Esekelo 8 - Baibo Busansulushi Bwa Libuku Ili

CILI ANGA NCILOTO CABILI ( 8:1—10:22 ) Mbobalambila shibumbwabumbwa muJelusalemu

¹ Pabushiku bwasanu, mumweenshi wasanu awomwi, mumwaaka wasanu awomwi, ndakalinga kushiite muŋanda yangu abamaloba ba bene Juda. Cakuteengashila, nkusu sha Mwaami Lesa Shinkusu shoonse shakanselukila.

² Mpeeke ndindakalangilisha kwiculu ndakabona cakalinga kuboneka anga ngumuntu. Kuswa mubukome kuya panshi wakalinga kuboneka anga ngumulilo. Kuswa mubukome bwakwe kuya peculu, ndakabona cakalinga kuboneka anga nceela casalala kukulungula mumulilo.

³ Wakatandabika cakalinga kuboneka anga ndyaansa akunyamwita kumisusu. Mpomunyaawo mucili anga nciloto ico, Mushimu wakwe Lesa wakanyamuna kuntola pakati ka liculu acishi ca panshi akuntola kuJelusalemu. Wakantola kumulyango wa mwinjililo wa kumatwa wa lubansa lwa mukati lwa Ŋanda yakwe Lesa. Kumulyango uko kwakalinga kwiimfwi cibumbwabumbwa cakalinga kukalasha Mwaami Lesa.

⁴ Ono kunembo lyangu ndakabona mumuni utowa uyo utondesha bulemu bwakwe Lesa wa bene Isilaeli bweenka mbondakoobona kufwaafwi aMulonga wa Keba.

⁵ Mpomunyaawo Lesa wakaŋambila ayi, “Webo omuntu, langa kulubasu lwa kumalenge.” Anebo ndakacebuka akubona cibumbwabumbwa ico cikalasha Mwaami Lesa kufwaafwi acipaililo munshaamulyango wa kumwinjililo.

⁶ Mpeeke Lesa wakaŋambila ayi, “Webo omuntu, washibona nshebatoocita kuno bene Isilaeli isho shilensha bunya? Shintu isho shitoontalamusha kuswa kumusena wangu usalalite akuyabo kulaale? Sombi ulaakubona ashimwi shilensha bunya shiinda sheeshi.”

⁷ Mpomunyaawo wakantola kumwinjililo wa lubansa. Lyalo ndakalanga akubona bulyango mulubumbu.

⁸ Mpeeke wakaŋambila ayi, “Webo omuntu, kaba mulubumbu apa. Aboobo ndakakabaamo akucana mulyango.”

⁹ Mpomunyaawo wakaŋambila ayi, “Njila mukati ubone shintu shilensha bunya nshebatoocita umo.”

¹⁰ Aboobo ndakenjila, ndalangalanga akubona lubumbu loonse kalutalitwe nsoka ashinyama shitasalalite kweelana aMilawo. Mwakalinga kutalitwe ashibumbwabumbwa shoonse bene Isilaeli nshebakalinga kulambila.

¹¹ Kunembo lya nshisho kwakalinga kwiimfwi bamaloba ba bene Isilaeli bali 70, kubikaawo aJaasaniya mwanaakwe Shafani. Womwi awomwi wakalinga kucite cakutentelawo tununkila kabotu mulyaansa lyakwe, kakusuntabo bwiishi bwa tununkila kabotu.

¹² Mpeeke Lesa wakanjipusha ayi, “Webo omuntu, sa wabona bamaloba ba bene Isilaeli mbobatoocita mubushishi? Womwi awomwi utoolambila cibumbwabumbwa cakwe. Balo balaamba ayi, ‘Mwaami Lesa taatubweneewo, ncakwiila cishi wakacisuula.’ ”

¹³ Kuswawaawo wakaŋambila ayi “Utoobabona kabacita shintu shilensha bunya kwiinda sheeshi.”

¹⁴ Lyalo wakantola kumulyango wa mwinjililo wa kumatwa wa Ŋanda ya Mwaami Lesa. Uko ndakabona banakashi bakalinga kushiite kabalila lesa wiitwa ayi Tamusi.

¹⁵ Mpeeke wakaŋambila ayi, “Webo omuntu, sa te washibona ishi? Utoobona shintu shilensha bunya kwiinda sheeshi.”

¹⁶ Kuswawaawo wakantola mulubansa lwa mukati lwa Ŋanda ya Mwaami Lesa. Ono kumwinjililo wa Ŋanda iyi pakati ka mwinjililo ushitilishitwe acipaililo, pakalinga basankwa bakalinga mpashi 25. Bakalinga kufutatilite Ŋanda ya Mwaami Lesa kabalangite kwicwe. Bantu abo bakalinga kukoteme kabalambila lisuba lyakalinga kuswa.

¹⁷ Mpomunyaawo wakaŋambila ayi, “Webo omuntu, sa te washibona ishi? Sa taaku mbocibete kubene Juda bulya mbobatoocita shintu ishi shilensha bunya kuno? Sa balyeelete kususha cishi ashalunkutwe akunoosonkomonabo bukali bwangu? Bona mbobatooncobola munshila iindaawo kukalasha iyo njebakonsha!

¹⁸ Paceebo ceeco, balaakunyumfwa cilemeneshi coonse ca bukali bwangu. Teshi nkamufwite nkumbu nabi kumulangabo. Teshi nkakutikewo mipailo yabo nabi bakanokoolobesha cili buyani.”