Esekelo 48 - Baibo Busansulushi Bwa Libuku Ili

Cishi mbocakabaanishikwa pakati ka mikowa

^1-7 “Nyinsa yakumatwa ilaakunooswa kuLweenge lwa Mediteleniyani akululama kwicwe mundabala inene ya Etiloni kuya mukwiinda kumwinjililo wa kuAmati, kuya kundabala ya Asa Enani akushika kunyinsa ili pakati ka bulelo bwa Damasikasi alimwi abwa Amati. Mukowa womwi awomwi ulaakupekwa cipansha comwi ca cishi kuswa kunyinsa yakwicwe kuya kumbo tibili akuLweenge lwa Mediteleniyani. Ono mbulya mikowa mbweshi ikakonkane pakupekwa shipansha sha cishi kuswa kulubasu lwakumatwa kuya kulubasu lwakumalenge. Dani Asha Nafutali Manase Efuleemu Lubeni Juda

Cipansha ca pakati cisalalite

⁸ “Ono kweela cipansha ca mukowa wa bene Juda, kuswa kulubasu lwakwicwe kuya kumbo kulaakuba cipansha ico nceshi mukape ayi ncipo cipuseneeko. Cilaakuba makilomita ali 12.5 mubufwaafwi. Ono mubulaamfu kuswa kwicwe kuya kumbo cilaakunokweelenebo ashipansha shoonse sha mikowa imwi yoonse. Ŋanda yangu ilaakunooli pakati ka cipansha ico.

⁹ “Mucipansha ico, musena upuseneeko ucite makilomita ali 12.5 mubulaamfu amakilomita ali 10 mubufwaafwi ulyeelete kupekwa kuli ndime neMwaami Lesa.

¹⁰ Cipansha ico nceshi mukatimbwiteko bapailishi. Kuswa kwicwe kuya kumbo cipansha cabo cilyeelete kuba amakilomita ali 12.5. Kuswa kumatwa kuya kumalenge cilyeelete kuba amakilomita ali 5. Ŋanda yangu ilyeelete kuyakilwa pakati ka cipansha ico.

¹¹ Musena usalalite uyo ulaakuba wa bapailishi ba mulunyungu lwakwe Sadoki ceebo balo bakansebensela cakushomeka. Tabakwe kukonkela bene Isilaeli boonse mukubisha bwakacita bamumukowa wa bene Lefi bamwi.

¹² Paceebo ceeco balyeelete kupekwa musena ubambene awa bene Lefi alimwi ulaakuba musena usalalite kwiinda misena yoonse.

¹³ Bene Lefi balaakupekwa musena uli kumalenge lya musena wa bapailishi. Musena uyo ulyeelete kuba amakilomita ali 12.5 mubulaamfu kuswa kwicwe kuya kumbo amakilomita ali 5 mubufwaafwi kuswa kumatwa kuya kumalenge.

¹⁴ Mucipansha ico taaku musena weelete kuulishikwa, kushintwa nabi kupekwa kumuntu umwi. Cipansha ico ncibotu kwiinda shimwi shoonse, cilisalalite alimwi ncaangu neMwaami Lesa.

¹⁵ “Sombi musena weshi ukacaale kucipansha cipuseneeko uyo ucite makilomita 12.5 mubulaamfu alimwi amakilomita 2.5 mubufwaafwi toosalaliteewo, sobwe. Musena uyo walo bantu boonse inga bausebensesha munshila ili yoonse. Nkokwaamba ayi inga bayakamo maanda akweembelelaamo. Ndabala inene ilyeelete kuyakilwa pakati ka cipansha ico.

¹⁶ Ndabala iyo ilaakunokweelene mumbasu shone shoonse. Ilaakunoocite mamita ali 2,250 mumbasu shoonse.

¹⁷ Mulyeelete kushiya mafulo kushinguluka ndabala iyo yoonse acite mamita 125 mubufwaafwi.

¹⁸ Ono pesule lya kuyaka ndabala, kumalenge lya musena usalalite kulaakucaala misena yobilo. Musena wakwicwe ulaakuba amakilomita ali 5 mubulaamfu amakilomita ali 2.5 mubufwaafwi. Awalo musena wakumbo ulaakuba amakilomita ali 5 mubulaamfu alimwi amakilomita ali 2.5 mubufwaafwi. Misena iyo ilaakunooli myuunda ya bantu ba mundabala.

¹⁹ Muntu uli woonse uyo weshi akanookala mundabala iyo, kacitacite mulandu na ngwa mumukowa wakwe ni, ulaakunoolima mumisena yeenka iyo.

²⁰ “Musena wa pakati ka cipansha ico ceshi cikapekwe kuli ndime neMwaami Lesa cilaakunoocite makilomita ali 12.5 mumbasu shone shoonse. Musena wa ndabala inene ulaakuba mweenka mumusena uyo.

^21-22 “Ono kwicwe akumbo lya musena uyo weshi ukanooyakitwemo Ŋanda yangu, muli cipansha ca bapailishi, cipansha ca bene Lefi alimwi andabala inene, musena weshi ukacaaleeko ngwa muleli. Musena uyo ulaakunooswa kumusena usalalite kuya kunyinsa yakwicwe, alimwi akuswa kumusena usalalite uyo kuya kumbo kuLweenge lwa Mediteleniyani. Musena uyo ulapaana nyinsa acipansha ca bene Juda kumatwa, akupaana nyinsa acipansha ca bene Benjameni kumalenge.

Shipansha sha mikowa imwi

^23-27 “Kumalenge lya musena upuseneeko uyo, mukowa womwi awomwi wacaalaawo ulaakupekwa cipansha comwi ca cishi kuswa kunyinsa yakwicwe kuya kuLweenge lwa Mediteleniyani kumbo. Ono mbulya mikowa iyo mbweshi ikakonkelane pakupekwa kuswa kulubasu lwakumatwa kuya kulubasu lwakumalenge. Benjameni Simyoni Isaka Sebuluni Gadi

²⁸ Kumalenge lwa cipansha ceshi cikapekwe kumukowa wakwe Gadi, nyinsa ilaakuswa kuTama kuya kushishiba sha kuKadeshi Meliba kuya mweela nyinsa ya Ijipiti tibili akuLweenge lwa Mediteleniyani.

²⁹ “Anu ubo mbweshi mukabaanye cishi mushipansha kubene Isilaeli ayi nshabo. Nebo neMwaami Lesa Shinkusu shoonse ndaamba.

Minjililo ya ndabala inene ya Jelusalemu

^30-34 “Ndabala inene ya Jelusalemu ilaakuba aminjililo ili likumi ayobilo. Mbasu shone sha lubumbu shilaakuba amamita ali 2,250. Mbasu yomwi ayomwi ilaakuba aminjililo yotatwe. Mwinjililo womwi awomwi ulaakutumbwa liina lya mukowa womwi wa bene Isilaeli. Minjililo ili kulubasu lwakumatwa ilaakutumbwa Lubeni, Juda alimwi aLefi. Iyo ili kulubasu lwakwicwe ilaakutumbwa Josefu, Benjameni alimwi aDani. Iyo ili kulubasu lwakumalenge ilaakutumbwa Simyoni Isaka alimwi aSebuluni. Iyo ili kulubasu lwakumbo ilaakutumbwa Gadi, Asha alimwi aNafutali.

³⁵ “Mushinso kushinguluka ndabala yoonse ulaakunooli mamita ali 9,000. Ndabala iyo ilaakunokwiitwa ayi, ‘Mwaami Lesa uli momuno!’ ”