Esila 9 - Baibo Busansulushi Bwa Libuku Ili

Esila mbwaakapaila pamakani akweebana abaswamashi

¹ Ono shintu ishi ndishakamana kucitwa, bamatanjilili bakesa kuli ndime akwaamba ayi, “Bene Isilaeli, kubikaawo abapailishi alimwi abene Lefi tabakwe kulipatula kubantu mbobekalaabo. Balakonkela micito yabo ibiibi, mbuli ya bene Kenani, bene Iti, bene Pelisi, bene Jebusi, bene Amoni, bene Moabu, bene Ijipiti alimwi abene Amoli.

² Bakeeba baana banakashi ba baswamashi abo alimwi akweebesha kubana babo basankwa. Munshila iyo bakasenkanya mushobo usalalite kubantu mbobekalaabo. Bamatanjilili abacinenenene balo mbobali akunembo mukucita shibiibi isho.

³ Ono ndindakanyumfwa boobo, ndakakwamoona shakufwala shangu akunonkola misusu alimwi andesu shangu mubukali. Lyalo ndakekala panshi mubuumba bunene abuumbi.

⁴ Ndakekala apo kaaŋungumene kushikila ciindi cakubenga mulambu wa macolesha. Mpeeke bantu bakatalika kubungana mpondakalinga, nkokwaamba ayi boonse abo bakatutuma ndibakanyumfwa maswi akwe Lesa wa bene Isilaeli pashibiibi sha bantu abo bakataanguna kuswa mucishi ca busha.

⁵ “Ono ciindi ca mulambu wa macolesha ndicakashikila, ndakanyamuka apo mpondakalinga kushiite, kaancifwete shakufwala shangu shikwamukite, ndakafukama akutambika maansaangu kwiculu kuMwaami Lesa, Lesa wangu.

⁶ Lyalo ndakapaila ayi, ‘NobaLesa bangu, ndicite nsoni abuumbi kwiinuna mutwi pameenso anu mukwiinga shibiibi shesu shafula abuumbi, ncakwiila shilishikite kale kwiculu.

⁷ Kuswa muciindi ca bamashali besu bakulukulu kushikila sunu, shibiibi shesu shafula abuumbi. Ceebo ca shibiibi shesu, swebo, bamaami abapailishi besu twakakomwa kubamaami ba mushishi shimwi, tulacaikwa, kwipilwa akutolwa busha. Ncakwiila twasebaana abuumbi bweenka mbotubete asunu.

⁸ Ono muciindi ciniini, noBaami baLesa, baLesa besu mwakatunyumfwila luse akufuna sobamwi kuswa mubusha akutukalika kabotu mumusena uno usalalite. Mwakatukusha mubusha akutupa buumi bupya.

⁹ Twakalinga basha sombi tamukwe kutulekelaamo. Mwakalengesha bamaami bene Pesha kutusuna, kutusuminisha kwikala akuyaka alimwi Ŋanda yanu nobaLesa iyo yakalinga yaba matongo. Mwakasuminisha ayi tuboole akwikala muluumuno muJuda alimwi aJelusalemu.

¹⁰ “ ‘Ono bulya nobaLesa besu twaambenshi? Twakasuula milawo,

¹¹ iyo njemwakapa kwiinda mubasebenshi banu balaluki ndimwakaamba ayi, Cishi ncemutooya mukwikalaamo, ncishi citasalalite mukwiinga bantu bekalaamo bakacibisha coonse kumicito yabo ibiibi ilensha bunya.

¹² Aboobo mutakeebeshi bana banu kubana babo nabi kuleka bana banu kweeba bana babo. Mutakabacaafwi ayi bekale muluumuno akuba acoolwe paciindi cili coonse kwaamba ayi mukayume akulya shintu shibotu sha mucishi ico akucishiila bana banu ayi cibe caabo lyoonse alyoonse.

¹³ Anu isho shakacitika kuli ndiswe, shakacitika ceebo ca micito yesu ibiibi iyo italifulili. Nakubi boobo, nobaLesa besu mwatupa mulandu uniini kwiinda shibiibi shesu mbosheelete alimwi mwatusuminisha kunoocili boomi swebo sotwacaalaawo.

¹⁴ Sa alimwi tukacibooshewo kutyola milawo yanu akweebana abaswamashi abo bacita shibiibi? Twakucita boobo, sa teshi mukakalale kushikila mukatunyonyoole cakumaninina, kukabule aucaala?

¹⁵ NoBaami baLesa, baLesa ba bene Isilaeli ndimwe mululeme! Nakubi boobo mwatusuminisha kunoocili boomi. Ono twalyaambilila shibiibi shesu panembo lyanu, nakubi kwaamba ayi tatweelete kwiimikana pameenso anu ceebo ca nshisho.’ ”