Filimoni 1 - Baibo Busansulushi Bwa Libuku Ili

¹ Ndime Paulo uyo uli muntolongo ceebo cakwe Klistu Jesu. Ndi amukwabesu Timoti. Tutoolembela ndiwe omukwabesu Filimoni musebenshinyineesu,

² nankashi yangu Apiya, Akipasi shilumambanyineesu munkondo ya muMushimu alimwi acoonde cibungana muŋanda yako.

³ Luse aluumuno shibe awebo kuswa kuli Lesa Ishiwesu aMwaami Jesu Klistu.

Lusuno alushomo lwakwe Filimoni

⁴ Ndalumba Lesa wangu lyoonse ndinkuyeeya mumipailo yangu

⁵ mukwiinga ndanyumfwa shalusuno lwako pabashomi boonse alushomo ndoocite muMwaami Jesu.

⁶ Ndapaila kwaamba ayi kwiinda mukwaamba shalushomo lwako, bantu beshibe abuumbi shibotu shoonse nshetucite muli Klistu.

⁷ Mukwaabo, lusuno lwako lwansangalasha alimwi akunjuminisha ceebo wasangalasha myoyo ya bashomi boonse.

Paulo mbwaakasengela Onesimasi

⁸ Paceebo ceeco nebo ndalinga kweeletebo kukulwiita muli Klistu nceweelete kucita.

⁹ Sombi ceebo ca lusuno ndakusenga, nakubi kwaamba ayi ndime Paulo mutumwi wakwe Klistu Jesu alimwi pacecino ciindi nendi muntolongo ceebo ca nguwe.

¹⁰ Ono ntookusenga ceebo cakwe Onesimasi, uyo wakaba mwanaangu muli Klistu kaandi muntolongo.

¹¹ Kale kale taakalinga kucite ncito kuli ndiwe, sombi cino ciindi inga waba anciito kuli ndiswe soonse, webo anebo.

¹² Ono ntoomuboosha kuli ndiwe, anu mukucita boobo cilibo anga ndakutumina amoyo wangu woonse.

¹³ Ndalinga kusuni ayi nkalaakwe kuno kwaamba ayi anoncafwaako mumusena wako, ndyencili muntolongo ceebo ca Makani Abotu.

¹⁴ Nakubi boobo nshisuni kukukakatisha ayi uncaafwe, sombi ndisuni kwaamba ayi ulisuminine omwiine.

¹⁵ Mpashi Onesimasi wakakushikwa kuli ndiwe ciindi ciniini kwaamba ayi ese ekale awebo lyoonse.

¹⁶ Ono bulya taabetebo musha, sombi uleenda pamusha, ngumukwanu usunikwi muli Klistu. Nebo ndimusuni abuumbi, sombi kuli ndiwe ulaakwiindaawo mukwiinga ngumusha wako alimwi ngumukwanu muMwaami Jesu.

¹⁷ Aboobo na ulaamba ayi ndimusebenshinyoko, tambula Onesimasi bweenka mbweenga wantambula.

¹⁸ Ono na kuli ncaakakubishisha nabi kukukweleta, ulipilishe ndime.

¹⁹ Maswi aya ntooalemba alyaansa lyangu ayi, “Nebo nePaulo ndaakukulipila.” Mukwaamba boobo, nsheelete kukwiibalusha ayi nkongole njoocite kuli ndime, mbuumi bwako omwiine.

²⁰ Paceebo ceeco mukwaabo, ndakusenga ayi uncaafwe pamakani aya ceebo ca Mwaami. Nsangalashe kweelana ambooli mukwesu muli Klistu.

²¹ Pakulemba makani aya, ndishinishite ayi ulaakucita kweelana ambondasenga alimwi ayi ulaakwiindilishaawo.

²² Ntoosenga alimwi ayi ukamambileko mwakoona ceebo ntooshoma kwaamba ayi Lesa ulaakukumbula mipailo yanu akumboosha kuli ndimwe.

Kwaansha kwakweelaako

²³ Epafulasi uyo ngombetaakwe muntolongo ceebo cakwe Klistu, wakwaansha.

²⁴ Maako, Alisitakasi, Dimasi alimwi aLuka basebenshima abalo bakwaansha.

²⁵ Luse lwa Mwaami Jesu Klistu lube amwebo noonse.