Esita 9 - Baibo Busansulushi Bwa Libuku Ili

Bajuda mbobakanyonyoola balwani babo

¹ Ono bushiku bwalikumi anshiiku shotatwe mumweenshi walikumi ayobilo wiitwa ayi Ada, mulawo wa mwaami ndiwakalinga kweelete kucitwa, bwakashikila. Ubu mbobushiku ubo balwani ba baJuda mbobakalinga kuyeeya kubakoma. Sombi shintu shakasanduka, baJuda mbobakakoma balwani babo.

² Mpeeke baJuda bakabungana mumandabala abo mushipansha shoonse sha cishi ca mwaami Sakisesi kwaamba ayi balwane abaabo bakalinga kusuni kubacaya. Taaku muntu wakakonsha kubakoma ceebo bamumishobo yoonse bakalinga kubaloonda abuumbi.

³ Ncakwiila boonse bamatanjilili ba mushipansha sha cishi, bamaami, beendeleshi abacinenenene ba mwaami bakacafwa baJuda ceebo boonse bakalinga kuloonda Modekayi abuumbi.

⁴ Ono cakapuka mubwaami bwakwe Sakisesi boonse ayi Modekayi wakaba munene muŋanda ya bwaami alimwi nkusu shakwe shakalinga kuya bufulilaako.

⁵ Munshila iyo baJuda bakacita cili coonse ncebakalinga kusuni kubalwani babo. Bakabalwanisha amipeeni akubacayoola.

⁶ Mundabala inene ya Susa, baJuda bakacaya basankwa bali 500.

⁷ Bakacaya aPashandata, Dalifoni, Asipata,

⁸ Polata, Adaliya, Alidata,

⁹ Palamashita, Alisayi, Alidayi aFayisata,

¹⁰ nkokwaamba ayi baana basankwa likumi bakwe Amani mwanaakwe Amedata, mulwani wa baJuda. Sombi tabakwe kusaalawo buboni bwabo.

¹¹ Mweelo wa baabo bakacaikwa mundabala inene ya Susa wakaluulwa kumwaami bushiku bweenka ubo.

¹² Mpomunyaawo wakaambila Esita mukaakwe ayi, “Mundabala inene ya Susa baJuda bacaya basankwa bali 500 kubikaawo abana bakwe Amani basankwa bali likumi. Ino mushipansha shimwi shoonse sha cishi bacaya bongaye? Ono cimwi nciinshi ncoosuni? Ncakwiila utoopekwa. Ndwiitebo cimwi ncoosuni, utoopekwa.”

¹³ Lyalo Esita wakakumbula ayi, “Na inga camukonda nobaami, amusuminishe baJuda ayi bakacite aciilo ico cakasuminisha mulawo wanu pabushiku bwasunu. Musuminishe alimwi ayi mituntu ya bana bakwe Amani abo yaangililwe pashisamu shakwaangililawo bantu shilya.”

¹⁴ Aboobo mwaami wakasumina ayi kucitwe bweenka ubo. Mulawo wakaambilishikwa mundabala inene ya Susa. Mpeeke mituntu ya bana bakwe Amani basankwa bali likumi yakaangililwa pashisamu bantu boonse kababweneeko.

¹⁵ Lyalo pabushiku bwalikumi anshiiku shone mumweenshi wa Ada, mundabala inene ya Susa baJuda bakabungana akucaya basankwa bamwi bali 300, sombi alimwi tabakwe kusaalawo buboni bwabo.

¹⁶ Muciindi ico ceenka baJuda bamwi abo bakalinga mushipansha shimwi sha cishi ca mwaami Sakisesi abalo bakabungana kwaamba ayi balitabilile. Mpeeke bakacaya balwani babo bali 75,000, sombi tabakwe kusaalawo buboni bwabo.

¹⁷ Ici cakacitika pabushiku bwalikumi anshiiku shotatwe mumweenshi wiitwa ayi Ada. Ono pabushiku bwalikumi anshiiku shone bakookesha akubulengesha kuba bushiku bwakusekelela akusangalala.

¹⁸ BaJuda bakalinga kwikala mundabala inene ya Susa bakabungana pabushiku bwalikumi anshiiku shotatwe alimwi apabushiku bwalikumi anshiiku shone ayi bacaye balwani babo. Lyalo pabushiku bwalikumi anshiiku shosanwe bakookesha akubulengesha kuba bushiku bwakusekelela akusangalala.

¹⁹ Anu nceceeco baJuda bekala mumishi ncebookeshesha pabushiku bwalikumi ashone bwa mumweenshi wiitwa ayi Ada. Pabushiku ubo balasangalala, kusekelela akupaana shipo sha shakulya.

Kusekelela kwa pulimu

²⁰ Shintu shoonse ishi Modekayi wakashilemba. Lyalo wakalembela baJuda boonse bakalinga kwikala mushipansha shoonse sha mucishi ca mwaami Sakisesi, ba pafwaafwi aba palaamfu.

²¹ Wakabaambila ayi banoosekelela pabushiku bwalikumi anshiiku shone alimwi abwalikumi anshiiku shosanwe bwa mweenshi wa Ada mwaaka amwaaka

²² mukwiinga nshenshiku baJuda nshebakalifuna kubalwani babo. Uyo ngomweenshi wakuungumana abuumba uyo wakasandamunwa kuba mweenshi wakusekelela akusangalala. Wakabalembela ayi nshiiku isho shibe shakusekelela akusangalala, kupaana shipo sha shakulya alimwi akupa bakandu shakulya.

²³ Aboobo baJuda bakasumina kutolelela kusekelela bweenka mbuli bwakaamba Modekayi, nkokwaamba ayi kusekelela mwaaka amwaaka.

²⁴ Amani mwanaakwe Amedata, wamulunyungu lwakwe Agagi, mulwani wa baJuda wakapinga kubanyonyoola akuuma cisolo ciitwa ayi pulimu kwaamba ayi abone bushiku bweelete kucita boobo.

²⁵ Sombi makani aya akanyumfwika Esita ndyaakaya kumwaami. Lyalo mwaami wakalemba mulawo wakukasha muyeeyo wakwe Amani pabaJuda uyo wakamuboolela mwiine. Nkokwaamba ayi lakwe abana bakwe basankwa bakaangililwa pashisamu shakwaangililawo bantu.

²⁶ Aboobo nshiku ishi shakookesha bakashiita ayi pulimu mukwiinga wa cisolo ciitwa ayi pulimu. Ono ceebo ca makani alembetwe munkalata yakwe Modekayi alimwi asheesho nshebakabona akucitikilwa,

²⁷ baJuda bakalipangila mulawo wakwaamba ayi balo, bamulunyungu lwabo alimwi abaabo boonse bakasandukila kukupaila kwabo kabasekelela lyoonse panshiku shobilo isho kweelana amilasho yakwe Modekayi.

²⁸ Bakasuminishanya kwaamba ayi panshiku shobilo isho sha pulimu mumashalane oonse bamuŋanda aŋanda, bamucipansha ca cishi comwi acomwi alimwi abamundabala yomwi ayomwi, balyeelete kusekelela lyoonse alyoonse.

²⁹ Mpeeke Esita muka mwaami mwanaakwe Abiyailo pantu pomwi aModekayi muJuda bakalemba nkalata aimwi kupa nkusu kunkalata iyo Modekayi njaakataanguna kulemba pamakani akusekelela nshiku sha pulimu.

³⁰ Mpomunyaawo Modekayi wakatuma nkalata iyo kubaJuda mushipansha shoonse shili 127 sha cishi ca Pesha. Mwakalinga maswi akushomesha luumuno akutalisukama.

³¹ Nkalata iyo yakaambila baJuda abamulunyungu lwabo bwakusekelela panshiku sha pulimu isho paciindi ceelete ayi kube kwishibila bweenka mbuli mbobakaba akwishibila kwakulikasha kulya akwa pashililo. Modekayi muJuda alimwi aEsita muka mwaami mbobakapa mulasho uyo.

³² Mpeeke mulasho wakwe Esita wakusuminisha milasho yakusekelela pulimu wakalembwa mulibuku.