Esekelo 7 - Baibo Busansulushi Bwa Libuku Ili

Meelelesho a Isilaeli ali pafwaafwi

¹ Mwaami Lesa wakaŋambila ayi,

² “Webo omuntu, pacishi ca Isilaeli, nebo neMwaami Lesa Shinkusu shoonse ndaamba ayi, ‘Aya ngomeelelesho! Meelelesho ashika kumbasu shoonse shone sha cishi.

³ “ ‘Nobene Isilaeli meelelesho ono amushikila ceebo ntooyanda kumuletela bukali bwangu. Ndaakumoombolosha kweelana amicito yanu akumupa mulandu pashintu shilensha bunya nshemwakacita.

⁴ Teshi nkamufwite nkumbu nabi kumulangabo, sobwe. Ndushinisho ndaakumupa mulandu kweelana amicito yanu alimwi ashintu shilensha bunya nshemwakacita. Lyalo ndyeshi mukeshibe ayi nebo ndi Mwaami Lesa.’

⁵ “Mwaami Lesa Shinkusu shoonse waamba ayi, ‘Mapensho, ee, mapensho atoosa ayo atana kunyumfwikaawo kale.

⁶ Meelelesho ashikila! Ncakwiila aya ngomeelelesho! Ndushinisho mwebo mwamana katyenke!

⁷ Meelelesho ashikila pali ndimwe nobantu nomushiite mucishi ici. Ciindi cashikila, bushiku buli pafwaafwi, bushiku bwakupilingana peculu lya tulundu kuteshi kusangalala.

⁸ “ ‘Ono cakufwambaana ntoomulengesha kunyumfwa cilemeneshi coonse ca bukali bwangu. Ndaakumoombolosha kweelana amicito yanu akumupa mulandu pashintu shilensha bunya nshemwakacita.

⁹ Teshi nkamufwite nkumbu nabi kumulangabo, sobwe. Ndushinisho ndaakumupa mulandu kweelana amicito yanu alimwi ashintu shilensha bunya nshemwakacita. Lyalo ndyeshi mukeshibe ayi nebo ndi Mwaami Lesa uyo umupa mulandu.’ ”

¹⁰ Bushiku bwashikila! Ndushinisho ciindi cashikila! Mapensho akomena abuumbi, shalunkutwe shitooya cishimpa akulisumpula kwasapula buluba.

¹¹ Shalunkutwe shaba musako wakupeshaako milandu bamucita shibi abo. Taaku bantu beshi bakacaaleewo. Taaku cintu nabi comwi ca shintu shanu ceshi cikacaaleewo. Nkokwaamba ayi taaku buboni bwabo nabi cintu cili coonse camakwebo ceshi cikacaaleewo.

¹² Ciindi cashikila, bushiku bwashika. Shikuula atasangalali, alakwe shikuulisha atoongumani ceebo bukali buli pabantu boonse.

¹³ Shikuulisha teshi akacane tubili musena uyo ngwaakoolisha mubuumi bwakwe boonse ceebo bukali bwa Mwaami Lesa bulaakushikila bamucita shibi boonse. Taaku aweshi akacaaleewo ceebo cakucita shibiibi.

¹⁴ Nabi bakalishe lupeenga akubamba shoonse, taaku nabi womwi weshi akaye kunkondo ceebo bukali bwangu buli pamuntu woonse.

Bene Isilaeli mbobakapekwa mulandu ceebo ca shibiibi shabo

¹⁵ Pansengwe pali nkondo, mukati muli mwaalu ansala. Abo bali mumishi balaakufwa kunkondo abalo abo bali mundabala inene balaakucaikwa kunsala akumwaalu.

¹⁶ Boonse abo beshi bakapuluke akuloboka balaakuya kutulundu uko nkweshi bakanoolila buumba anga nimpolobe bamushinyika. Muntu womwi awomwi ulaakunoolila ceebo ca shibiibi shakwe.

¹⁷ Maansa oonse alaakubabo lempwete amumanungo oonse mulaakuboolabo tontolo.

¹⁸ Balaakufwala masaka akututuma kuboowa. Balaakunyumfwa nsoni amitwi yabo ilaakukululwa.

¹⁹ Balaakusowa silifa agolodi wabo mumikwakwa anga ngamatombe. Silifa a golodi wabo teshi ukabapulusheewo pabushiku bwa bukali buyoosha bwa Mwaami Lesa. Teshi bakashisebenseshewo kumana nsala yabo nabi kubakutisha ceebo ngowakabalengesha kubisha.

²⁰ Bakalinga kulisumpula pashakulibotesha shabo shibotu akushisebensesha kupanga shibumbwabumbwa shabo shileensha bunya ashikoshanyo shifundoosha kumoyo. Paceebo ceeco Mwaami Lesa ulaakulengesha bubile bwabo kuba anga ngamatombe kuli mbabo.

²¹ Mwaami Lesa waamba ayi, “Ndaakulengesha bubile bwabo kusaalwa kubaswamashi alimwi akutolwa kubamucita shibi bamucishi abo beshi bakabukoweshe.

²² Lyalo ndaakufutatila kashanga bantu abo kwaamba ayi bakabishe Ŋanda yangu iyo njeensunishi. Beepi balaakwinjila muli njiyo akwiibisha.

²³ “Amubambe ncetani ceebo cishi ciliswitebo beshikutila bulowa aalo mandabala oonse anene aliswitebo shalunkutwe.

²⁴ Ndaakuleta mishobo iindaawo kubica kwisa mukubwesa maandaanu. Ndaakumanisha kulisumpula kwa beshinkusu alimwi amisena yanu isalalite ilaakubishikwa.

²⁵ Ono shintu shiloondesha shaakumupolela mulaakuyandoola luumuno, sombi teshi mukalucaneewo.

²⁶ Mapensho alaakwisa pamapenshonyina aalo maŋwiŋwi abiibi alaakunootungenebo kalongo. Mulaakunoosenga ayi balaluki bamulwiite nshebabona mushili anga nshiloto. Bapailishi balaakucileka kwiisha bantu milawo abalo bamaloba balaakucileka kupanda maano.

²⁷ Mwaami ulaakulila buumba, mwanaamwaami musankwa ulaakutyongola aalo maansa a bantu ba mucishi alaakunootutuma. Ndaakumupa mulandu kweelana amicito yanu akumoombolosha bweenka mbomwakalinga koombolosha bamwi. Lyalo mulaakwishiba ayi nebo ndi Mwaami Lesa.”