndiwe ndakatuma kuya mukusaala buboni bwabo akubalyatoola anga ngamatombe mumikwakwa.”

⁷ Sombi lakwe muleli munene wa kuAsilya muyeeyo wakwe ngumbi. Ee, mbwaalibambite kucita mbumbi. Muyeeyo ngwaacite ngwakwaamba ayi anyonyoole mishobo iinji.

⁸ Ulalisumpula akwaamba ayi, “Bamatanjilili bangu ba bashilumamba boonse mbamaami.

⁹ Ndakakoma ndabala ya Kalino aya Kakemishi. Ndakakoma ndabala ya Amati aya Alipadi alimwi ndakakoma ndabala ya Samaliya aya Damasikasi.

¹⁰ Ncakwiila ndakakoma malelo aanji a baabo bakalinga kulambila shibumbwabumbwa, shibumbwabumbwa shiinji kwiinda sha muJelusalemu amuSamaliya.

¹¹ Ndakanyonyoola ndabala ya Samaliya ashibumbwabumbwa sha muli njiyo. Ono mbweshi nkacite akundabala inene ya Jelusalemu ashikoshanyo shilambilwa mulya.”

¹² Sombi Mwaami Lesa waamba ayi, “Ndamanisha kucita nsheentoocita paKalundu ka Siyoni amundabala ya Jelusalemu, ndaakupa mulandu muleli munene wa kuAsilya ceebo cakulisumpula, ee, ceebo cakulinaamuna kwakwe.”

¹³ Muleli uyo ulalisumpula ayi, “Shoonse ishi ndakashicita kwiinda munkusu shangu, mubusongo bwangu alimwi amukucenjela kwangu. Ncakwiila ndamanisha manyinsa pakati ka mishobo akubwesa buboni mbobakalinga kusungite. Bamaami babo ndakabalwana akubalyatoola anga ngumucende.

¹⁴ Mbweeke muntu mbwaanjisha lyaansa muciinswa, anebo mbondakabwesa buboni bwa mishobo. Bweenka muntu mbwaabunjika mayi acaala cisuukila, mbweeke ubo mbondakabunganya shishi shoonse. Ncakwiila kwakubula nabi womwi upipila nabi ukosokaawo.”

¹⁵ Sombi Mwaami Lesa waamba ayi, “Ono sa keembe inga keenda wooyo ukasebensesha? Sa cakutimbusha mapulanga inga calisumpula kuwooyo ucisebensesha? Sa mpimfwa njeenyamuna muntu na ngumuntu unyamuna mpimfwa?”

¹⁶ Paceebo ceeco Mwaami Lesa, ee, Mwaami Lesa Shinkusu shoonse ulaakutuma bulwashi bucaya pakati ka bashilumamba ba muleli uyo. Lyalo kulisumpula kwakwe kulaakupya amulilo utashimiki.

¹⁷ Lesa, ee, Mumuni wa bene Isilaeli ulaakuba mulilo. Ncakwiila Usalalite wa bene Isilaeli ulaakuba kubilima kwa mulilo uko kukonsha kutenta shoonse mubushiku bomwibo. Kutenta nabi myuumfwa ashisonsoonya.

¹⁸ Mulilo uyo ulaakulokotesha misaansa yakwe ibotu akutenta myuunda yakwe icite mboleshi bweenka bulwashi bucaya mbobuya cimana muntu.

¹⁹ Shisamu shakwe sheshi shikacaale shilaakubabo shiniini cakwaamba ayi nabi mwanike ulaakukonsha kushibelenga.

Bene Isilaeli baniini beshi bakacaaleewo

²⁰ Pabushiku ubo bene Isilaeli beshi bakacaaleewo, nkokwaamba ayi bamulunyungu lwakwe Jakobo beshi bakanoocili boomi, teshi bakanoocicinkite manungo muwooyo wakabakoma. Sombi balaakucinka manungo muMwaami Lesa Usalalite wa bene Isilaeli.

²¹ Bene Isilaeli baniini beshi bakacaaleewo, balaakusandukila kuli Lesa wabo Shinkusu shoonse.

²² Ncakwiila nabi bene Isilaeli bulya mbaanji, ee, mbaanji anga ngumuseese wa kuloombe lwa lweenge, mbaniinibo beshi bakacaaleewo akuboola. Bamwi baanji babambilwa kunyonyoolwa ceebo beelela kwaamba ayi banyonyoolwe.

²³ Mwaami Lesa, ee, Mwaami Lesa Shinkusu shoonse ndushinisho utoolengesha cishi cino coonse kunyonyoolwa kweelana ambwaakaamba.

Mwaami Lesa ulaakupa mulandu bene Asilya

²⁴ Ono Mwaami Lesa, ee, Mwaami Lesa Shinkusu shoonse waamba ayi, “Nobantu bangu nomwikala muSiyoni, mutaloondi bene Asilya abo bamuumisha ankooli. Mutabaloondi nabi balamuumisha mpimfwa bweenka bwakalinga kucita bene Ijipiti.

²⁵ Coonoonobo bukali bwangu pali ndimwe butoomana. Lyalo ntoobukila mbabo kwaamba ayi mbanyonyoole.

²⁶ Nebo nemwiine neMwaami Lesa ndaakubakwipa aciswepu bweenka mbondakacita bene Midyani kumwaandami wa kuOlebu. Ndaakubanyonyoola ankooli yangu bweenka mbondakacita kubene Ijipiti paLweenge Lusalala.

²⁷ Pabushiku ubo ndaakumwaangulula kuswa munkusu sha bene Asilya akutyoloola lijoko lya bweendeleshi bwabo lili pashifushi shanu.”

Kwisa kwa balwani

²⁸ Balwani balya bali munshila. Bashika kuAiyati! Beenda kale muMigiloni. Shintu shabo babikisha muMikimashi.

²⁹ Beenda kale pamwinjililo uli pakati ka tulundu tobilo akwaamba ayi baye bakoonene kuGeba! Bantu ba mundabala ya Lama baloonda abuumbi. Balo ba muGibiya, ndabala ya mwaami Saulo, bacica.

³⁰ Amoolobeshe nobene Galimu! Amukutike nobene Laisha! Amukumbule nobene Anatoti!

³¹ Bene Madimena bacica, bene Gebimu bayuba.

³² Sunu balwani batooya mukwiimikana kuNobu. Sunu kalundu ka Siyoni, ee, ka Jelusalemu batookafungila makoofi.

³³ Amubone, Mwaami Lesa, ee, Mwaami Lesa Shinkusu shoonse ulaakubatema akubalosha anga ngumusampi wa cisamu watemwa. Ncakwiila abo balisumpula, abo balinaamuna ulaakubatema akubaboosha panshi.

³⁴ Mwaami Lesa ulaakubatema akubawisha anga nshisamu shatemwa mukati ka musaansa. Ee, bweenka buwa shisamu shilaamfu sha kuLebanoni kukeembe!