Esekelo 5 - Baibo Busansulushi Bwa Libuku Ili

Esekelo mbwaakacesa misusu yakwe

¹ Ono Mwaami Lesa wakaŋambila ayi, “Webo omuntu, bwesa mupeeni ukolete uusebenseshe anga nkanesala kukulula ndesu shako akucesa misusu yako. Wamanisha upime misusu yako pashakupimisha akwiipansaanya mushipansha shotatwe.

² Nshiku shako shakulwana ndabala ya Jelusalemu shaakwiinda, ukateente cipansha comwi mumulilo mundabala. Kuswawaawo ukabwese cipansha cimwi akucitimboola amupeeni kushinguluka ndabala yoonse. Cipansha cakweelaako ukacuululushe amuuwo ceebo ndaakubatandaanya amupeeni.

³ Nakubi boobo ukafweemunewo misusu iniini akwiifungila mumupeto wa cakufwala cako.

⁴ Ono ukabweseewo tuniini panjiyo akutuwaala mumulilo ayi tupye. Mutumisusu uto mweshi mukaswe mulilo uyo weshi ukamwaikile kumushobo woonse wa bene Isilaeli.”

⁵ Mwaami Lesa Shinkusu shoonse waamba ayi, “Iyi nindabala ya Jelusalemu iyo njendakabika pakati ka cishi ca panshi coonse. Ncakwiila mishobo imwi yoonse iliishingulukite.

⁶ Nakubi boobo ceebo cakubisha kwa bamundabala iyo bakaashukila milawo amilasho yangu kwiinda mishobo imwi ashishi isho shibashingulukite. Ncakwiila bakakaka milawo yangu alimwi tabakwe kukonkela milasho yangu.

⁷ “Paceebo ceeco nebo neMwaami Lesa Shinkusu shoonse ndaamba ayi, ‘Bwaashu bwanu bwakomena kwiinda mishobo imushingulukite alimwi tamukonkeli milasho amilawo yangu. Sombi mwakonkela milawo ya mishobo imwi imushingulukite.’

⁸ “Aboobo nebo neMwaami Lesa Shinkusu shoonse waamba ayi, ‘Nebo nemwiine ntoomulwana mwebo nobene Jelusalemu alimwi ndaakukupa mulandu bamumishobo imwi kababweneeko.

⁹ Ceebo ca shibumbwabumbwa shanu shilensha bunya, ndaakumucita nceentana kucitawo kale alimwi teshi nkacicitewo tubili.

¹⁰ Paceebo ceeco bamashali pakati kanu balaakutalika kulya bana babo, abalo baana balaakunoolya bamashali babo. Ndaakumupa mulandu akupalanganya baabo beshi bakacaaleewo mumbasu shoonse.’

¹¹ “Aboobo nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, mbweeke ubo ceebo cakwaamba ayi mwakalengesha musena wangu usalalite kutanoosalalite kweelana aMilawo kwiinda mushikoshanyo shanu amicito ilensha bunya, ndaakumunyonyoola cakutamufwitaawo nkumbu.

¹² Cipansha comwi ca shotatwe pakati kanu cilaakufwa kumwaalu nabi kuloba ceebo ca nsala mukati mundabala. Cipansha cimwi cilaakufwa kunkondo pansengwe lya lubumbu lwa njiyo. Ingayi cipansha catatu ndaakucipalanganishila kumbasu shoonse sha cishi mukucitandaanya amupeeni usomwetwe.

¹³ “ ‘Cilemeneshi ca bukali bwangu buyoosha boonse mulaakucinyumfwa ndaakumana kuboosha cishole. Pakumana kubatondesha bukali bwangu buyoosha, ndyeshi bakeshibe kwaamba ayi nebo neMwaami Lesa ndaamba kuli ndimwe ceebo ndikalalite abuumbi pakutashomeka kwanu.

¹⁴ “ ‘Ndaakumunyonyoola akumulengesha kucoboka pakati ka mishobo imushingulukite akubeshikwiindabo.

¹⁵ Ncakwiila ndaakumulengesha kuba cintu ceelete kucobolwa akucelebulwa. Mulaakuba cintu cakucenjesheshaako alimwi cintu ciloondesha kumishobo imushingulukite. Ishi shilaakucitika bushiku ndaakumupa mulandu mubukali bwangu, ee, mubukali buyoosha alimwi amukumukalalila cankusu. Nebo neMwaami Lesa ndaamba.

¹⁶ Ndaakunyonyoola shishango shanu akumulengesha kufwa kunsala. Mulaakunyumfwa kucisa kwa nsala anga njimifwi ikolete iyo yakatumwa kwaamba ayi imucaaye.

¹⁷ Ndaakutuma nsala abanyama bamuluundu pali ndimwe mukucaya bana banu. Ndaakutuma mwaalu, kutila bulowa ankoondo mukumucaya. Nebo neMwaami Lesa ndaamba.’ ”