Esila 10 - Baibo Busansulushi Bwa Libuku Ili

Bantu mbobakalyaambilila shibiibi

¹ Ono Esila ndyaakalinga kupaila akulyaambilila shibiibi, kaalila akuliwaala panshi kunembo lya Ŋanda yakwe Lesa, likoto linene lya bene Isilaeli, nkokwaamba ayi basankwa, banakashi alimwi abanike bakabungana kumushinguluka. Abalo bakalila abuumbi.

² Lyalo Shekaniya mwanaakwe Jeiyelo, womwi wa mucipani cakwe Elamu wakaamba kuli Esila ayi, “Twakabishisha Lesa wesu mukweeba banakashi baswamashi abo mbotushitaabo. Nakubi boobo lupulusho nkolucili kubene Isilaeli.

³ Anu atupange cipangano aLesa kwaamba ayi tutandaanye banakashi boonse abo pantu pomwi abana babo kweelana akuyanda kwanu a kwa baabo bamwi balemeka Milawo yakwe Lesa. Tutoocita kweelana aMilawo yakwe Lesa.

⁴ Amuyamuke, makani aya ali mumaansaanu. Tulaakumucafwa, amuliyuminishe akuya mukucicita.”

⁵ Mpeeke Esila wakanyamuka akulengesha bamatanjilili ba bapailishi, bene Lefi alimwi abene Isilaeli boonse kushomesha cakulumbila kucita shakaambwa. Lyalo bakalumbila.

⁶ Mpomunyaawo Esila wakaswaako kunembo lya Ŋanda yakwe Lesa akuya mucipinda cakwe Jewoanani mwanaakwe Eliyashibu. Ciindi ndyaakalinga momulya, taakwe kulya cakulya nabi kunwaawo cili coonse ceebo wakatolelela kulila pakubisha kwa bantu abo bakaswa mucishi ca busha.

⁷ Aboobo makani akatumwa mucishi ca Juda coonse alimwi amuJelusalemu kwaamba ayi boonse abo bakaswa mucishi ca busha babungane kuJelusalemu.

⁸ Uyo woonse weshi akabule kuya mukubungana munshiku shili shotatwe ulaakusowekelwa buboni bwakwe boonse kweelana abupingushi bwa bacinenenene alimwi abamaloba. Kuswawaawo ulaakukushikwa mulikoto lya baabo bakaswa mucishi ca busha.

⁹ Ono nshiku shotatwe kashitana kushikila, basankwa boonse bene Juda abene Benjameni bakabungana muJelusalemu, Pabushiku bwa makumi obilo mumweenshi wa yosanwe ayone, bantu boonse bakalinga kushiite mulubansa lwa Ŋanda yakwe Lesa, kabatutuma ceebo ca makani ayo anene alimwi amfuula.

¹⁰ Lyalo Esila mupailishi wakanyamuka akubaambila ayi, “Mwebo tamutooshomeka. Mulyeebete banakashi baswamashi, aboobo bene Isilaeli mwabanungilawo kubisha.

¹¹ Anu amulyaambilile shibiibi kuMwaami Lesa, Lesa wa bamashali banu bakulukulu akucita shimusangalasha. Amulitalamushe kubantu mbomwikalaabo akubamakaanu baswamashi.”

¹² Lyalo bantu boonse bakakumbula aliswi linene ayi, “Ncibotu. Tutoocita bweenka mbomwaamba.

¹³ Sombi bantu mbaanji bali waano alimwi itooloka cakwaamba ayi inga tatwiimikani pansengwe. Mulimo uyu teshi wakucita mubushiku bomwi nabi shobilo mukwiinga babishite mucikani ici pakati kesu mbaanji.

¹⁴ Bacinenenene besu abatwiimikanineeko. Kuswawaawo muntu uli woonse ukala mundabala yesu uyo weebete muswamashi akese paciindi cibambitwe, pantu pomwi abamaloba alimwi aboomboloshi ba mundabala yomwi ayomwi, tibili bukali buyoosha bwa Lesa wesu pacikani ici bukamane.”

¹⁵ Boonse bakasumina kukushakobo Jonasani mwanaakwe Asayelo aJaseiya mwanaakwe Tikifa, abo bakacafwikwa aMeshulamu alimwi aShabetayi mwine Lefi.

¹⁶ Aboobo bantu abo bakaswa mucishi ca busha bakacita bweenka ubo. Esila mupailishi wakasala basankwa abo bakalinga bamatanjilili ba bamumaanda, womwi kuswa mucipani comwi acomwi akulemba meenaabo. Pabushiku butaanshi mumweenshi wa likumi bakekala panshi akutalika kuyandoola makani ayo.

¹⁷ Pabushiku butaanshi mumweenshi utaanshi, bakamanisha kubamba makani abasankwa boonse abo bakalinga kweebete banakashi baswamashi.

Basankwa bakalinga kweebete banakashi baswamashi

¹⁸ Mulunyungu lwa bapailishi, bakalinga kweebete banakashi baswamashi mbaaba: Kuswa mubamulunyungu lwakwe Jeshuwa mwanaakwe Josadaki abamakwabo nguMaseiya, Eliyesa, Jalibu alimwi aGedaliya.

¹⁹ Lyalo bantu aba bakashomesha kulekana abamakaabo alimwi bakabenga mbelele isankwa kuswa mulitanga ayi ngumulambu wakumana mulandu.

²⁰ Kuswa mubamulunyungu lwakwe Ima nguAnani alimwi aSebadiya.

²¹ Kuswa mubamulunyungu lwakwe Alimu nguMaseiya, Elija, Shemiya, Jeiyelo alimwi aUsiya.

²² Kuswa mubamulunyungu lwakwe Pasha nguElionayi, Maseiya, Ishimaeli, Netanelo, Josabadi alimwi aElasa.

²³ Kuswa kubene Lefi nguJosabadi, Shimeyi, Kelayiya nabi ayi Kelita, Petaiya, Juda alimwi aEliyesa.

²⁴ Kuswa kubeshikwiimba nguEliyashibu. Kuswa kubeshikulama paminjililo nguShalumu, Telemu alimwi aUli.

²⁵ Kuswa kubene Isilaeli bamwi boonse mbaaba: Kuswa mubamulunyungu lwakwe Paloshi nguLamiya, Isiya, Malukija, Mijamini, Eleyasa, Malukija alimwi aBenaiya.

²⁶ Kuswa mubamulunyungu lwakwe Elamu nguMataniya, Sekaliya, Jeiyelo, Abidi, Jelemoti alimwi aElija.

²⁷ Kuswa mubamulunyungu lwakwe Satu nguElionayi, Eliyashibu, Mataniya, Jelemoti, Sadadi alimwi aAsisa.

²⁸ Kuswa mubamulunyungu lwakwe Bebayi nguJewoanani, Ananiya, Sabayi alimwi aAtilayi.

²⁹ Kuswa mubamulunyungu lwakwe Bani nguMeshulamu, Maluci, Adayiya, Jashubu, Sheyali alimwi aJelemoti.

³⁰ Kuswa mubamulunyungu lwakwe Paati Moabu nguAdina, Kelali, Benaiya, Maseiya, Mataniya, Besaleli, Binuyi alimwi aManase.

³¹ Kuswa mubamulunyungu lwakwe Alimu nguEliyesa, Ishija, Malukija, Shemaya, Shimyoni,

³² Benjameni, Maluci alimwi aShemaliya.

³³ Kuswa mubamulunyungu lwakwe Ashumu nguMatenayi, Matata, Sabadi, Elifeleti, Jelemayi, Manase alimwi aShimeyi.

³⁴ Kuswa mubamulunyungu lwakwe Bani nguMadayi, Amulamu alimwi aUwelo,

³⁵ Benaiya, Bedeyiya, Keluyi,

³⁶ Faniya, Melemoti, Eliyashibu,

³⁷ Mataniya, Matenayi alimwi aJaasu.

³⁸ Kuswa mubamulunyungu lwakwe Binuyi nguShimeyi

³⁹ Shelemiya, Natani, Adayiya,

⁴⁰ Makinadebayi, Shashijayi, Shalayi,

⁴¹ Asalelo, Shelemiya, Shemaliya.

⁴² Shalumu, Amaliya alimwi aJosefu.

⁴³ Kuswa mubamulunyungu lwakwe Nebo nguJeiyelo, Matitiya, Sabadi, Sebina, Jadayi, Jowelo alimwi aBenaiya.

⁴⁴ Anu boonse aba mbobakalinga kweebete banakashi baswamashi. Mpeeke bakabaleka akubatanda pantu pomwi abana babo.