Esila 1 - Baibo Busansulushi Bwa Libuku Ili

Mwaami Sailasi mbwaakacafwa baJuda kuboolela kuJelusalemu

¹ Mumwaaka wakutaanguna wa bwaami bwakwe Sailasi mucishi ca Pesha, mukulengesha maswi a Mwaami Lesa ayo akaamba Jelemiya kucitika cancinencine, Mwaami Lesa wakaambila Sailasi ayi aambilishe mulawo uyo alimwi akuulemba ayi ubelengwe mubwaami bwakwe boonse.

² Wakalemba ayi, “Uku nkokwaamba kwangu nebo neSailasi mwaami wa bene Pesha. Mwaami Lesa, Lesa wa kwiculu, wampa nkusu shakulela cishi ca panshi coonse alimwi ashakuyaka Ŋanda yakwe muJelusalemu mucishi ca Juda.

³ Lesa abe amwebo noonse nomuli mumaansaakwe. Mulyeelete kuya kuJelusalemu mukuyaka Ŋanda ya Mwaami Lesa, Lesa wa bene Isilaeli, Lesa ulambilwa muJelusalemu.

⁴ Na bantu bakwe bamwi bali mushishi sha busha kabasuni kucafwikwa ayi baboolele kumishaabo, beshikamukobonyinaabo balyeelete kubacafwa. Balyeelete kubapa silifa, golodi, shakulya, shifubwa alimwi ashipo sha kuŊanda yakwe Lesa muJelusalemu.”

⁵ Aboobo bamanene ba shipani sha mumukowa wakwe Juda awakwe Benjameni, bapailishi abene Lefi alimwi abaabo boonse Lesa mbaakalengesha myoyo kupya, bakalibambila kuya mukuyaka Ŋanda ya Mwaami Lesa muJelusalemu.

⁶ Beshikamukobonyinaabo boonse bakabacafwako akubapa shintu shiinji, nkokwaamba ayi mbale sha silifa, golodi, shakulya, shifubwa, shamakwebo shimwi pantu pomwi ashipo sha kuŊanda yakwe Lesa.

⁷ Mpeeke mwaami Sailasi wakababoshesha mbale ankomeshi isho mwaami Nebukadinesa nshaakakusha muŊanda ya Mwaami Lesa muJelusalemu akushibika muŋanda ya balesa bakwe.

⁸ Sailasi mwaami wa bene Pesha wakatuma Mitiledati shikulama buboni ayi ashileete. Lyalo wakashibala akushipa Sheshibasa mweendeleshi wa cishi ca Juda.

⁹ Shintu isho shakalinga Mbale shifongomene sha golodi 30 Mbale shifongomene sha silifa 1,000 Mbale shifongomene shimwi 29

¹⁰ Mbale shifongomene shiniini sha golodi 30 Mbale shifongomene shiniini sha silifa 410 Shisebensesho shimwi 1,000.

¹¹ Shintu isho sha golodi alimwi asha silifa pantu pomwi shakalinga 5,400. Sheshibasa wakatolelela shintu isho shoonse ciindi abo bakalinga mucishi ca busha ndibakaswa muBabiloni akuya kuJelusalemu.