Esita 8 - Baibo Busansulushi Bwa Libuku Ili

Bajuda mbobakaambilwa ayi balifuune

¹ Ono bushiku bweenka ubo mwaami wakapa Esita mukaakwe buboni boonse bwakwe Amani mulwani wa baJuda. Esita wakalwiita mwaami ayi Modekayi ngushikamukowa wakwe. Aboobo Modekayi wakasuminishikwa kunooshika pameenso a mwaami.

² Lyalo mwaami wakafuula ninga yakwe yakeshibilo iyo njaakanyaya Amani akwiipa Modekayi. Mpomunyaawo Esita wakapa Modekayi mulimo wakulama buboni bwakalinga bwakwe Amani.

³ Mpeeke Esita wakakombelela alimwi kumwaami mukuliwaala kushimpanta shakwe kaalila. Wakamukombelela ayi akashe muyeeyo ubiibi wakwe Amani wamulunyungu lwakwe Agagi ngwaakapangila baJuda.

⁴ Mpomunyaawo mwaami wakatambika nkoli ya bwaami ya golodi kuli Esita, alakwe wakanyamuka akwiimikana kunembo lyakwe.

⁵ Mpeeke wakaamba ayi, “Na inga camukonda nobaami, na mulambikako maano alimwi na muyeeyo uyu uliluleme kuli ndimwe, amulembe makalata akukasha mulawo wakwe Amani mwanaakwe Amedata wamulunyungu lwakwe Agagi ngwaakalemba ayi anyonyoole baJuda boonse mubwaami bwanu.

⁶ Ceebo inga nshikoondwi kubona bene misheesu kabanyonyoolwa akubona bamakwesu kabacaikwa.”

⁷ Mpomunyaawo Mwaami Sakisesi wakaambila Esita mukaakwe aModekayi muJuda ayi, “Amubone, buboni bwakwe Amani ndakabupa Esita alimwi bakaangilila Amani ceebo cakubishisha baJuda.

⁸ Anu mwebo amulembe mulawo wakufuna baJuda kweelana ambomusuni. Muuleembe muliina lyangu akuumawo ninga yangu ya keshibilo mukwiinga taaku makani akalembwa muliina lyangu akuumwa ninga yangu yakeshibilo eenga asandulwa.”

⁹ Aboobo balembi ba mwaami bakeetwa pabushiku bwamakumi obilo anshiiku shotatwe mumweenshi watatu wiitwa ayi Sifani. Balembi bakalemba makalata kweelana abwakaamba Modekayi ayi aye kubaJuda, bamaami, beendeleshi abacinenenene bamushipansha sha cishi shoonse shili 127. Nkokwaamba ayi kuswa kuIndiya kuya mukushika kuKushi mukulukulu. Makalata ayo akalembwa kweelana amushobo wakulemba wa cipansha comwi acomwi alimwi mumulaka wa mushobo womwi awomwi. Abalo baJuda bakabalembela kweelana amushobo wabo wakulemba alimwi amumulaka wabo.

¹⁰ Modekayi wakalembesha makalata ayo muliina lya mwaami Sakisesi akuumawo ninga yakwe ya keshibilo. Mpeeke akatolwa abeshinkombe kabatantite maaki acica bunene ayo akashalwa mushimpati sha mwaami.

¹¹ Anu mulawo uyo wakalembwa muliina lya mwaami wakasuminisha baJuda mundabala inene yomwi ayomwi kulibungabunga akulitabilila, nkokwaamba ayi kunyonyoola, kucaya akulobya likoto lya bashilumamba boonse ba mushobo uli woonse nabi ba cipansha ca cishi cili coonse abo beenga babalwana akulwana bamakaabo abana babo. Wakabasuminisha akusaala buboni bwa balwani babo.

¹² Bushiku bwakasalwa kwaamba ayi baJuda bakacite boobo mushipansha shoonse sha cishi ca mwaami Sakisesi, mbushiku bwakaambikwa ayi baJuda bakacaikwe. Nkokwaamba ayi mbushiku bwalikumi anshiiku shotatwe mumweenshi walikumi ayobilo wiitwa ayi Ada.

¹³ Anu makani aya akalinga kweelete kwaambilishikwa ayi ngumulawo mucipansha ca cishi comwi acomwi akushibishikwa kumuntu uli woonse kwaamba ayi baJuda balibambile kulitabilila kubalwani babo bushiku ubo bwaakushikila.

¹⁴ Aboobo beshinkombe bakaya kabatantite maaki a mwaami acica bunene. Bakafwambaana kweelana abwakabaambila mwaami. Mulawo uyu wakaambwa amuSusa ndabala inene ya mwaami.

¹⁵ Lyalo Modekayi wakaswa kuŋanda ya bwaami kaafwete shakufwala sha bwaami sha mushobo wa liculu akutuba, mungaanjo wa nsalu iteshimite ifubelafubela amushini wa golodi unene. Lyalo bamundabala inene ya Susa bakasekelela cakusangalala abuumbi mumikwakwa.

¹⁶ Anu kubaJuda ici cakaba nciindi cakusangalala akukondwa, kusekelela alimwi akulemekwa.

¹⁷ Mumandabala oonse amushipansha shoonse sha cishi umo mwakaambilishikwa mulawo wa mwaami, kwakaba kukondwa akusangalala pakati ka baJuda. Bakasekelela akulya shakulya shiinji. Mpeeke bantu baanji ba mishobo imwi bakatalika kupaila pantu pomwi abaJuda ceebo bakalinga kubaloonda.