Esita 3 - Baibo Busansulushi Bwa Libuku Ili

Amani mbwaakapinga kunyonyoola Bajuda.

¹ Pesule lya makani aya oonse akacitika, mwaami Sakisesi wakasala Amani kuba pamusena wiinda wa bacinenenene bamwi boonse. Amani wakalinga mwanaakwe Amedata wamulunyungu lwakwe Agagi.

² Anu bacinenenene boonse ba mwaami abo bakalinga kwikala kumwinjililo wa mwaami bakalinga kufukamina Amani mukumulemeka ceebo mwaami mbwaakabalwiita. Sombi Modekayi lakwe wakakaka kucita boobo.

³ Aboobo bacinenenenenyina bakamwiipusha ayi, “Ceebonshi wakaaka kukonkela mulawo wa mwaami?”

⁴ Bushiku abushiku bakalinga kumwaambila pamakani aya. Sombi lakwe wakalinga kukaka kubanyumfwila. Modekayi wakabaambila ayi, “Nebo ndi muJuda. Aboobo shikoonshi kufukamina Amani, sobwe.” Lyalo bakaambila Amani makani ayo kwaamba ayi babone na inga wakondwa amicito yakwe Modekayi.

⁵ Ono Amani ndyaakabona ayi ncakwiila Modekayi wakaka kumufukamina mukumulemeka, wakakalala abuumbi.

⁶ Lyalo ndyaakeshiba ayi Modekayi ngumuJuda, wakayeeya kutamucaya eenka. Sombi wakabamba nshila yakucailamo baJuda boonse mucishi ca Pesha coonse.

⁷ Ono mumweenshi wakutaanguna, mweenshi wiitwa ayi Nisani, mumwaaka walikumi ayobilo mubwaami bwakwe Sakisesi, Amani wakaambila bantu ayi boome cisolo ico ncebakalinga kwiita ayi Pulimu kunembo lyakwe, ayi bacane bushiku amweenshi weelete kusebensa mulimo uyu. Cisolo cakawita pabushiku bwalikumi anshiiku shotatwe mumweenshi walikumi ayobilo uyo wiitwa ayi Ada.

⁸ Mpomunyaawo Amani wakaambila mwaami Sakisesi ayi, “Kuli mushobo umwi wa bantu bapalangene mubwaami bwanu boonse abo bakonkela kwishibila kupuseneeko akwa bantu bamwi boonse. Bantu abo balakaka akukonkela milawo yanu. Aboobo taaku mbweshi cimucaafwe kubalekabo.

⁹ Anu baami na basuminisha, abape mulawo wakwaamba ayi bacaikwe. Na mwacita boobo, ndaakupa makilogilamu a silifa ali 340,000 kuŋanda ya kubwalo yakusungilako buboni kwaamba ayi mulimo uyu ucitwe.”

¹⁰ Lyalo mwaami wakafuula ninga yakwe yakeshibilo kumunwe wakwe akupa mulwani wa baJuda Amani mwanaakwe Amedata wamulunyungu lwakwe Agagi.

¹¹ Mpomunyaawo mwaami wakamwaambila ayi, “Maali ali mumaansaako pantu pomwi abantu aba. Anu inga wabacita buli boonse mboosuni.”

¹² Anu pabushiku bwalikumi anshiiku shotatwe mumweenshi wakutaanguna, Amani wakeeta balembi boonse ba mwaami akubaambila makani kwaamba ayi balembe makalata mumushobo wakulemba wa shipansha shoonse sha cishi ca Pesha alimwi mumulaka wa mushobo womwi awomwi. Lyalo wakaatuma kubamaami, beendeleshi abacinenenene boonse. Makalata ayo akalembwa muliina lya mwaami Sakisesi akuumawo ninga yakwe yakeshibilo.

¹³ Beshinkombe bakatola makalata ayo kushipansha shoonse sha cishi. Makalata ayo akalinga kwaamba ayi banyonyoole, kucaya akulobya baJuda boonse, bacikula bwangu abamanene, banakashi abanike akusaala buboni bwabo boonse pabushiku bomwi. Bushiku ubo mbwalikumi anshiiku shotatwe bwa mweenshi walikumi ayobilo wiitwa ayi Ada.

¹⁴ Makani aya akapekwa mbuli mulawo mushipansha shoonse sha cishi kwaamba ayi bantu boonse bakalibambile bushiku ubo.

¹⁵ Beshinkombe bakacita kweelana abwakaamba mwaami mukutola mulawo uyo mushipansha shoonse sha cishi amundabala inene ya Susa. Lakwe mwaami aAmani bakekala akutalika kunwa, sombi bamundabala ya Susa bakatalika kupilinganishikwa.