Esila 8 - Baibo Busansulushi Bwa Libuku Ili

Bantu abo bakaswa mucishi ca busha

¹ Aba mbobamatanjilili ba shipani sha mumikowa ya bene Isilaeli, abo mbondakaswaabo kuBabiloni, cishi ca busha, akuboolela kuJelusalemu ciindi Atasakisesi ndyaakalinga mwaami.

² Mucipani cakwe Fineyasi nguGeshomu, mucipani cakwe Itama nguDanyelo, mucipani cakwe Defedi nguAtusha

³ mwanaakwe Shekaniya. Mucipani cakwe Paloshi, nguSekaliya uyo wakalembwa abasankwa bali 150.

⁴ Mucipani cakwe Paati Moabu nguElionayi mwanaakwe Selaiya uyo wakalinga abasankwa bali 200,

⁵ mucipani cakwe Satu, nguShekaniya mwanaakwe Jaasiyelo uyo wakalinga abasankwa bali 300,

⁶ mucipani cakwe Adini, nguEbedi mwanaakwe Jonasani uyo wakalinga abasankwa bali 50.

⁷ Mucipani cakwe Elamu, nguJeshayiya mwanaakwe Ataliya uyo wakalinga abasankwa bali 70,

⁸ mucipani cakwe Shefatiya, nguSebadiya mwanaakwe Mikaeli uyo wakalinga abasankwa bali 80,

⁹ mucipani cakwe Joabu, nguObadiya mwanaakwe Jeyiyelo uyo wakalinga abasankwa bali 218.

¹⁰ Mucipani cakwe Bani, nguShelomiti mwanaakwe Josifiya uyo wakalinga abasankwa bali 160,

¹¹ mucipani cakwe Bebayi, nguSekaliya mwanaakwe Bebayi uyo wakalinga abasankwa bali 28,

¹² mucipani cakwe Asigadi, nguJowanani mwanaakwe Akatani uyo wakalinga abasankwa bali 110.

¹³ Mucipani cakwe Adonikamu, abo bakweelaako bakalinga kucite meena aya Elifeleti, Jewelo alimwi aShemiya abo bakalinga abasankwa bali 60,

¹⁴ alimwi mucipani cakwe Bigifayi nguUtayi alimwi aSaka abo bakalinga abasankwa bali 70.

Esila mbwaakacana bene Lefi ba kuŊanda yakwe Lesa

¹⁵ Ono ndakababunganya kumulonga uyo kundabala ya Aafa, uko nkotwakayaka misumba akwikalako nshiku shotatwe. Mulikoto lyesu ili ndakacana kwaamba ayi mwakalingabo bapailishi, sombi bene Lefi tebakalingaamo.

¹⁶ Aboobo ndakeeta Eliyesa, Aliyelo, Shemiya, Elinatani, Jalibu, Elinatani, Natani, Sekaliya alimwi aMeshulamu abo bakalinga bamatanjilili pantu pomwi aJoyiyalibu aElinatani abo bakalinga bafundishi

¹⁷ akubatuma kuli Ido, mutanjilili wa kuKasifiya abamakwabo, basebenshi ba kuŋanda yakwe Lesa kuKasifiya mukusenga ayi batutumineko bantu bakusebensesha kuŊanda ya Lesa wesu.

¹⁸ Ono kwiinda muluse lwakwe Lesa, bakatuletela Shelebiya, musankwa ucikonsha kucita kabotu milimo, wamulunyungu lwakwe Maali mwanaakwe Lefi uyo wakashalwa kuli Isilaeli, pantu pomwi abana bakwe alimwi abamakwabo abo bakakumana basankwa bali 18.

¹⁹ Bakatuma aAshabiya aJeshaiya ba mucipani cakwe Melali, bamakwabo abameecwa bakwe abo bakalinga basankwa bali 20.

²⁰ Mukwiilikaawo bakaleta basankwa bakalinga 220 basebenshi ba kuŋanda yakwe Lesa abo bakalinga kucite bamashali babo bakulukulu mwaami Defedi abacinenenene bakwe mbobakasala ayi banoocafwa bene Lefi. Bantu abo boonse bakalembwa meenaabo.

Esila mbwaakatanjilila bantu mukulikasha kulya amumipailo

²¹ Ono kulya kuMulonga wa Aafa ndakapa mulawo wakwaamba ayi soonse tulikaashe kulya alimwi akuliceesha pameenso a Lesa wesu, kumusenga kututanjilila mulweendo lwesu alimwi akutufuna swebo abana besu pantu pomwi ashintu shesu shoonse.

²² Ndakalisenda kusenga mwaami bashilumamba nabi beshimaaki bakutufuna kubalwani besu munshila, mukwiinga twakaambila mwaami ayi, “BaLesa bali abaabo boonse babashoma, sombi balicite bukali bunene kubaabo babakaka.”

²³ Aboobo twakalikasha kulya akusenga Lesa wesu pamakani aya, alakwe wakakumbula mipailo yesu.

²⁴ Lyalo ndakakushawo bamatanjilili ba bapailishi bali 12, nkokwaamba ayi Shelebiya, Ashabiya abamakwababo bamwi bali 10.

²⁵ Ndakabapimina silifa, golodi ashimwi shisebensesho isho mwaami, beshikumupandako maano, bacinenenene alimwi abene Isilaeli boonse bakalingaako, nshebakapa kwaamba ayi shikasebense kuŊanda ya Lesa wesu.

²⁶ Shintu isho nshendakapa nsheeshi, makilogilamu ali 22,000, shisebensesho sha silifa shakalinga kulema makilogilamu ali 70, golodi wakalinga kulema makilogilamu ali 3,400,

²⁷ mbale shifongomene sha golodi shakalinga kulema makilogilamu ali 8.4, alimwi ambale shifongomene shobilo sha bulonse sheelene ambale sha golodi mumweelo.

²⁸ Lyalo ndakabaambila ayi, “Mwebo mulisalalite ku Mwaami Lesa, Lesa wa bamashali banu bakulukulu, bweenka mbuli shisebensesho sha silifa agolodi shapekwa kuli nguwe ayi nshipo shakulyaaba.

²⁹ Amushilame kabotu tibili mukashike kuŊanda yakwe Lesa muJelusalemu uko nkweshi mukashipiime pameenso abamatanjilili ba bapailishi, aba bene Lefi alimwi aba bene Isilaeli bamwi boonse.”

³⁰ Lyalo bapailishi alimwi abene Lefi bakatambula silifa agolodi pantu pomwi ashisebensesho shisalalite isho shakapimwa ayi shikatolwe kuŊanda yakwe Lesa kuJelusalemu.

Mbobakaboolela kuJelusalemu

³¹ Ono pabushiku bwa likumi ashobilo mumweenshi utaanshi twakanyamuka kuswa kuMulonga wa Aafa akuya kuJelusalemu. Lesa wesu wakalinga aswebo, kutulama akutufuna kubalwani besu akutupondo munshila.

³² Aboobo twakashika kuJelusalemu uko nkotwakapumuna nshiku shotatwe.

³³ Ono pabushiku bwane, muŊanda yakwe Lesa wesu twakapima silifa, golodi ashisebensesho shisalalite akushibika mumaansa akwe Melemoti mwanaakwe Uliya mupailishi. Eliyasa mwanaakwe Fineyasi wakalingaakwe pantu pomwi abene Lefi, Josabadi mwanaakwe Jeshuwa aNoadiya mwanaakwe Binuyi.

³⁴ Lyalo shintu shoonse isho shakabelengwa, kupimwa akulembwa paciindi ceenka ico.

³⁵ Kuswawaawo bantu abo bakaswa mucishi ca busha bakabenga milambu yakutenta kuli Lesa wa bene Isilaeli. Bakabengela bene Isilaeli boonse bacende bali 12, mbelele shisankwa shili 96, bana ba mbelele basankwa bali 77. Bakabenga ampongo shisankwa shili 12 ayi ngumulambu wakulekelelwa shibiibi. Shintu shoonse ishi shakalinga ngumulambu wakutenta wakabengwa kuMwaami Lesa.

³⁶ Mpeeke bakatola nkalata ya mwaami kubeendeleshi alimwi abacinenenene bakwitala lya Mulonga wa Yufuletisi, lyalo abalo bakapa lucafwo kubantu alimwi akuŊanda yakwe Lesa.