Esila 6 - Baibo Busansulushi Bwa Libuku Ili

Mbobakacana mulawo wa mwaami Sailasi

¹ Mpeeke mwaami Dalyasi wakapa mulawo kwaamba ayi bayandoole mulibuku lya bamaami ba cishi ca Babiloni.

² Libuku lyakacanwa mundabala inene ya Ekibatana mucishi ca Mediya umo mwakalinga kulembetwe makani aya.

³ “Mumwaaka wakutaanguna mubweendeleshi bwa mwaami Sailasi, mwaami wakapa mulawo paŊanda yakwe Lesa muJelusalemu ayi ayiyakwe umo mweelete kubengelwa milambu. Ŋanda iyo ilyeelete kuba amamita ali 27 kuya mwiculu alimwi mamita ali 27 mubufwaafwi.

⁴ Lubumbu lulyeelete kuyakwa amundando womwi wa mapulanga pamindando ili yoonse yotatwe ya mabwe anene yayakwa. Maali oonse ayandika alaakupatalwa kuswa kunkomwe yakubwalo.

⁵ Ono shintu sha golodi asha silifa, isho Nebukadinesa nshaakakusha muŊanda yakwe Lesa ya kuJelusalemu akutola kuBabiloni, shilyeelete kuboolela kuJelusalemu akubikwa muŊanda yakwe Lesa uko.”

Mulawo wakwe Dalyasi

⁶ Lyalo Dalyasi wakakumbula munkalata njaakatuma ayi, “Kuli Tatenayi mweendeleshi wa kwitala lya Mulonga wa Yufuletisi, Sheta Bosenayi amwebo nobacinenenenenyinaabo ba mucishi ico. “Amusweeko kuŊanda yakwe Lesa.

⁷ Mutafulunganyi mulimo wakuyaka Ŋanda yakwe Lesa uyo. Amuleke mweendeleshi wa baJuda abamaloba babo bayake alimwi iyi Ŋanda iyakwe peenka pamusena wakalekale.

⁸ Ono ntoomupa mulawo mbomweelete kucita kubamaloba ba baJuda pamulimo wakuyaka Ŋanda yakwe Lesa iyi. Maali akusebensesha bantu abo, alaakunooswa kunkomwe yakubwalo, nkokwaamba ayi kumaali ngobasonkela bantu ba kwitala lya Mulonga wa Yufuletisi ayi mulimo utakeemikani.

⁹ Mulyeelete kupa bapailishi ba kuJelusalemu shoonse nsheenga bayanda pabushiku abushiku, nkokwaamba ayi bacende baana nabi mbelele ayi ibe milambu yakutentela baLesa ba kwiculu. Mulyeelete kubapa witi, mwiinyo, waini nabi mafuta a olifi.

¹⁰ Mulaakunoocita boobo ayi bakanoobenga milambu kuli baLesa ba kwiculu alimwi akumpaililaako kwaamba ayi nokweendela buumi abana bangu basankwa.

¹¹ Ono ndapa mulawo umwi wakwaamba ayi na muntu waalilwa kukonkela mulawo uyu, cisamu cilaakukushikwa kuŋanda yakwe akubeswa kunembo. Lyalo ulaakubwesekwa akutungwa kucisamu ico. Kuswawaawo ŋanda yakwe ilaakwaalulwa mwakusowela matombe.

¹² BaLesa, abo bakasala Jelusalemu kwaamba ayi ube musena wakubalambililaamo, bakakome mwaami uli woonse nabi mushobo uyo weshi ukakake kukonkela mulawo uyu akweelesha kunyonyoola Ŋanda yakwe Lesa iyi. “Nebo neDalyasi, ndapa mulawo uyu alimwi ulyeelete kukonkelwa camaansa obilo.”

Mbobakabenga ŋanda yakwe Lesa kumwiine

¹³ Lyalo Tatenayi mweendeleshi, Sheta Bosenayi, abacinenenenenyinaabo bamwi bakacita bweenka bwakaamba mwaami.

¹⁴ Bamaloba ba baJuda bakatolelela kuyaka Ŋanda yakwe Lesa cakuswitilila. Agayi alimwi aSekaliya mwanaakwe Ido abo bakalinga balaluki mbobakabatanjilila. Bakamanisha kuyaka kweelana ambobakaambilwa kuli Lesa wa bene Isilaeli alimwi aSailasi, Dalyasi aAtasakisesi bamaami ba kuPesha.

¹⁵ Bakamanisha kuyaka Ŋanda yakwe Lesa pabushiku bwatatu mumweenshi wa Ada mumwaaka wasanu awomwi mubweendeleshi bwa mwaami Dalyasi.

¹⁶ Ono bene Isilaeli, nkokwaamba ayi bapailishi, bene Lefi aboonse abo bakaswa mucishi ca busha bakasangalala pakubenga Ŋanda yakwe Lesa kumwiine.

¹⁷ Pakwiibenga kuli Lesa bakabenga bacende mwaanda, mbelele shisankwa myaanda yobilo alimwi abana ba mbelele basankwa myaanda yone. Bakabenga ampongo likumi ashobilo ayi ngumulambu wakulekelelwa shibiibi nkokwaamba ayi mpongo yomwi ayomwi kumushobo womwi awomwi wa bene Isilaeli.

¹⁸ Bakabika bapailishi abene Lefi mushipansha shabo kwaamba ayi bakanoosebensela Lesa muŊanda yakwe kuJelusalemu kweelana ambocilembetwe mulibuku lyakwe Mose.

Bushiku bwa Pasika bwakwiibaluka kusotokela

¹⁹ Pabushiku bwa likumi ashone mumweenshi wakutaanguna abo bakaswa kucishi ca busha bakasekelela bushiku bwa Pasika bwakwiibaluka kusotokela.

²⁰ Bapailishi boonse alimwi abene Lefi bakalisalasha kweelana aMilawo. Bene Lefi bakacaila baabo bakaswa mubusha, bapailishi alimwi abeene, bana ba mbelele ba pabushiku bwa Pasika.

²¹ Bene Isilaeli abo bakaswa mucishi ca busha mbobakabalya pantu pomwi abaabo boonse bakacileka kukonkela shintu shibiibi shalinga kucita bantu abo bakalinga kwikala mucishi cilya, akutalika kulambila Mwaami Lesa, Lesa wa bene Isilaeli.

²² Lyalo bakaba akusekelela kwakulya cimaande. Bakacita boobo kabasangalete kwanshiku shosanwe ashobilo. Bakasangalala mukwiinga Mwaami Lesa wakasandula moyo wa mwaami wa kuAsilya ayi abacaafwe kuyaka alimwi Ŋanda yakwe Lesa, Lesa wa bene Isilaeli.