Esekelo 6 - Baibo Busansulushi Bwa Libuku Ili

Mwaami Lesa mbwaapatite shibumbwabumbwa

¹ Mwaami Lesa wakaŋambila ayi,

² “Webo omuntu, langa kutulundu twa Isilaeli akutulalukila mapensho.

³ Ulwiite tulundu twa Isilaeli ayi tukutike maswi angu neMwaami Lesa. Tukutike maswi ayo nebo neMwaami Lesa Shinkusu shoonse ngoontokwaamba kuli ntuto, nkokwaamba ayi tunene atuniini, kumimpwaampwa ya ntuto alimwi akushinyika. Nebo ntokwaamba ayi, ‘Ndaakutuma nkondo akunyonyoola misena iyo bantu njebalambilaako shibumbwabumbwa.

⁴ Shipaililo shakubengelawo milambu shilaakumwayoolwa asheesho shakutentelawo tununkila kabotu ndaakushipwayoola. Ndaakucaya bantu abo kunembo lya shibumbwabumbwa shabo.

⁵ Ndaakukungubika mituntu ya bene Isilaeli kunembo lya shibumbwabumbwa shabo akupalanganya mafuwa abo kushingulusha shipaililo shabo.

⁶ Uko koonse bantu abo nkweshi bakanookala, mandabalaabo anene alaakunyonyoolwa. Misena yabo yakulambililaako ya patulundu ilaakupumununwa cakwaamba ayi shipaililo shabo shakubengelawo milambu shilaakunyonyoolwa. Ashalo shibumbwabumbwa shabo shilaakupwayoolwa pantu pomwi ashipaililo shabo shakutentelaawo tununkila kabotu. Lyalo shintu shoonse nshebakapanga shilaakushiminganishikwa

⁷ Bantu balaakucaikwa pakati kabo kumbasu shoonse sha cishi. Abo beshibakacaaleewo balaakusumina ayi nebo ndi Mwaami Lesa.

⁸ “ ‘Nakubi boobo bamwi ndaakubaleka ayi baloboke kucaikwa uko, sombi ndaakubapalanganishisha pakati ka mishobo ya mucishi ca panshi coonse.

⁹ Lyalo mumishobo iyo mweshi bakatolwe busha, balaakunjeeya akwishiba kwaamba ayi ndime ndabapa mulandu akubalensha nsoni. Ndaakucita boobo ceebo myoyo yabo itashomeki yamfutatila akusandukila kushibumbwabumbwa. Balaakulipata beene ceebo ca bubi bwabo ashintu shilensha bunya isho nshebacita.

¹⁰ Balaakwishiba kwaamba ayi nebo ndi Mwaami Lesa alimwi akwaamba ayi kucenjesha kwangu takukwe kuyabo amaanshi.’ ”

¹¹ Mwaami Lesa Shinkusu shoonse waamba ayi, “Amukambe mapaka, mulishe minkiti panshi akulila ayi, ‘Maawe!’ ceebo ca bubi boonse ashintu shilensha bunya isho bene Isilaeli nshebacita. Balaakufwa kunkondo, kunsala akumwaalu.

¹² Abo bali kulaamfu balaakufwa kumwaalu. Abo bali pafwaafwi balaakufwa kunkondo. Abalo abo beshi bakapuluke akucaalaawo, balaakufwa kunsala. Anu ubo mbweshi nkabalengeshe kunyumfwa cilemeneshi coonse ca bukali bwangu.

¹³ Lyalo balaakwishiba ayi ndi Mwaami Lesa, bene mishaabo baakukungubala pakati ka shibumbwabumbwa shabo, kushinguluka shipaililo shabo patulundu tulaamfu toonse, peculu lya tulundu tumwi toonse, munshaashisamu shoonse shicite shimfule shibotu alimwi amushisamu sha mibanga shoonse shicite matewu. Nkokwaamba ayi kumisena yoonse uko nkobakalinga kutentela tununkila kabotu kushibumbwabumbwa shabo shoonse.

¹⁴ Ndaakufungulula lyaansa lyangu akunyonyoola cishi cabo kuswa kuluyanga lwakumalenge kuya mukushika kuLibula kumatwa. Nkokwaamba ayi koonse uko nkobashiite. Lyalo ndyeshi bakeshibe ayi nebo ndi Mwaami Lesa.”