Esila 7 - Baibo Busansulushi Bwa Libuku Ili

Esila mbwaakashika muJelusalemu

¹ Ono ndikwaakeenda myaaka iinji, Atasakisesi kaali mwaami wa kuPesha, kwakalinga muntu wakalinga kwiitwa ayi Esila. Esila wakalinga wamulunyungu lwakwe Aloni mupailishi munene mukwiinga wakashalwa kuli Selaya, Selaya wakashalwa kuli Asaliya, Asaliya wakashalwa kuli Ilikiya,

² Ilikiya wakashalwa kuli Shalumu, Shalumu wakashalwa kuli Sadoki, Sadoki wakashalwa kuli Ayitabu,

³ Ayitabu wakashalwa kuli Amaliya, Amaliya wakashalwa kuli Asaliya, Asaliya wakashalwa kuli Melayoti,

⁴ Melayoti wakashalwa kuli Selaiya, Selaiya wakashalwa kuli Usi, Usi wakashalwa kuli Buki,

⁵ Buki wakashalwa kuli Abishuwa, Abishuwa wakashalwa kuli Fineyasi, Fineyasi wakashalwa kuli Eliyasa, Eliyasa wakashalwa kuli Aloni.

⁶ Esila uyo wakaswa kuBabiloni alimwi wakalinga kwishi abuumbi Milawo yakwe Mose iyo Mwaami Lesa, Lesa wa bene Isilaeli njaakapa. Mwaami wa kuBabiloni wakamupa shoonse nshaakalinga kusenga mukwiinga Mwaami Lesa, Lesa wakwe wakalinga pali nguwe.

⁷ Abamwi bene Isilaeli pantu pomwi abapailishi, bene Lefi, beshikwiimba, beshikulama paminjililo alimwi abasebenshi ba kuŊanda yakwe Lesa abalo bakaya kuJelusalemu mumwaaka wasanu a yobilo ya bweendeleshi bwakwe Atasakisesi.

⁸ Wakashika kuJelusalemu mumweenshi wasanu mumwaaka wasanu ayobilo.

⁹ Wakanyamuka kuswa kuBabiloni pabushiku butaanshi bwa mweenshi wakutaanguna, akushika kuJelusalemu pabushiku butaanshi bwa mweenshi wasanu, mukwiinga Lesa wakwe wakalinga kumucafwa.

¹⁰ Ono Esila wakalinga kwiiya Milawo ya Mwaami Lesa akwiicita mubuumi bwakwe boonse. Kuswawaawo wakalinga kwiisha milawo amilasho iyo kubene Isilaeli.

Nkalata yakalemba mwaami Atasakisesi njaakapa Esila

¹¹ Iyi njenkalata yakalemba mwaami Atasakisesi akupa Esila mupailishi alimwi mufundishi, uyo ushi milawo amilasho ya Mwaami Lesa njaakapa bene Isilaeli.

¹² “Ndime Atasakisesi, Mwaami wa baami, Ntoolembela ndiwe Esila mupailishi alimwi mufundishi wa Milawo yakwe Lesa wakwiculu. Ndakwaansha.

¹³ “Ono ndapa mulawo wakwaamba ayi boonse bene Isilaeli abo bashiite mucishi cangu, pantu pomwi abapailishi, abene Lefi abo basuni kuya andiwe kuJelusalemu, inga baya.

¹⁴ Nebo nemwaami pantu pomwi abeshikumpandako maano bali bosanwe abobilo twakutuma kuya mukwiipusha Milawo yakwe Lesa iyo ili mumaansaako, mbweekonkelwa mucishi ca Juda amundabala inene ya Jelusalemu.

¹⁵ Ukatole golodi alimwi asilifa isho nebo abeshikumpandako maano nshetwaapa kuli Lesa wa kuIsilaeli uyo ucite ŋanda muJelusalemu.

¹⁶ Ukatole asilifa alimwi agolodi woonse uyo ngweshi ukabwese mucishi ca Babiloni, ashipo shakulyaaba sha bene Isilaeli asha bapailishi isho nshebapa ayi nsha kuŊanda yakwe Lesa, Lesa wabo muJelusalemu.

¹⁷ “Ulyeelete kusebensesha kabotu maali aya kuula bacende, mbelele shisankwa, baana ba mbelele basankwa, pantu pomwi ashipo sha nshisho sha shili anga ngamaila asha shakunwa akushibenga pacipaililo ca kuŊanda yakwe Lesa kuJelusalemu.

¹⁸ Kuswawaawo webo alimwi abene Isilaelinyoko inga mwasebensesha silifa agolodi iyo yeenga yacalawo kweelana akuyanda kwa Lesa wanu.

¹⁹ Ulyeelete kutola kuli Lesa wa kuJelusalemu shisebensesho shoonse isho nshemwakapekwa kwaamba ayi shikasebense kumulimo wa muŊanda yakwe Lesa.

²⁰ Ono shimwi shoonse nshemusuni sha kuŊanda yakwe Lesa, inga mwashikusha kunkomwe yakubwalo.

²¹ “Nebo nemwaami Atasakisesi ndapa mulawo uyu kubeshikulama buboni boonse bekala kwitala lya Mulonga wa Yufuletisi. Mulyeelete kupa Esila mupailishi alimwi mufundishi wa Milawo yakwe Lesa wa kwiculu, nsheenga wasenga mukufwambaana.

²² Shintu ishi shilyeelete kushika kumakilogilamu a silifa ali 3,400, makilogilamu awiti ali 10,000, malita a waini ali 2,000, malita a mafuta a olifi ali 2,000 alimwi amwiinyo woonse uyandika.

²³ Mulyeelete kubikako maano kubamba shoonse isho Lesa wa kwiculu nshaasuni paŊanda yakwe kwaamba ayi atakankalalili pantu pomwi abaabo beshi bakabe baami kuswa ndime.

²⁴ Ono mwakashikwa kutambula musonko uli woonse kubapailishi, bene Lefi, beshikwiimba, beshikulindilila, basebenshi nabi umwi uli woonse uyo ukumite kuŊanda yakwe Lesa iyi.

²⁵ “Ono webo Esila, mukusebensesha busongo bwakakupa Lesa wako, usale bamatanjilili aboomboloshi ayi beendeleshe bantu boonse bakwitala lya Mulonga wa Yufuletisi, abo bekala kweelana aMilawo ya Lesa wako. Ulyeelete kwiisha uyo woonse uteshi Milawo iyo.

²⁶ Na umwi waalilwa kukonkela Milawo ya Lesa wako nabi milawo yangu ulyeelete kupekwa mulandu wakucaikwa, kutandwa mucishi, kunyaikwa buboni bwakwe nabi kwaangwa.”

Esila mbwaakalumbaisha Lesa

²⁷ Lyalo Esila wakaamba ayi, “Aalumbwe Mwaami Lesa, Lesa wa bamashali besu bakulukulu uyo walengesha mwaami kuyanda kulemeka Ŋanda ya Mwaami Lesa ya kuJelusalemu munshila iyi.

²⁸ Ono kwiinda munkumbu shakwe wanengesha kuyandwa kumwaami, beshikumupandako maano alimwi abacinenenene bakwe boonse. Mwaami Lesa, Lesa wangu wanjuminisha. Aboobo ndakonsha kwaambila bamatanjilili ba shipani sha mumikowa ya bene Isilaeli kuboolela andime.”