Esila 4 - Baibo Busansulushi Bwa Libuku Ili

Buyumuyumu bwakacanika pakuyaka ŋanda yakwe Lesa alimwi

¹ Ono balwani ba bene Juda alimwi abene Benjameni bakanyumfwa kwaamba ayi abo bakaswa mucishi ca busha batooyaka alimwi Ŋanda ya Mwaami Lesa, Lesa wa bene Isilaeli.

² Bakaya mukubona Selubabelo abamanene ba shipani sha mikowa akwaamba ayi, “Atuyake pantu pomwi amwebo mukwiinga bweenka mbuli ndimwe, aswebo tulalambila Lesa weenka ngomulambila alimwi tulabenga milambu kuli nguwe kuswa kuciindi cakwe Esaadoni mwaami wa kuAsilya, uyo wakatuleta kokuno.”

³ Sombi Selubabelo, Jeshuwa abamwi boonse bamanene ba shipani sha mikowa ya bene Isilaeli bakabakumbula ayi, “Tamucitemo lubasu mukuyakila Lesa wesu Ŋanda. Tulaakuyakila Mwaami Lesa, Lesa wa bene Isilaeli sobene bweenka Sailasi mwaami wa kuPesha mbwaakatwaambila.”

⁴ Aboobo bantu bakalinga kwikalaamo, bakatalika kutyongosha baJuda akubayoosha ayi batatoleleli kuyaka.

⁵ Bakalipila maali bacinenenene ba kuPesha ayi bakashe mulimo kuya panembo. Bakacita boobo mubwaami bwakwe Sailasi wa kuPesha boonse kushikila amubwaami bwakwe Dalyasi wa kucishi ncemunya ico.

Buyumuyumu bwakacanika pakuyaka Jelusalemu alimwi

⁶ Kumatalikilo a bwaami bwakwe Sakisesi, bakalemba nkalata yakubekesha bantu ba kucishi ca Juda alimwi akundabala inene ya Jelusalemu.

⁷ Munshiku shakwe Atasakisesi mwaami wa kuPesha, Bishilamu, Mitiledati, Tabilu abamwi babyaabo bakalembela Atasakisesi nkalata. Nkalata iyo yakalembwa mumushobo wa ciAlamaiki, mpeeke yakasansululwa mumushobo unyumfwika pakwiibelenga.

⁸ Leyumu mweendeleshi aShimushayi mulembi bakalemba nkalata kumwaami Atasakisesi pacikani ca Jelusalemu ayi,

⁹ Leyumu mweendeleshi aShimushayi mulembi, pantu pomwi abamwi babyaabo, nkokwaamba ayi boomboloshi abacinenenene bamwi boonse ba kuTilipolisi, Pesha, Eleki, Babiloni alimwi abene Susa mucishi ca Elamu,

¹⁰ pantu pomwi abantu bamwi abo Ashubanipali wakalinga kulemekwa alimwi shinkusu mbwaakakusha mumaandaabo akubatola mumandabala a Samaliya amumisena imwi yakalinga mucishi cakwitala lya Mulonga wa Yufuletisi.

¹¹ Nkalata yakalinga kulembetwe ayi, “Kuli ndimwe nobaami baAtasakisesi kuswa kubasebenshi banu bashiite kwitala lya Mulonga wa Yufuletisi.

¹² Nobaami besu tulisuni kumwishibisha ayi bene Juda abo bakaswa kulubasu loolo kwisa kokuno bakaya kuJelusalemu akutalika kuyaka alimwi ndabala ilya ibiibi itanyumfwili. Bulya batalika kale kuyaka lubumbu alimwi bali pafwaafwi akulumanisha.

¹³ Ono nobaami mwishibe kwaamba ayi na ndabala inene iyi iyakwe alimwi, alubumbu lwa njiyo luyakwe, teshi bakanoopatala misonko ipusenepusene, aboobo maali akubwalo alaakuceya.

¹⁴ Ono ceebo cakwaamba ayi swebo tulasebensela ndimwe nobaami, tatusangalali kubona baami besu kabanyanshikwa. Paceebo ceeci twatuma maswi aya akumwishibisha nobaami

¹⁵ kwaamba ayi makani ayandoolwe mulibuku lya bamashali banu bakulukulu. Mulibuku ili mulaakucana kwaamba ayi ndabala inene iyi nindabala itanyumfwili alimwi yakalinga kupensha bamaami abameendeleshi. Bantu bamundabala inene iyi mbaashu kweendeleshekwa kuswabo kukalekale. Ncecakalenga ayi inyonyoolwe.

¹⁶ Aboobo tutoshibisha ndimwe nobaami ayi na ndabala iyi iyakwe alubumbu lwiimikwe, mwebo teshi mukabewo ankusu kwitala lya Mulonga wa Yufuletisi.”

¹⁷ Lyalo alakwe mwaami wakakumbula munkalata ayi, “Kuli Leyumu mweendeleshi, Shimushayi mulembi, babyaanu boonse bekala muSamaliya alimwi abamwi boonse bashiite kwitala lya Mulonga wa Yufuletisi, ndamwaansha.

¹⁸ “Nkalata njemwakatutumina yakabelengwa akusansululwa pameenso angu.

¹⁹ Ndakatuma bantu ayi bayandoole makani ayo ngomwakatulembela. Ncakwiila cakacanika kwaamba ayi ndabala inene ya Jelusalemu kuswabo kukalekale ngumusena wa bantu baashu alimwi beshikubusha shimfulunganya.

²⁰ Mundabala iyo mwakalinga bamaami beshinkusu abo bakalinga kweendelesha mandabala oonse a kwitala lya Yufuletisi, alimwi akunoopekwa misonko ipusenepusene.

²¹ Aboobo mwaambile bantu abo ayi bacileeke kusebensa kwaamba ayi ndabala iyo itayakwi alimwi kushikila nkasuminishe.

²² Mufwambaane kucita boobo kwaamba ayi bwaami bwangu butatoleleli kunyonyooka.”

²³ Nkalata iyi yakaswa kumwaami Atasakisesi ndiyakabelengwa kuli Leyumu, Shimushayi mulembi alimwi ababyaabo bamwi, bakafwambaana kuya kubaJuda kuJelusalemu akubakakatisha kucileka kuyaka.

²⁴ Aboobo mulimo wa kuyaka Ŋanda yakwe Lesa alimwi muJelusalemu wakeemikana kushikila mumwaaka wabili mubulelo bwakwe Dalyasi mwaami wa kuPesha.