Esekelo 9 - Baibo Busansulushi Bwa Libuku Ili

Kucaikwa kwa bakalinga hulambila shibumbwabumbwa

¹ Mpeeke ndakanyumfwa Lesa kaaolobesha ayi, “Amubalete kokuno beshikunyonyoola ndabala, womwi awomwi kaacite cakulwanishaako mulyaansa lyakwe.”

² Mpomunyaawo ndakabona basankwa bosanwe awomwi kabaswita kulubasu lwa mwinjililo wa peculu ulangite kumatwa, womwi awomwi kaacite cilwanisho cicaya. Pabantu aba pakalinga amuntu wakalinga kufwete shakufwala sha nsalu iteshimite uyo wakalinga kucite shilembesho palubasu lwakwe. Bakenjila akwiimikanina kulubasu lwa cipaililo ca bulonse.

³ Lyalo mumuni utowa uyo utondesha bulemu bwakwe Lesa wa bene Isilaeli wakanyamuka akuya mwiculu kuswa pabakelebu apo mpowakalinga kwikala akuya mukushika kumwinjililo wa Ŋanda yakwe Lesa. Mpomunyaawo Mwaami Lesa wakeeta muntu uyo wakalinga kufwete shakufwala sha nsalu iteshimite uyo wakalinga kucite shilembesho palubasu

⁴ akumwaambila ayi, “Koya mundabala ya Jelusalemu yoonse ukabike cishibilo pankumo sha baabo boonse batoolila akupenshekwa mumyoyo ceebo ca shintu shilensha bunya shitoocitwa muli njiyo.”

⁵ Kaanyumfwite wakaambila bamwi ayi, “Amumukonkele mundabala akucaya. Mutanyumfwiliwo nkumbu nabi kulangabo muntu uli woonse.

⁶ Muye mucaye bacembele, bacikula bwangu basankwa abanakashi, banakashi banene abanike, sombi kuteelesha kukumya wooyo ucite cishibilo. Mutalikile muŊanda yangu isalalite.” Aboobo bakatalikila bamaloba abo bakalinga kunembo lya Ŋanda yakwe Lesa.

⁷ Mpomunyaawo Lesa wakabaambila ayi, “Amubishe Ŋanda yangu mukwisusha lubansa lwa njiyo amituntu ya bantu bacaikwa. Kamuya ono!” Aboobo bakaya akutalika kucaya bantu mundabala iyo yoonse.

⁸ Ono kabaciya bucaya, nebo ndindakacaala neenka, ndakafukama cakushisha ciwa panshi akulila ayi, “Maawe noBaami balesa Beshinkusu shoonse! Sa mutooyanda kucaya boonse bakacaalaawo pabene Isilaeli mubukali bwanu buyoosha mbomwapoomweta pandabala ya Jelusalemu?”

⁹ Lyalo wakankumbula ayi, “Shibiibi sha bene Isilaeli abene Juda nshinene abuumbi. Cishi ciliswitebo beshikutila bulowa ayalo ndabala ya Jelusalemu iliswitebo shitaluleme. Balo balaamba ayi, ‘Mwaami Lesa cishi wakacisuula. Ncakwiila nshetutoocita taashibweneewo.’

¹⁰ Aboobo teshi nkabafwitewo nkumbu nabi kubalangabo, sobwe. Sombi ndaakubacitila bweenka mbobakacitila bamwi.”

¹¹ Mpeeke muntu uyo wakalinga kufwete shakufwala sha nsalu iteshimite alimwi ucite shilembesho palubasu wakesa mukuluula ayi, “Ndaciita kweelana ambomwakantuma.”